ايماق باسشىسى قارابالىق اۋدانىنا جۇمىس ساپارى بارىسىندا اتالمىش قۇس فابريكاسىنا سوعىپ, وندىرىستەگى وزگەرىستەر بارىسىمەن تانىستى. كاسىپورىن باسشىسىنىڭ ايتۋىنشا, ىلكىمدى جوبا «قاراپايىم زاتتار ەكونوميكاسى» باعدارلاماسى ارقىلى جۇزەگە اسىرىلىپ جاتىر. فابريكانىڭ بۇكىل وندىرىستىك قۇرىلىمىن جاڭالاۋعا 4 ملرد تەڭگە قارجى جۇمسالماق. ناتيجەسىندە 260 جاڭا جۇمىس ورنى پايدا بولماق.
وبلىس اكىمى ودان كەيىن اۋدانداعى «جۇمىسپەن قامتۋدىڭ جول كارتاسى» باعدارلاماسىنىڭ جۇزەگە اسىرىلۋ بارىسىمەن تانىستى. قارابالىق وڭىرىندە بۇل باعدارلاما بويىنشا 4 جوبا ىسكە اسىرىلىپ جاتىر ەكەن. ولاردىڭ جالپى قۇنى 305 ملن تەڭگە بولادى. بۇگىنگە دەيىن 84 جۇمىس ورنى اشىلعان, ونىڭ تەڭ جارتىسىنا تۇرعىندار ەڭبەكپەن قامتۋ ورتالىقتارى ارقىلى ورنالاسقان.
قارابالىقتاعى بىرقاتار الەۋمەتتىك نىسانداردى ارالاپ شىققان اكىم ودان كەيىن «اگرو-تورو» سەرىكتەستىگىنىڭ ەگىن القابىندا جەرگىلىكتى اۋىلشارۋاشىلىق تاۋارلارىن وندىرۋشىلەرمەن كەزدەستى. باسقوسۋ بارىسىندا كوكتەمگى القاپ جۇمىستارىنىڭ بارىسى مەن اۋداننىڭ اگروونەركاسىپ كەشەنىن دامىتۋ جايى تالقىلاندى. قارابالىق اۋدانىنىڭ ديقاندارى بيىل 244,7 مىڭ گا القاپقا ءدان ءسىڭىرۋدى جوسپارلاپ وتىر.
