ەكونوميكا • 28 مامىر، 2020

«قازمۇنايگاز» اكتسيونەرلەرگە 81،7 ملرد تەڭگە ديۆيدەند تولەيدى

12 رەت كورسەتىلدى

2020 جىلعى 22 مامىردا «قازمۇنايگاز» ۇك اق ديرەكتورلار كەڭەسى 2019 جىلدىڭ قورىتىندىسى بويىنشا 81،7 ملرد تەڭگە مولشەرىندە ديۆيدەند تولەۋدى ۇيعاردى. بۇل الدىڭعى جىلمەن سالىستىرعاندا شامامەن ەكى ەسە كوپ، دەپ حابارلادى اكتسيونەرلىك قوعامنىڭ  جۇرتشىلىقپەن بايلانىس دەپارتامەنتى.

ديۆيدەند تولەۋ تۋرالى شەشىم مەملەكەت باسشىسىنىڭ تاپسىرماسىن ەسكەرە وتىرىپ، ديۆيدەند ساياساتىنا سايكەس قابىلداندى جانە كومپانيانىڭ نەگىزگى اكتسيونەرىمەن كەلىسىلدى. ديرەكتورلار كەڭەسى قمگ-نىڭ اعىمداعى قارجى جاعدايىن، اقشا اعىنى بولجامىن، حالىقارالىق كرەديتتىك رەيتينگتەرگە ىقپالدى، جۇمىس ورىندارىن ساقتاۋ بويىنشا اتقارىلىپ جاتقان جۇمىستى، سونداي-اق مەملەكەت مۇددەسى ءۇشىن ىسكە اسىرىلىپ جاتقان جوسپارلى ينۆەستيتسيالاردى قوسىمشا نازارعا الدى.

2019 جىلدىڭ قورىتىندىسى بويىنشا اۋديتتەن وتكەن قارجىلىق ەسەپتىلىككە سايكەس ديۆيدەند تولەۋدەن بولەك، قمگ اكتسيونەرلەرگە نۇر-سۇلتان جانە تۇركىستان قالالارىندا الەۋمەتتىك نىسانداردى سالۋعا ارنالعان قاراجاتتى قوسا العاندا 20 ملرد تەڭگە جولدادى.

كومپانيا ءوزىنىڭ قىزمەتىنەن تۇسكەن كىرىستى سىرتقى قارىزدارىنا قىزمەت كورسەتۋگە دە جۇمسايتىنىن اتاپ وتكەن ءجون. ولاردى وتەۋ سوماسى 2019 جىلى شامامەن 997 ملرد تەڭگەنى (2،6 ملرد دوللار) قۇرادى.

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار