جاسىنان جاسىنداي جارقىلداعان
ارقا توسىنەن شىققان بىلعارى قولعاپ شەبەرى ابىلايحان ءجۇسىپوۆتىڭ بۇگىنگە دەيىنگى سپورتتىق جولىنا قاراپ وتىرساڭىز, جاسوسپىرىمدەر مەن جاستار اراسىنداعى دودالاردا مۇنىڭ الماعان جۇلدەسى جوق ەكەن.
ەڭ الدىمەن 15-كە جاسى تولعاندا رەسەيدىڭ ياكۋتسك قالاسىندا ۇيىمداستىرىلعان «ازيا بالالارى» اتتى حالىقارالىق ويىندار تۋرنيرىندە توپ جارىپ, ءوزىنىڭ سپورتتىق مانسابىنداعى جەڭىستى جولىنا باتىل قادام جاساپتى. ارادا ءبىر جىل وتكەندە دارىندى جاس شىمكەنتتە وتكەن جاسوسپىرىمدەر اراسىنداعى ازيا چەمپيوناتىندا جەڭىمپاز اتاندى. سول جىلدىڭ كۇزىندە ۋكراينا استاناسىندا جالاۋ كوتەرگەن الەم چەمپيوناتىنا بارىپ, التىن جۇلدەمەن ورالدى. جولىنداعىنىڭ ءبارىن قوعاداي جاپىرعان بوزبالانى 2013 جىلى حالىقارالىق اۋەسقوي بوكس قاۋىمداستىعى (AIBA) «ەڭ ۇزدىك جاس بوكسشى» رەتىندە رەسمي تۇردە تانىعان.
بۋىنى بەكىپ, بۇلشىق ەتى بۇلتيا باستاعان بوزبالا ءبىر جىلدان كەيىن جاستار اراسىنداعى ايقاستارعا بىلەك سىبانا كىرىستى. ەل ىشىندەگى جارىستاردا وزىنە توتەپ بەرەتىن قارسىلاس تاپپاعان سوڭ, تايلاندتىڭ بانگكوگىندا وتكەن جاستار اراسىنداعى ازيا چەمپيوناتىنا اتتاندى. سالماعى ءوسىپ, 60 كيلو دارەجەسىندە ونەر كورسەتكەن ابىلايحان چەمپيون بولعانى ءوز الدىنا, اتالعان ء تۋرنيردىڭ ەڭ ۇزدىك بوكسشىسى اتاندى. ازيا چەمپيوناتىنىڭ التىن مەدالىن قانجىعاعا بايلاعان سوڭ, سول جىلدىڭ ءساۋىر ايىندا جاستار اراسىنداعى الەم چەمپيوناتىنا بەرىلگەن جولدامانى قالتاعا سالىپ, بولگاريانىڭ استاناسى سوفيانى بەتكە الدى. قارت قۇرىلىقتىڭ تورىندە بابى مەن باعى قاتار شاپقان ورەن جەڭىستىڭ ەڭ بيىك تۇعىرىنا كوتەرىلدى.
سول جىلى, ياعني 2014 جىلدىڭ تامىز ايىندا قىتايدىڭ نانكين قالاسىندا ءىى جازعى جاسوسپىرىمدەر وليمپياداسىنىڭ الاۋى جاعىلدى. شارشى الاڭعا 60 كيلو سالماق دارەجەسىندە كوتەرىلگەن ابىلايحان ءجۇسىپوۆ وزىنە ارتىلعان ەل سەنىمىن ابىرويمەن اقتاپ, التىننان مەدال تاعىندى. شەشۋشى جەكپە-جەكتە ول سول كەزدە الەم چەمپيونى دەگەن اتاعى بار كۋبالىق الەن ليمونتە بۋدەنى تىزە بۇكتىرگەن ەدى.
