ءوڭىر باسشىسى الدىمەن اۋدانداعى تومەنارىق ەلدى مەكەنىندە سالىناتىن اۋىلدىق اۋرۋحانا جوباسىمەن تانىستى. اۋىل اقساقالدارى ايماق باسشىسىنان عيمارات قۇرىلىسىن تەزدەتىپ باستاۋعا ىقپال ەتۋىن سۇرادى. ەلدىمەكەننەن بوي كوتەرەتىن دارىگەرلىك امبۋلاتوريا-اۋرۋحانا 15 توسەككە لايىقتالعان.
مۇنان سوڭ وبلىس اكىمى «وردا سىعاناق» جشس-ءنىڭ شيپاجاي جۇمىسىن كوردى. شيپاجايدىڭ قۇرىلىس جۇمىستارى 2017 جىلى ءساۋىر ايىندا باستالعان. اشىلعان ۋاقىتتا 60 ادامدى جۇمىسپەن قامتيدى دەپ جوسپارلانۋدا.
سونىمەن قاتار, اۋدان اكىمدىگىندە وبلىس اكىمى گۇلشارا ابدىقالىقوۆانىڭ توراعالىعىمەن اۋداننىڭ الەۋمەتتىك-ەكونوميكالىق دامۋىنا ارنالعان ءماجىلىس ءوتتى.
-جالپى 4 ايدىڭ قورىتىندىسىمەن اۋداندا ونەركاسىپ ءوندىرىسى 1,3%, ونىڭ ىشىندە وڭدەۋشى ونەركاسىپ 8,5% ارتقان. سونداي-اق, اۋىل شارۋاشىلىعىندا دا 4,3% ءوسىم بايقالادى. دەگەنمەن, ەسەپتى كەزەڭدە ينۆەستيتسيا كولەمى 76,4 %, قۇرىلىس جۇمىستارى 36,8 %, تۇرعىن ءۇي قۇرىلىسى 98,6 % جانە بولشەك ساۋدا اينالىمى 80,6 % تومەندەگەن. وسى باعىتتاعى جۇمىستاردى شيراتۋ كەرەك. سونداي-اق, بيلىك تۇرعىندار ءۇشىن ءاردايىم اشىق بولۋى قاجەت. سەبەبى, مەملەكەتتىڭ باستى بايلىعى – ادام. بۇل مەملەكەتتىك ورگان ءۇشىن وزگەرمەيتىن قاعيدا. ەل ەكونوميكاسىن دامىتۋداعى قابىلدانعان شارالار ماقساتتى جانە ناتيجەلى بولۋى كەرەك, - دەدى وبلىس اكىمى.
وبلىس باسشىسى كەنتتە قۇرىلىسى بىلتىر باستالعان 600 ورىندىق مەكتەپتەگى جۇمىس بارىسىن كوردى. ءبىلىم ۇياسىنىڭ قۇرىلىسىن ساپالى جۇرگىزىپ, جىل سوڭىنا دەيىن پايدالانۋعا بەرۋدى تاپسىردى.
سونداي-اق, ايماق باسشىسى بايكەنجە اۋىلدىق وكرۋگىندەگى بارلاۋ, ءوندىرۋ, ۋران شيكىزاتىن قايتا وڭدەۋگە باعىتتالعان «بايكەن-U» جشس-ءنىڭ كاسىپورنىنا باردى.
مۇنان كەيىن, ايماق باسشىسىنا جاڭارىق ەلدى مەكەنىندەگى اۋىلدىق كلۋبتى كۇردەلى جوندەۋ جۇمىسى كورسەتىلدى. جوندەۋ جۇمىسىنا «جۇمىسپەن قامتۋ جول كارتاسى» باعدارلاماسى اياسىندا 116 ملن 144 مىڭ تەڭگە قاراجات ءبولىنىپ, 45 جۇمىس ورنى اشىلادى دەپ جوسپارلانۋدا.
ساپار اياسىندا ءوڭىر باسشىسى جاڭاقورعان كەنتىندەگى مەملەكەتتىك-جەكەشەلىك ارىپتەستىك اياسىندا سالىنعان سپورت كەشەندەرىنىڭ پروبلەمالىق ماسەلەسىمەن تانىستى. سونىمەن قاتار, كۇردەلى جوندەۋ جۇمىستارى مەملەكەتتىك باعدارلامالارى ارقىلى جۇزەگە اسىرىلاتىن جاڭاقورعان اگرارلى-تەحنيكالىق كوللەدجىندە بولدى. اۋدان اكىمى سۇلتان ماقاشوۆ اۋدان كولەمىندە مەملەكەتتىك باعدارلاما اياسىندا جۇرگىزىلىپ جاتقان جۇمىستار جونىندە باياندادى. وبلىس اكىمى اۋدان باسشىسىنا مەملەكەتتىك باعدارلامالار ارقىلى جۇزەگە اساتىن جوبالار مەن كۇردەلى جوندەۋ جۇمىستارىن ۋاقتىلى ءارى ساپالى جۇرگىزۋ قاجەتتىگىن مىندەتتەدى.
ساپار بارىسىندا وبلىس اكىمى جاڭاقورعان كەنتىندەگى قۇرىلىسى جاڭادان سالىناتىن 300 ورىندىق مەكتەپتىڭ ىرگەتاسىن قالاۋ راسىمىنە قاتىسىپ, اقۇيىك اۋىلىنداعى سالىنىپ جاتقان بالاباقشا مەن گازداندىرۋ ماسەلەسى بويىنشا اتقارىلعان جۇمىستاردى كوردى.
وبلىس اكىمى گۇلشارا ابدىقالىقوۆا جاڭاقورعان اۋدانىنا جۇمىس ساپارىنىڭ ەكىنشى كۇنىندە «شالقيا تسينك لتد» اق كەن ورنىمەن تانىسىپ, بريفينگكە قاتىستى. 610 ادام جۇمىسپەن قامتىلعان كاسىپورىن سىرتقى جانە ىشكى نارىقتا سۇرانىسقا يە قورعاسىن جانە مىرىش كونتسەنتراتتارىن شىعارۋدى جوسپارلاپ وتىر. تبك جوبالىق قۋاتى-جىلىنا 4 ملن.توننا, تولىق قۋاتقا شىققان كەزدە 1500-دەن استام ادامدى جۇمىسپەن قامتاماسىز ەتەدى.
