ماڭگى باقي قولارباعا تاڭىلعان تىرشىلىكتىڭ نەسى باقىت دەرسىز. قۇداي-اۋ, مىناۋ جارىق دۇنيەدە جەر باسىپ جۇرگەنگە نە جەتسىن؟! باقىت دەگەن سول ەمەس پە؟ انشەيىندە ادامدار وسىلاي ويلاۋى دا مۇمكىن. ال شىن مانىندە قۇلاي سۇيگەن كوڭىلدىڭ وتتان ىستىق سەزىمىن, الاۋلاعان جان نۇرىن ەشكىم دە, ەشتەڭە دە سوندىرە المايدى ەكەن.
وڭ جاق قاپتالداعى قابىرعا ۇساق-ۇساق تاستارمەن جىمداسا كومكەرىلىپتى. ونىڭ ارعى جاعىنداعى اس بولمە دە ءبىز كورمەگەن بەدەرمەن بەزەندىرىلگەن. ال قوناق بولمە الۋان ءتۇرلى بەينەلەرگە, كوركەمسۋرەتتەرگە, ءارتۇرلى كەيىپتە سومدالعان زاتتارعا تولىپ تۇر. مىنا بىرەۋى «قايسار ايەل» دەپ اتالادى ەكەن. قوس جانارى ۇشقىن اتىپ, الماداي اق ءجۇزى الاۋلاي جانىپ, ەت جۇرەكتىڭ ءلۇپىلى توڭىرەگىنە تاڭ نۇرىنداي شۋاق شاشىپ تۇرعان, تال شىبىقتاي بۇرالعان بويجەتكەننىڭ ەكى قولى بايلاۋلى. ءسىرا, تاعدىردىڭ تالكەگىن مەڭزەگەن تۇسپالى شىعار. ەكى قولىن تاعدىر تاس قىلىپ بايلاسا دا, ەركىندىكتە, ازات, بوستان كۇيىندە. ءتىپتى ءسال عانا ۇمسىنا ۇمتىلىپ, قانات بايلاپ قيال كوگىنە ۇشىپ كەتكەلى تۇرعان ءتارىزدى. سۋرەتشى ءمارزيا مۇحانبەتجانوۆانىڭ ءوز ءومىرىن, تاعدىرىن بەينەلەگەن تۋىندىسى. سول تۋىندىداعى استارلى وي ءومىردىڭ وزىنەن ويىپ تۇرىپ ورىن العانداي. ءيا, سۇم تاعدىر ومىرگە عاشىق ادامنىڭ جولىنا كەسە-كولدەنەڭ جاتىپ, گۇل كوڭىلىن سولدىرعىسى كەلگەنىمەن, ومىرگە, جارىنا, پەرزەنتتەرىنە دەگەن اق ادال ماحابباتى بوي بەرمەگەن. بوي بەرگەنىڭىز نە, بويىنداعى قۇشتارلىعىن, ىڭكارلىگىن ەسەلەپ ارتتىرا تۇسكەن.
وبلىس ورتالىعىنىڭ ىرگەسىندەگى زەرەندى اۋدانىنىڭ كۋروپاتكينو اۋىلىندا دۇنيە ەسىگىن اشقان ءمارزيا كىشكەنتاي كەزىنەن تىم-تىم قيالشىل ەدى. وزگە جان ءتۇسىنىپ-تۇيسىنە بەرمەيتىن قىزىلدى-جاسىلدى قىزىققا تولى ءوزىنىڭ ادەمى الەمى بار. سول الەمدى ەلەگىزي كەزىپ جۇرەدى. كەيبىر ساتتەردە سۇلۋ دا سىرلى, توسىن دا تىلسىم بەينەلەر كەزىگەدى. الگى بەينەلەرمەن سىر شەرتىسىپ, كوزىن تويدىرىپ, كوڭىلىن توعايتقان ساتتە بالكىم سۋرەت كۇيىندە, بالكىم الدەبىر ماتەريالداردان قالىپتاعان زات كەيپىندە اينىتپاي تۇسىرە قويادى.