مىنە, وسىنداي ءدۇبىرلى جەڭىستەردەن كەيىن ماماندار مەن بوكسسۇيەر قاۋىم ابىلايحان ءجۇسىپوۆتى بۇل كەزدە سپورتتىق مانسابىن اياقتاعان سەرىك ساپيەۆتى الماستىرۋعا جاراتقاننىڭ ءوزى جىبەرگەن تاڭداۋلىسى رەتىندە قاراي باستادى. مۇنى قازاق بوكسىنا جاۋاپتى تۇلعالاردىڭ ون سەگىزگە جاسى تولماعان جاس پەرىنى قاراعاندىدا وتكەن عالىم جارىلعاپوۆ اتىنداعى XXXI حالىقارالىق ءتۋرنيردىڭ دوداسىنا قوسقانىنان-اق اڭعارۋعا بولۋشى ەدى. ال بۇل جارىس سۇيەگى قاتقان ەرەسەكتەر اراسىنداعى ايتۋلى دودانىڭ ءبىرى-تۇعىن.
بوكس دەگەن جاس ەكەنسىڭ دەپ باسىڭنان سيپاي قويمايتىن سپورتتىڭ قاتال ء تۇرى. ونىڭ ۇستىنە, ابىلايحان ونەر كورسەتكەن 64 كيلو سالماق دارەجەسىندە ەلىمىزدىڭ ەڭ مىقتى بوكسشىلارىنىڭ باسى تۇيىسكەنىن ەسەپكە الساق, مۇنداي دوداعا العاش تۇسكەلى تۇرعان العاداي جاسقا ايانىشپەن قاراعاندار دا كوپ ەدى. بىراق, ساقا جىگىتتەردىڭ سارت-سۇرت ەتكەن سۇراپىل سوققىلارىنا توتەپ بەرگەنى ءوز الدىنا, قارسىلاستارىنىڭ ءبارىن ايقىن باسىمدىقپەن جەڭىپ, ابىلايحان ءتۋرنيردىڭ باس جۇلدەسىن جەڭىپ الدى. سول جارىستان ۇيىنە جاياۋ قايتپادى: تەمىر تۇلپاردى تاقىمىنا باسىپ قايتقان.
«جارىلعاپوۆتىڭ تۋرنيرىندە» توپ جارۋ دەگەنىڭىز, ابىلايحان ءجۇسىپوۆ ءۇشىن ەرەسەكتەر اراسىنداعى دودالارعا ەسىك ايقارا اشىلدى دەگەن ءسوز ەدى. جاسىراتىنى جوق, بوكسقا قاتىسى بار جۇرتتىڭ ءبارىنىڭ كوكەيىندە سول كەزدە 2016 جىلى ريو-دە-جانەيرو قالاسىندا وتەتىن جازعى وليمپيادا تۇرعان ەدى...
باعى جاندى دەگەن سول ەمەس پە, كوپ ۇزاماي جاس جىگىت قازاقستاننىڭ ۇلتتىق قۇراما كومانداسىنىڭ ساپىنا شاقىرتۋ الدى.
ەرەسەكتەر اراسىندا ەڭسەسى تىك
ەل بوكسىنىڭ باس كومانداسى ساپىنداعى العاشقى تۋرنيرىندە توپ جارىپ, وزىنە سەنىم ارتقانمەن, قالاي بولار ەكەن دەپ ىشتەي الاڭداعان باپكەرلەرىنىڭ جۇرەگىن ورنىنا ءتۇسىردى. ۆەنگريادا وتكەن يشتۆان بوچكاي اتىنداعى جارىستىڭ شەشۋشى جەكپە-جەگىندە ەۋروپا ويىندارىنىڭ چەمپيونى, ازەربايجان ەلىنىڭ اتىنان سىنعا تۇسكەن كۋبالىق لورەنتسو سوتومايوردى سۇلاتىپ, التىن جۇلدەنى قانجىعاعا بايلادى.
ارادا از عانا ۋاقىت وتكەندە وليمپيادا جولداماسى ءۇشىن بولاتىن ايقاستار دا كەلىپ جەتكەن بولاتىن. ابىلايحان 2016 جىلدىڭ ءساۋىر ايىندا قىتايدا وتكەن ازيا بويىنشا ىرىكتەۋ تۋرنيرىندە چەمپيون اتانىپ, ريو-2016 وليمپياداسىنىڭ جولداماسىن جەڭىپ الدى.
