زاڭ جوباسى ونەركاسىپتىك قاۋىپسىزدىك سالاسىنداعى زاڭناما نورمالارىن جەتىلدىرۋگە, بيزنەسكە اكىمشىلىك قىسىمدى ازايتۋعا, قاۋىپتى وبەكتىلەردە مەملەكەتتىك قاداعالاۋدى جۇزەگە اسىرۋدىڭ تيىمدىلىگىن ارتتىرۋعا, ونەركاسىپتىك قاۋىپسىزدىك سالاسىندا جۇمىس جۇرگىزۋ قۇقىعىنا اتتەستاتتالعان جانە اۆاريالىق-قۇتقارۋ جۇمىستارىن جۇرگىزۋ بويىنشا كورسەتىلەتىن قىزمەتتەردى ۇسىناتىن ۇيىمداردىڭ قىزمەتىن رەتتەۋگە, سونداي-اق قولدانىستاعى زاڭناماداعى زاڭنامالىق ولقىلىقتار مەن كولليزيالاردى جويۋعا باعىتتالعان.
اتالعان قۇجاتتى دەپۋتاتتاردىڭ نازارىنا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ۇسىندى.
– زاڭ جوباسى بويىنشا الدىمەن كاسىپورىنداردا وندىرىستىك باقىلاۋ قىزمەتتەرىن قىزمەتىن رەگلامەنتتەۋ جانە بۇعان جاۋاپتى لاۋازىمدى تۇلعالاردىڭ مارتەبەسىن كۇشەيتۋ ۇسىنىلادى. اتاپ ايتقاندا, ۇيىمنىڭ لاۋازىمدى تۇلعالارىنا قىزمەتكەرلەردىڭ ءومىرى مەن دەنساۋلىعىنا قاۋىپ توندىرەتىن, تالاپتاردى بۇزا وتىرىپ جۇزەگە اسىرىلاتىن جۇمىستاردى توقتاتا تۇرۋ وكىلەتتىگىمەن ونەركاسىپتىك قاۋىپسىزدىكتىڭ جاي-كۇيىن تەكسەرۋدى ۇيىمداستىرۋ مەن جۇرگىزۋ جانە ونەركاسىپتىك قاۋىپسىزدىك تالاپتارىنا سايكەس كەلمەيتىن ادامداردى جۇمىستان شەتتەتۋ قۇقىعىن بەرۋ ۇسىنىلادى. ەكىنشىدەن, ونەركاسىپتىك قاۋىپسىزدىك سالاسىنداعى جۇمىستاردى جۇرگىزۋ قۇقىعى اتتەستاتتالعان ۇيىمداردىڭ جانە اۆاريالىق-قۇتقارۋ جۇمىستارىن جۇرگىزۋ جونىندەگى قىزمەتتەردى ۇسىناتىن ۇيىمداردىڭ قىزمەتىن رەتتەۋ كوزدەلەدى. بۇل نورما 2018 جىلى كاسىبي اۆاريالىق-قۇتقارۋ قىزمەتتەرىن اتتەستاتتاۋ ءراسىمىن الىنىپ تاستالۋىنا جانە «ازاماتتىق قورعاۋ تۋرالى» زاڭىندا ونەركاسىپتىك قاۋىپسىزدىك سالاسىنداعى اتتەستاتتالعان ۇيىمداردىڭ قىزمەتىن رەتتەيتىن سۇراقتاردىڭ بولماۋىنا بايلانىستى ۇسىنىلادى, – دەدى مينيستر.
بۇعان قوسا زاڭ جوباسىندا قاۋىپتى وندىرىستىك وبەكتىلەردە تاۋ-كەن قۇتقارۋ, گازدان قۇتقارۋ, بۇرقاققا قارسى جۇمىستاردى جۇرگىزۋ سياقتى ونەركاسىپتىك قاۋىپسىزدىك سالاسىنداعى كاسىبي اۆاريالىق-قۇتقارۋ قىزمەتىنىڭ نەگىزگى بەلگىلەرىن رەگلامەنتتەۋ جانە ولارعا قويىلاتىن تالاپتاردى بەلگىلەۋ ۇسىنىلادى.
