وندا سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ جانە ساۋدا جانە ينتەگراتسيا ۆيتسە-ءمينيسترى قايرات تورەباەۆ بايانداما جاسادى.
شاحرات نۇرىشەۆ ەلدىڭ سىرتقى ساياساتىنىڭ الداعى ون جىلدى قامتيتىن نەگىزگى باعىتتارىنا, ماقساتتارى مەن مىندەتتەرىنە توقتالدى.
«جاڭا تۇجىرىمداما ەلىمىزدىڭ تۇڭعىش پرەزيدەنتى – ەلباسى ن.ءا. نازارباەۆتىڭ تاۋەلسىزدىك تاڭىندا نەگىزىن قالاعان سىرتقى ساياسي باعىتتىڭ بازالىق قاعيداتتارىنىڭ ساباقتاستىعىن ساقتايدى. قازاقستاننىڭ سىرتقى ساياساتى بۇرىنعىداي كوپۆەكتورلىق, تەپە-تەڭدىكتى ساقتاۋ, پراگماتيزم جانە ۇلتتىق مۇددەلەردى قورعاۋ قاعيداتتارىنا نەگىزدەلەدى. ونىڭ تيىمدىلىگى ۋاقىتپەن دالەلدەنگەن», - دەدى سىرتقى ىستەر ءمينيسترىنىڭ ورىنباسارى.
جاڭا تۇجىرىمداماعا سايكەس تاۋەلسىزدىكتى, حالىقارالىق جانە وڭىرلىك ارىپتەستىكتى, كەلىسىم مەن قاۋىپسىزدىكتى نىعايتۋعا باعىتتالعان ءداستۇرلى سىرتقى ساياسي باعدار بۇدان بىلاي ەكونوميكالىق دامۋ اسپەكتىلەرىنە دە نازار اۋداراتىن بولادى. بۇل ەل ەكونوميكاسىنا تىكەلەي شەتەل ينۆەستيتسياسىن تارتۋ, تاريفتىك جانە تاريفتىك ەمەس كەدەرگىلەردى ازايتۋ ارقىلى قازاقستاندىق ەكسپورت ءۇشىن سىرتقى نارىقتىڭ اياسىن كەڭەيتۋ شارالارىن كۇشەيتۋگە مۇمكىندىك بەرەدى.
قوسىمشا بايانداماشى قايرات تورەباەۆ ساۋدانى دامىتۋدىڭ 2021-2025 جىلدارعا ارنالعان مەملەكەتتىك باعدارلاماسى تۇجىرىمداماسىنىڭ جوباسىنا جانە وندا قامتىلعان ەلىمىزدىڭ سىرتقى ساۋداسىن دامىتۋدىڭ نەگىزگى باعىتتارىنا توقتالدى. ول وڭىرلىك ساۋدانى دامىتۋ ءۇشىن ەۋرازيالىق ەكونوميكالىق وداق ەلدەرىنىڭ اراسىندا كەدەرگىسىز تاۋارلار قوزعالىسىن قامتاماسىز ەتۋدىڭ ماڭىزىن اتاپ ءوتتى. ونىڭ ايتۋى بويىنشا ەكونوميكالىق ديپلوماتيا قۇرالدارىن پايدالانۋ ەل تاۋارلارىن الەمدىك نارىققا شىعارۋعا جول اشادى.
سەناتورلار وتىرىس بارىسىندا سىرتقى ساياساتتىڭ ماڭىزدى ماسەلەلەرىن تالقىعا سالدى, ولاردىڭ قاتارىندا ترانسشەكارالىق وزەندەردىڭ سۋ رەسۋرستارىن رەتتەۋ, «بايتەرەك» عارىش زىمىران كەشەنى, سونداي-اق پاندەميا كەزىندە قازاقستان ازاماتتارىنىڭ ەلگە ورالۋىن ۇيىمداستىرۋ ماسەلەلەرى ءسوز بولدى.