راس, ابىلايحان ءجۇسىپوۆتىڭ ەرەسەكتەر اراسىنداعى ونەرىنە بىرجاقتى باعا بەرۋگە بولماس ەدى. جاستاردىڭ اراسىنان بۇزىپ-جارىپ ەنگەنىمەن, ەرەسەكتەر بوكسى بۇعان جىلى قاباق تانىتا قويمادى. ەڭ العاش رەت ريوداعى وليمپيا ويىندارىندا شالعىسى تاسقا ءتيدى. ءبىرىنشى جەكپە-جەگىندە جەڭىلىپ, سالى سۋعا كەتىپ, ۇيگە قايتقان. جانكۇيەر جازعاندا دا جاس قوي دەپ كوڭىلدى جۇباتقان باسقا امال قالماعان...
وليمپيادادان كەيىنگى ءىرى جارىسى 2017 جىلى تاشكەنتتەگى مامىر ايىندا وتكەن ازيا چەمپيوناتى ەدى. ابىلايحان بۇل سىندا فينالعا دەيىن جەتكەنىمەن, رينگ يەسى, ريو-2016 وليمپياداسىنىڭ كۇمىس جۇلدەگەرى شاحرام گياسوۆقا ەسە جىبەردى. سول جىلدىڭ كۇزىندە ول گامبۋرگتەگى الەم چەمپيوناتىندا 69 كيلو سالماقتا رينگكە كوتەرىلدى. جارتىلاي فينالعا جەتىپ, وندا تاعى دا شاحرام گياسوۆپەن بولعان شايقاستا جەڭىلىستىڭ كەرمەك ءدامىن تاتتى. قولا جۇلدە الدى دەمەسەڭىز, بۇل جاس بوكسشى ءۇشىن وزەكتى ورتەگەن وكىنىش ەدى, ارينە...
كەلەسى جىلى استانادا ازياداعا ىرىكتەۋ دوداسى رەتىندە ۇيىمداستىرىلعان قازاقستان پرەزيدەنتىنىڭ كۋبوگى سىنىندا ءوزىنىڭ باستى قارسىلاسى اسلانبەك شىنبەرگەنوۆپەن فينالدا قولعاپ تۇيىستىرە المادى. سەبەپ – جارتىلاي فينالدا وزبەك بوكسشىمەن بولعان ايقاستا ابىلايحان ماڭدايى جارىلىپ, جاراقات الىپ قالعان ەدى. سونىڭ سالدارىنان تامىز ايىندا يندونەزيادا وتكەن ازيا ويىندارىنداعى بوكس جارىسىن ۇيدە وتىرىپ تاماشالاۋىنا تۋرا كەلگەن.
شىنبەرگەنوۆپەن اراداعى كىم مىقتىنى انىقتاۋدىڭ ءساتى سول جىلدىڭ قاراشا ايىندا اقتاۋدا وتكەن ەل چەمپيوناتىندا كەلگەن. فينالدا ول قارسىلاسىن اۋىر نوكداۋنعا ءتۇسىرىپ, ۇلتتىق قۇراما ساپىنداعى ءوز ورىنىن قايتارىپ الدى.
بىلتىر رەسەيدىڭ ەكاتەرينبۋرگ قالاسىندا بولعان الەم چەمپيوناتىندا ورىس بوكسشىسى, باياعىدا سەرىك ساپيەۆپەن تالاي قولعاپ تۇيىستىرگەن اندرەي زامكوۆويدان جارتىلاي فينالدا جەڭىلىپ, قولا مەدالمەن ەلگە كوڭىلسىزدەۋ ورالدى...
