«ەلىمىزدە توتەنشە جاعداي رەجيمىنىڭ ەنگىزىلۋىنە قاراماستان ۇلتتىق قوعامدىق سەنىم كەڭەسىنىڭ مۇشەلەرى اۋقىمدى جۇمىس جۇرگىزدى. ەڭ الدىمەن ۇلتتىق كەڭەستىڭ مۇشەلەرى مەملەكەت باسشىسىنىڭ 2-وتىرىستا بەرگەن تاپسىرمالارىن ىسكە اسىرۋ بويىنشا جۇمىستارعا بەلسەنە قاتىستى. بەرىلگەن تاپسىرمالاردى ىسكە اسىرۋ ماقساتىندا پرەزيدەنت اكىمشىلىگىنىڭ باسشىسى 21 تارماقتان تۇراتىن ارنايى ءىس-شارالار جوسپارىن بەكىتكەن بولاتىن. وسىدان كەيىن مەملەكەتتىك ورگاندار جانە ۇلتتىق كەڭەس مۇشەلەرى بىرلەسە وتىرىپ, بەرىلگەن باعىتتاردى جۇزەگە اسىرۋعا كىرىستى. اسىرەسە, زاڭ جوبالارى بويىنشا جۇمىس توپتارىنداعى تالقىلاۋلارعا قاتىسۋ ۇلتتىق كەڭەس مۇشەلەرىنىڭ نەگىزگى جۇمىس بولىگىن قۇرادى. ەرلان سايروۆ, مۇحتار تايجان, اسىلبەك قوجاحمەتوۆ, اسحات سادىرباي, مارات ءباشىموۆ, مۇرات ابەنوۆ بەيبىت جينالىستار, ساياسي پارتيالار جانە سايلاۋ تۋرالى زاڭ جوبالارى بويىنشا جۇمىس توپتارىنىڭ تالقىلاۋلارىنا كۇن سايىن قاتىسىپ, ءوز ۇسىنىستارىن ەنگىزىپ وتىردى. جالپى العاندا مۇنداي شامامەن 20 تالقىلاۋ وتكىزىلدى. سونىمەن قاتار ۇلتتىق كەڭەس مۇشەلەرىنىڭ قاتىسۋىمەن پارلامەنتتە پارلامەنتتىك وپپوزيتسيا ينستيتۋتىن ەنگىزۋ, قىلمىستىق كودەكستىڭ 130-بابىن دەكريمينيليزاتسيالاۋ, 174-باپقا وزگەرىستەر ەنگىزۋ بويىنشا باسقا دا زاڭ جوبالارى قاراستىرىلدى», - دەدى ەرلان قارين.
ونىڭ ايتۋىنشا, ەرلان سايروۆ پەن ايدوس سارىم ەلباسى ن.نازارباەۆتىڭ باستاماسىمەن كوروناۆريۋسقا قارسى كۇرەس جاعدايىندا الەۋمەتتىك وسال توپتارعا قولداۋ كورسەتۋ ءۇشىن قۇرىلعان «بىرگەمىز» قورىنىڭ قامقورشىلىق كەڭەسىنە كىردى. وعان قوسا, ەلىمىزدىڭ وڭىرلەرىندە كوروناۆيرسقا قارسى ىسكە اسىپ جاتقان كۇرەس شارالارىنىڭ تيىمدىلىگى ۇلتتىق كەڭەس مۇشەلەرىنىڭ تاراپىنان ۇنەمى باقىلاۋدا بولدى.
«مارات شيبۇتوۆتىڭ سۇرانىمى نەگىزىندە الماتى قالاسىنداعى جۇك تاسىمالى بويىنشا كەيبىر ماسەلەلەر تۇزەتىلىپ, جاقسارتىلدى. ايدوس سارىم باق جۇمىسىنىڭ جەكەلەگەن سۇراقتارى جانە تۇرمىستىق زورلىق-زومبىلىق جاعدايلارىنىڭ ءوسۋى بويىنشا ماسەلە كوتەردى. ال اسىلبەك قوجاحمەتوۆ اقمولا وبلىسىنداعى جەدەل شتاب جۇمىسىمەن تانىستى. پرەزيدەنت كەڭەسشىسى باعدات ءمۋسيننىڭ جەتەكشىلىگىمەن قۇرىلعان جۇمىس توبى مەكتەپ وقۋشىلارىن قاشىقتان وقىتۋ پروتسەسىن ءتيىمدى ۇيىمداستىرۋ جۇمىستارىنا اتسالىستى. تولەۋتاي راحىمبەكوۆ اۋىلشارۋاشىلىق تاۋارلارىن وندىرۋشىلەرگە ارنايى ونلاين كەڭەس وتكىزىپ وتىردى. سونداي-اق تانىمال قۇقىق قورعاۋشى, ادۆوكات ايمان وماروۆا سىبايلاس جەمقورلىققا قارسى ءىس-قيمىل اگەنتتىگىمەن بىرلەسە وتىرىپ, ونلاين رەجيمدە حالىققا قۇقىقتىق كەڭەس بەرۋ بويىنشا جوبانى ىسكە اسىرا باستادى. ناتيجەسىندە بۇگىنگى كۇنگە دەيىن مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ 2-وتىرىسىندا بەرگەن تاپسىرمالارىن ىسكە اسىرۋ بويىنشا ءىس-شارالار جوسپارىنىڭ 11 باعىتى تولىقتاي جۇزەگە استى. وعان قوسا بىرقاتار زاڭنامالىق اكتىلەردىڭ جوبالارى پارلامەنتتە تالقىلاۋدان وتۋدە. سوندىقتان ۇلتتىق كەڭەس مۇشەلەرى دايىنداعان ۇسىنىستاردىڭ نەگىزگى بولىگى ىسكە استى دەۋگە بولادى», - دەدى پرەزيدەنت كەڭەسشىسى.
