21 مامىر كۇنى اقتوبە وبلىسى پد كريمينالدىق جانە تابيعاتتى قورعاۋ پوليتسياسىنىڭ قىزمەتكەرلەرى ايتەكە بي اۋدانىندا باسقۇدىق اۋىلىنىڭ جانىندا جەرگىلىكتى تۇرعىندى ۇستادى.
تۇندە ايتەكە بي اۋدانى باسقۇدىق اۋىلىنىڭ ماڭىندا جەرگىلىكتى تۇرعىننىڭ باسقارۋىنداعى «تۇلپار» ماركالى موتوتسيكل توقتاتىلدى. كولىكتى تەكسەرۋ كەزىندە كيىكتىڭ التى ءمۇيىزى تابىلىپ, تاركىلەندى. ۇستالعان ادامنىڭ ايتۋى بويىنشا, اقبوكەندەردى ول اتپاعان, دالادا اتىلعان كيىكتەردى تاۋىپ, مۇيىزدەرىن كەسىپ العان.
قۇندى دەريۆاتتار تاركىلەندى, قر قىلمىستىق كودەكسىنىڭ 339-بابى (سيرەك كەزدەسەتىن جانە قۇرىپ كەتۋ قاۋپى تونگەن, سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىمەن, ولاردىڭ بولشەكتەرىمەن نەمەسە دەريۆاتتارىمەن زاڭسىز قارىم-قاتىناس) بويىنشا تەرگەۋ باستالدى. جىل باسىنان بەرى اقتوبە وبلىسىندا پوليتسيا قىزمەتكەرلەرى اقبوكەندى زاڭسىز اۋلاۋدىڭ ەكى فاكتىسىن, سونداي-اق دەريۆاتيۆپەن زاڭسىز اينالىسۋدىڭ بەس فاكتىسىن انىقتادى.
اقبوكەندەردى زاڭسىز اۋلاۋ, ولاردىڭ مۇيىزدەرىن ساتۋ جانە ت. ب. فاكتىلەردى تىركەۋ جالعاسىپ جاتىر. اقتوبە وبلىسىنىڭ پوليتسيا دەپارتامەنتى ايماق تۇرعىندارىن سيرەك كەزدەسەتىن جانۋارلاردى قورعاۋ تۋرالى زاڭنامانى بۇزباۋعا جانە قورشاعان ورتاعا ۇقىپتى قاراۋعا شاقىرادى.