ابىلايحان ءجۇسىپوۆ بالا كەزىنەن بوكستاعى ءپىر تۇتقانىم سەرىك ساپيەۆ دەپ كەلدى. بىلايعى جۇرت تا ەكەۋىنىڭ شارشى الاڭداعى مانەرىنەن ۇقساستىق ىزدەپ, اۋرەگە ءتۇستى. بىراق, بۇلاردىڭ بوكستاسۋ امالىندا ايتارلىقتاي ايىرماشىلىق بار ەدى. ماسەلەن, ساپيەۆتىڭ زامانىندا بوكسشىلار رينگكە شلەم كيىپ شىعاتىن جانە ول كەزدە بوكس قولعابى دا باسقاشا بولاتىن. ناقتىراق ايتقاندا, جۇدىرىق تولىقتاي جۇمىلمايتىن دا, سايكەسىنشە سوققىنىڭ كۇشى دە وسالداۋ بولاتىن. جىلدامدىق, تەحنيكالىق شەبەرلىكتى ايتپاعاندا, مۇنىڭ ءوزى جەكپە-جەكتىڭ تاكتيكاسىن قۇرۋعا ايتارلىقتاي ىقپالىن تيگىزۋشى ەدى.
بۇل تۋراسىندا مايتالمان ماماننىڭ, الەم كۋبوگىنىڭ يەگەرى اركادي توپاەۆتىڭ جاتتىقتىرۋشىسى قانات جاقسىباەۆتىڭ پىكىرى ءبىزدىڭ ويدى قۋاتتاي تۇسەدى. «سەرىك ساپيەۆ پەن ابىلايحاننىڭ تۇلەپ ۇشقان ۇياسى ءبىر – اباي بوكس مەكتەبى. سول سەبەپتى دە ەكەۋىنىڭ مانەرىندە ۇقساستىق بولۋى زاڭدى. ەكەۋى دە اياقپەن جۇمىس ىستەۋگە جانە تەحنيكاعا قاتتى ءمان بەرەدى. دەگەنمەن, باجايلاپ قاراساڭىز, ەكەۋىنىڭ مانەرى ءبارىبىر دە ەكى ءتۇرلى. ماسەلەن, ءجۇسىپوۆتىڭ سوققىلارى سالماقتىراق, كەرەك جەرىندە اشىق ايقاسقا بارۋدان تايىنبايدى. كەيىنگى كەزدە دەنەنىڭ كۇش-قۋاتىن ارتتىرۋعا كوڭىل ءبولىپ جۇرگەنى بايقالادى. رينگتەگى قيمىل-قوزعالىسىنىڭ ۇيلەسىمى اسا كەلىستى. ۇنەمى ويلى بوكس جاسايتىن ۇزدىك شەبەردىڭ ءبىرى», دەيدى ايگىلى باپكەر ءسۇيسىنىسىن جاسىرا الماي.
راس, كەيىنگى كەزدەرى ءجۇسىپوۆتىڭ اتىنا سوققىلارى السىزدەۋ دەگەن سىن ايتىلىپ ءجۇردى. ءتىپتى, ۇلتتىق قۇرامانىڭ باس باپكەرى عالىمبەك كەنجەباەۆتىڭ ءوزى ءبىر سۇحباتىندا ابىلايحانعا دەنە كۇشىن ارتتىرۋ كەرەك دەگەن بولاتىن. البەتتە, اقىلدى بوكسشى ابىلايحان ءوزىنىڭ كەمشىن تۇستارىن جاقسى بىلەدى دەگەن ويدامىز. ول ۇنەمى ىزدەنىس ۇستىندە جۇرەتىن سپورتشى. كەيىنگى كەزدەرى بوكس ماماندارى ونىڭ بۇلشىق ەتتەرىنىڭ سىرتقا تەۋىپ, سوققىلارىنىڭ دا ەداۋىر سالماق قوسا تۇسكەنىن بايقاپ ءجۇر. مۇنى بوكسشىنىڭ سىننان قورىتىندى شىعارىپ, كەمشىلىكپەن جۇمىس ىستەي بىلگەن ەڭبەگىنىڭ جەمىسى دەپ باعالالعان ءجون شىعار.
