«وليمپيادا رەزەرۆىن قالىپتاستىرۋ جانە تاربيەلەۋ باستاۋىش سىنىپتان باستالادى. وسى ماقساتتا وقۋشىلارعا ارنالعان «باستاۋ», «جاس ماتەماتيك» ماتەماتيكالىق ءتۋرنيرى, «ماتەماتيكا جانە لوگيكا» وليمپياداسى, قالالىق جاسوسپىرىمدەر وليمپياداسى وتكىزىلەدى», – دەيدى ەلوردا اكىمدىگىنىڭ «استانا دارىنى» دارىندىلىق پەن پسيحولوگيالىق قولداۋدى دامىتۋ ورتالىعىنىڭ باسشىسى مايرا قۇرمانباەۆا.
13 جىل بويى رەسپۋبليكالىق وليمپيادا قورىتىندىسى بويىنشا ەلوردالىق ءبىلىم بەرۋ قۇراما كومانداسى جالپىكوماندالىق ەسەپتە ءبىرىنشى ورىندى يەلەنىپ, «ۇزدىك كوماندا» اتاعىنا يە بولدى.
«سونىمەن قاتار بيىل العاش رەت نازارباەۆ ۋنيۆەرسيتەتىمەن بىرگە نۇر-سۇلتان قالاسىنىڭ 10-12 سىنىپ وقۋشىلارى ءۇشىن ماتەماتيكادان (NUMO) وليمپيادا وتكىزدىك. وعان ماتەماتيكادان رەسپۋبليكالىق وليمپيادادا ىرىكتەۋ (قالالىق) كەزەڭىنە وتكەن 50 فيناليست قاتىستى», – دەدى م.قۇرمانباەۆا.
وليمپيادا قورىتىندىسى بويىنشا (NUMO) 10 وقۋشى جەڭىمپاز جانە جۇلدەگەر اتانىپ, 1 التىن, 7 كۇمىس جانە 2 قولا مەدالعا يە بولدى. جۇمىستىڭ باسىم باعىتتارىنىڭ ءبىرى – عىلىمي-زەرتتەۋ قىزمەتىن ۇيىمداستىرۋ. وسى ماقساتتا 1-7 سىنىپتارعا ارنالعان «زەردە» زەرتتەۋ جۇمىستارى مەن عىلىمي جوبالاردىڭ قالالىق كونكۋرسى وتكىزىلەدى.
ەلوردالىق وقۋشىلار جالپى ءبىلىم بەرەتىن پاندەر بويىنشا حالىقارالىق وليمپيادالار مەن عىلىمي جارىستاردا مىقتى باسەكەلەستەر قاتارىندا. «2019-2020 وقۋ جىلىندا ەلوردالىق 157 بالا برازيليا, كيپر, رۋمىنيا, ۆەنگريا, ازەربايجان, رەسەي, قىتاي, وڭتۇستىك كورەيا, كاتار, نيدەرلاندىدا وتكەن حالىقارالىق رەيتينگتىك وليمپيادالار مەن عىلىمي بايقاۋلارعا قاتىسىپ, جالپى سانى 72 مەدالعا: 15 التىن, 23 كۇمىس, 34 قولا جۇلدەگە يە بولدى.
