بۇۇ باستاماسىمەن ۇيىمداستىرىلعان بۇل ءىس-شارا بەينە كونفەرەنتسيا فورماتىندا ءوتتى. مەملەكەت باسشىسى قازىرگى ۋاقىتتا قازاقستان توراعالىق ەتەتىن تەڭىزگە شىعاتىن جولى جوق دامۋشى ەلدەر توبىنىڭ اتىنان ءسوز سويلەپ, بىرقاتار ۇسىنىس جاسادى.
مەملەكەت باسشىسى ءسوز باسىندا جوعارى دەڭگەيدەگى شارانى ۇيىمداستىرعانى ءۇشىن بۇۇ باس حاتشىسى انتونيۋ گۋتەرريشكە جانە كانادا مەن يامايكانىڭ پرەمەر-مينيسترلەرىنە العىس ءبىلدىردى.
قاسىم-جومارت توقاەۆ پاندەميا الەم ەلدەرىنىڭ دامۋىنا قاۋىپ توندىرگەنىن العا تارتا وتىرىپ, اسىرەسە تەڭىزگە شىعاتىن جولى جوق دامۋشى ەلدەر ءۇشىن اۋىر بولعانىن ايتتى. بۇعان سەبەپتەردىڭ ءبىرى ساۋدا-ساتتىقتىڭ توقتاپ قالۋى بولىپ وتىر.
سونداي-اق قازاقستان پرەزيدەنتى بيزنەستىڭ بۇرىنعىداي بولمايتىنىن تۇسىنەتىنىن جانە بۇل جاعدايدا بارلىق مەملەكەتتىڭ بىرىگىپ ارەكەت ەتۋىنىڭ ماڭىزدىلىعىن باسا ايتتى.
شارا بارىسىندا مەملەكەت باسشىسى تەڭىزگە شىعاتىن جولى جوق دامۋشى ەلدەر اتىنان بەرەشەكتى حالىقارالىق كرەديتورلارعا قايتارۋدى كەيىنگە قالدىرۋ, دەنساۋلىق ساقتاۋ سالاسىنا قوسىمشا قاراجات ءبولۋ سەكىلدى باستامالار كوتەردى.
پرەزيدەنت ودان بولەك قازاقستاننىڭ پاندەميا كەزىندە حالىقارالىق كەلىسىمگە قوسقان ۇلەسىن دە اتاپ ءوتتى.
«قازاقستان جاھاندىق گۋمانيتارلىق كومەك جوسپارىنا ساي كوروناۆيرۋسپەن كۇرەستە بىرقاتار ەلگە كومەك جىبەردى. ەلىمىز ازىق-ت ۇلىك قاۋىپسىزدىگى, مەدياتسيا, قاقتىعىستاردى شەشۋ مەن بەيبىتشىلىك ورناتۋ سەكىلدى سالالاردا الەم ەلدەرىمەن كۇش بىرىكتىرۋگە دايىن»,- دەدى قاسىم-جومارت توقاەۆ ءوز سوزىندە.