كەيىپكەرىمىزدىڭ بويىنداعى شەبەرلىكتى ساناپ كورەلىكشى. ءمارزيا – سۋرەتشى, ءمۇسىنشى, تىگىنشى, قولونەر شەبەرى. مىنە, وسىلايشا جالعاسىپ كەتە بەرەدى. وتپەلى كەزەڭنىڭ وكپەك جەلى شىعارماشىلىقتان قول ۇزدىرگەن ساتتە جان جارى ەكەۋى پاتەرلەردى, كوتتەدجدەردى بەزەندىرۋگە كوشتى. جۇمىس باستان اسىپ جاتاتىن. كەي كوتتەدجدەردى قونا جاتىپ, جىلداپ ارلەدى. قىرسىق 2013 جىلى قىرىنا الدى. جوعارىدا, توبەنى ارلەپ جاتقان ءمارزيا بايقاۋسىزدا اياعى تايىپ كەتىپ قۇلاعانى. قاس قىلعانداي كولدەنەڭ جاتقان بورەنەنىڭ ۇستىنە تۇسكەن ەكەن. بەينەلەپ ايتقاندا, قاۋىرسىنداي عانا قىز بولعانىمەن, سالماقتىڭ اتى سالماق. ومىرتقاسى سىنعان. ودان سوڭعىسى اۋرۋحانانىڭ توسەگىنە تاڭىلۋ, سانسىز وتا, جۇقارعان جۇيكە, سەلكەۋ تۇسكەن سەنىم. ءبىر ءسات ەسىن جيناعان. جوق, بىلاي تىم وڭاي بەرىلۋگە بولمايدى, تىرشىلىگى ءۇشىن كۇرەسۋى كەرەك. جامباستاپ جاتا بەرسە, جارىنىڭ كۇنى نە بولماق, شيەتتەي بالالارى جۇدەپ قالماي ما؟ الدەبىر قۇدىرەت قوس قولتىعىنان كوتەرىپ دەمەگەن ءتارىزدى. ءوزى دە العا ۇمتىلدى. بىرتە-بىرتە شاعىن جاتتىعۋلاردى جاساۋدى ۇيرەندى. جاستىقتان باسىن كوتەرگەن سوڭ سۇيىكتى ءىسى – قولونەرمەن شۇعىلدانا باستادى. پەردە تىكتى, كويلەك ءپىشتى, ساندىك اشەكەي زاتتاردى ارلەدى. ءجۇزىن, الدە مۇڭىن جاسىردى ما ەكەن, كوبىن دوستارى مەن تىلەكتەستەرىنە تەگىن تاراتتى. شابىتپەن جاسالعان دۇنيەسىن ساتىپ كورگەن ەمەس. ال تاپسىرىسپەن ىستەلگەن جۇمىس, ارينە, ءوز ەڭبەگى.
– ءبىر ادەمى دۇنيەمدى ەجەلگى تانىسقا, ايتپەسە ءبىر كورگەن ادامعا سىيلاعان كەزدە جۇزىنەن قۋانىش تابىن كورسەم, سول ماعان جەتىپ جاتىر, – دەيدى قولونەر شەبەرى, – ادامعا ودان ارتىق نە كەرەك؟
اۋرۋحانا توسەگىندە تاڭىلىپ جاتقاندا-اق الداعى ءومىر ورنەكتەرى توعىساتىن تاعدىر جولىن قۇتتى باعدارلامالىق قالىپقا سىيعىزىپ, جوسپارلاپ العان. قازىر سول باعدارلاما بويىنشا جۇمىسقا بەرىلگەنى سونشالىقتى, بىرەر مينۋت بوس وتىرسا, ەكى قولىن الدىنا سىيعىزا المايتىنى بار.
اڭگىمەلەسىپ وتىرىپ ۇققانىمىز, ءمارزيانىڭ كوركەمونەر تاراپىنان ءبىلىمى جوق ەكەن. ايتسە دە, تىلسىم تابيعات تالانت دەپ اتالاتىن قۇدىرەتتى سۇيەگىنە سىڭىرگەن. جىل سايىن وبلىستىق «اقمولا جۇلدىزدارى» حالىق شىعارماشىلىعى كورمەسىنە قاتىسىپ, جۇلدەلى ورىنعا يە بولۋى شەبەردىڭ بويىنداعى تابيعي دارىننىڭ لايىقتى باعالانۋى دەر ەدىك. ءبىر قىزىعى, كورمەدەن سوڭ كوز مايىن تاۋىسىپ جاساعان نە ءبىر ادەمى, ءوزى ءۇشىن دە, وزگە ءۇشىن دە قىمبات دۇنيەلەرىن تەگىن تاراتىپ جىبەرەدى ەكەن. جوعارىدا ايتقانىنداي, ادامدارعا تيتىمدەي بولسا دا قۋانىش سىيلاۋ ءۇشىن.