«ورتانشىعا وق تيمەس»
جالپى, «اباي بوكس مەكتەبىنىڭ» داڭقىنا ەلىمىزدى بىلاي قويعاندا, كۇللى الەم قانىق. كاسىپقوي بوكستا الەم چەمپيونى اتاعىن يەمدەنگەن ناتاليا راگوزينا مەن ولەگ ماسكاەۆ, ەۋروپا چەمپيونى, اتاقتى سەرىك نۇرقازوۆ پەن وليمپيادا جەڭىمپازى سەرىك ساپيەۆ وسى شاعىن قالاداعى بوكس ۇيىرمەسىنەن شىڭدالىپ شىققان. بۇلار جانە باسقا دا نەبىر تالانتتى بوكسشىلار اتاقتى اندرەي رايش نەگىزىن قالاعان, الەكساندر سترەلنيكوۆ ءىسىن جالعاعان مەكتەپتىڭ تۇلەكتەرى ەدى.
مىنە, وسى بوكس مەكتەبىنىڭ تابالدىرىعىن بالا ابىلايحان جەتى جاسىندا اتتادى. العاشقى اسكەري دايىندىق پانىنەن ساباق بەرەتىن اكەسى جەتەكتەپ اكەلىپ, كەزىندە شارشى الاڭنىڭ شاڭىن تالاي قاققان, «سپورت شەبەرى» دەگەن قۇرمەتتى اتاعى بار باۋىرجان امانباەۆ باپكەرلىك ەتەتىن ۇيىرمەگە جازدىرعان.
ابىلايحان جۇدىرىقتاي كەزىنەن تارتىپكە باعىنعان, ەڭبەكقورلىق قانىنا سىڭگەن بالا ەدى. سودان دا بولار, باپكەرىنىڭ ايتقانىن ەكى ەتكىزبەيتىن. شەلەكتەپ تەر توگىلدى, جۇيكەنىڭ دە جۇقارعان كەزدەرى بولعان. دەگەنمەن, جاتتىقتىرۋشى مەن جانام دەگەن بالا بوكس دەگەن ونەردىڭ ولكەسىندەگى ايقىن ماقساتتىڭ جولىنا اداسپاي تۇسكەن ەدى. سول كەزدە نەگىزى قالانعان باپكەر مەن شاكىرت اراسىنداعى وداق ەكەۋىن دە بۇگىنگى كۇننىڭ بيىگىنە شىعاردى. «ومىردەگى اكەمنەن كەيىنگى ۇستازىم وسى كىسى», دەگەن ابىلايحاننىڭ ءسوزى باپكەرىنە بەرىلگەن باعانىڭ ەڭ جوعارىسى ەدى.
بىلتىر ابىلايحان قاراعاندىنىڭ ينديرا ەسىمدى ارۋىمەن كوڭىل جاراستىرىپ, وتاۋ تىكتى. جاس كەلىن دە تەگىن ادام ەمەس: «شامشىراق» اتتى بي ءانسامبلىنىڭ جەتەكشىسى. «كەلىننىڭ اياعىنان» دەگەن بار عوي, ۇيلەنە سالىسىمەن يوردانيانىڭ استاناسى اممانعا اتتانىپ, وندا وتكەن ازيا جانە مۇحيت جاعالاۋى ەلدەرىنىڭ ليتسەنزيالىق تۋرنيرىندە اتوي سالدى. ءوزىنىڭ ومىرىندەگى ەكىنشى وليمپياداسىنىڭ ارمان ەتكەن جولداماسىنا قول جەتكىزدى.
«ابىلايحاننىڭ بولاشاعى الدا, – دەيدى قاراعاندىداعى جوعارى جەتىستىكتەر سپورتى مەكتەبىنىڭ ديرەكتورى دانيار مىڭباەۆ. – جاسوسپىرىمدەر مەن جاستار اراسىندا ءدال ابىلايحانداي اتاعى بار بوكسشى تمد اۋماعىندا جوق دەپ ويلايمىن. قازىر ول ەرەسەكتەر بويىنشا ۇلتتىق قۇراماداعى ناتيجەلى شەبەردىڭ ءبىرى. بارعان جارىستىڭ بارلىعىنان جۇلدەمەن ورالىپ ءجۇر. بۇل ونىڭ ءوز ىسىنە دەگەن كاسىبي تۇرعىداعى زور جاۋاپكەرشىلىگىن كورسەتەدى».
