«بىرەر كۇن بۇرىن مەن قازاقستان رەسپۋبليكاسىندا «بەيبىت جينالىستاردى ۇيىمداستىرۋ جانە وتكىزۋ تۋرالى» جاڭا زاڭعا قول قويدىم. بۇل قۇجاتتىڭ باستى ەرەكشەلىگى – بۇدان بىلاي بەيبىت جينالىس وتكىزۋ ءۇشىن رۇقسات الۋ قاجەت ەمەس. ونى الدىن-الا ەسكەرتىپ, وتكىزۋگە بولادى. وسى زاڭ قوعامدىق ساياسي قاتىناستاردى دەموكراتيالىق جولمەن ودان ءارى دامىتۋعا زور ۇلەس قوسادى دەپ ويلايمىن. دەپۋتاتتارعا زاڭ زوباسىن ەگجەي-تەگجەيلى قاراستىرعانى ءۇشىن العىس ايتامىن. بىرلەسە اتقارىلعان جۇمىستىڭ ءمان-ماڭىزى زور. جاڭا زاڭ ازاماتتاردىڭ بەيبىت جيىندار وتكىزۋگە كونستيتۋتسيالىق قۇقىعىن تولىق قامتاماسىز ەتەدى»,- دەدى ءوز سوزىندە پرەزيدەنت.
ودان بولەك مەملەكەت باسشىسى باسقا دا زاڭ جوبالارىنىڭ ازىرلەنىپ جاتقانىن مالىمدەدى.
«ساياسي رەفورمالاردىڭ ءبىرىنشى توپتاماسىنا كىرەتىن باسقا دا زاڭ جوبالارى ازىرلەنىپ جاتىر. سونداي-اق سايلاۋ تۋرالى جانە ساياسي پارتيالار تۋرالى زاڭدارعا وزگەرىستەر ەنگىزەتىن قۇجاتتارعا قول قويدىم. ءبىز پارلامەنتتىك وپپوزيتسيا ينستيتۋتىن ەنگىزدىك. ساياسي پارتيالاردى تىركەۋگە قاتىستى تالاپ جەڭىلدەتىلدى. سايلاۋعا تۇسەتىن ساياسي پارتيالار ايەلدەر مەن جاستار ءۇشىن 30 پايىزدىق كۆوتا بولەتىن بولادى. جالا جابۋدى قىلمىس ساناتىنان الىپ تاستاۋ جانە قىلمىستىق كودەكستىڭ 174 بابىن ىزگىلەندىرۋ جونىندەگى نورمالارعا ازاماتتار بارىنشا قولداۋ ءبىلدىردى»,- دەپ اتاپ ءوتتى قاسىم-جومارت توقاەۆ.
قازىر مەملەكەت باسشىسىنىڭ توراعالىعىمەن ۇلتتىق قوعامدىق سەنىم كەڭەسىنىڭ ءۇشىنشى وتىرىسى ءوتىپ جاتىر.