ءوزى ءۇش جىل توسەك تارتىپ جاتقان كەزدە كۇيەۋى يگور دا قۇرىلىستا اپاتقا ۇشىراپ, مۇگەدەكتەر ارباسىنا تاڭىلدى. ءدال وسى ساتتە كوڭىلدىڭ اپپاق كۇننىڭ نۇرىنداي ادەمى ءساتىن كىرەۋكەلەنگەن تۇمان باسقانداي دۇنيەنىڭ ءجۇزى تالاۋراي قاراۋىتىپ كەتتى. ەندىگى كۇنى نە بولماق؟ بۇرىنعى بۇرىنعى ما, شىن سىناق ەندى باستالعانداي. ءبىر وتباسىنداعى ەكى بىردەي ادام مۇگەدەكتەر ارباسىنا تاڭىلسا, جوپشەڭدى ادام ومىردەن باز كەشكەندەي قاسىرەت ەمەس پە؟!
مىناۋ جارىق دۇنيەدە ەڭ قۇدىرەتتى كۇش ەت جۇرەكتىڭ ەنشىسىندە ەكەن. سانا دا سوعان بايلاۋلى. جۇرەك تاۋبە دەگەن, جاراتقاننىڭ بەرگەنىنە شۇكىر. بوركەمىك بولسا بورداي توزىپ كەتەر ەدى, ال, بۇلار ءبىرىنىڭ ارباسىن ءبىرى سۇيرەتىپ ءجۇرىپ, ءبىرىن-ءبىرى دەمەپ ءجۇرىپ تاعدىردىڭ سالعان ىسىنە كونگەنىمەن, ءۇمىت اتتى قۇدىرەتتىڭ شىڭىراۋدىڭ ەڭ ءبىر تەرەڭىنەن تالماۋسىراعان مايشامنىڭ جارىعىنداي جالقىن ساۋلەگە جۇرەكتەرىن جىلىتقان. ءبىر-ءبىرىن ولەردەي جاقسى كورگەن, ءبىر-ءبىرىن ماڭگىلىك سۇيگەن ماحابباتتىڭ قايتپاس قايسار رۋحقا قۋات بەرگەن الاپات كۇشىمەن.
قازىر ءتورت قىزى, توعىز نەمەرەسى جاز گ ۇلىندەي جايناپ ءوسىپ كەلەدى. الدى ەر جەتىپ, ءوز ءورىسىن تاپتى. اتا-انانىڭ بويىنداعى قاسيەتى جۇققانى كەنجەسى. ول دا سۋرەت سالادى, ءمۇسىن جاسايدى.
كىپ-كىشكەنتاي پاتەردە ون ەكى مۇشەسى ساۋ ادامداردىڭ كەيبىرى ومىرگە وكپە ايتىپ, قاراقان باسىن جارىلقاي الماي جۇرگەندە, مۇگەدەكتەر ارباسىنا تاڭىلعان قوس مۇڭلىقتىڭ شاڭىراعىن باقىت بوساعاسى دەپ ايتساق, نەسى ارتىق. تابالدىرىعىنا توزىمدىلىك ۇيالاپ, شاڭىراعىنا سەنىم بايلانعان الگى پاتەردەن شىققان سوڭ كوپكە دەيىن ءوز-وزىمىزگە كەلە الماي, اڭتارىلىپ تۇردىق. ادام رۋحى نەتكەن كۇشتى ەدى! پەندە بىتكەننىڭ بويىندا ءبىر-بىرىنە دەگەن وسىنداي سەزىم, وسىنداي ءىلتيپات بولسا عوي...
اقمولا وبلىسى