ءيا, الەمدىك بوكستا 69 كيلونى بەيرەسمي تۇردە «قازاقتىڭ سالماعى» دەيدى. ايتسا, ايتقانداي-اق: باقتيار ارتاەۆ, باقىت سارسەكباەۆ, سەرىك ساپيەۆ جانە دانيار ەلەۋسىنوۆ وسى سالماقتا ءوليمپتىڭ شىڭىنا شىقتى ەمەس پە؟! وسى تۇرعىدان كەلگەندە, ابىلايحان جۇسىپوۆتەي جامپوزعا ارتىلعان جاۋاپكەرشىلىك جۇگى جەڭىل ەمەس. «الدىڭداعى اعالارىڭ شىققان شىڭ تىم بيىك. ەل سەنەن دە سونداي جەتىستىك كۇتەدى. جالپى, «قازاقتىڭ سالماعى» دەگەننىڭ سالماعىن قالاي سەزىنەسىڭ؟ پسيحولوگيالىق تۇرعىدا اسەرى اۋىر ەمەس پە؟», دەپ سۇراعانىمىزدا جاس جىگىتتىڭ بايسالدى تۇردە بەرگەن جاۋابى كوكەيگە قونىمدى شىقتى. «مەن عانا ەمەس, قۇراماداعى وليمپيادا جولداماسىن جەڭىپ العان ارىپتەستەرىمنىڭ بارلىعى دا جاۋاپكەرشىلىكتى سەزىنەدى. وزىنە سەنىمدى ادامعا الىنبايتىن اسۋ جوق دەپ ويلايمىن», دەگەن ويلى جاس.
ويلى جاس دەمەكشى, ءبىزدىڭ كەيىپكەر ورتا مەكتەپتى «التىن بەلگىگە» ءبىتىرۋى ءتيىس ەدى. اتتەڭ, ۇبت-داعى جەتپەي قالعان از عانا باللدىڭ وكىنتىپ كەتكەنى بولماعاندا... ويلاپ قاراساڭىز, ابىلايحاننىڭ مىسالى بازبىرەۋلەردىڭ بوكسقا ساباقتى ناشار وقىعان, بۇزىق بالالار عانا بارادى دەگەن پىكىرىنىڭ تىم قيسىنسىز ەكەنىنە كوزىڭىزدى جەتكىزە تۇسەدى. ءيا, شارشى الاڭدا كانىگى شاحماتشىداي ەكى-ءۇش ءجۇرىسىڭدى بۇرىن ويلاستىرىپ, اقىلدى بوكستىڭ امالىن كورسەتۋ ءۇشىن باستا ءبىلىم, جۇرەكتە وت بولمايىنشا, قۇر جۇدىرىق جەتكىلىكسىز!
بىلتىر ابىلايحان قاراعاندىداعى ەكونوميكالىق ۋنيۆەرسيتەتتىڭ «مەملەكەتتىك جانە جەرگىلىكتى باسقارۋ» بىلىكتىلىگى بويىنشا ءتامامدادى. قازىر وسى وقۋ ورنىندا مەنەدجمەنت ماماندىعىنىڭ ماگيسترانتى.
قازاق بالانىڭ ورتانشىسىنا ەرەكشە ءمان بەرىپ قارايدى, «ورتانشىعا وق تيمەس», دەپ كوتەرمەلەيتىنى سوندىقتان. قاراپايىم وتباسىنان شىققان ابىلايحان دا ۇيدەگى ءۇش ۇل, ەكى قىزدىڭ ورتانشىسى.
قاراعاندى قازاقى تاربيەنى بويىنا سىڭىرگەن, مىنەزى كوركەم باتىر ۇلىن باعالاي بىلەدى. بىلتىر جاڭا ۇيدەن پاتەر سىيلاپ, ءىشىن جيھاز بەن تۇرمىسقا قاجەتتى دۇنيەمەن تولتىرىپ بەردى. وبلىستىڭ اتىنان ۇسىنىلىپ, «قازاقستاننىڭ 100 جاڭا ەسىمى» رەسپۋبليكالىق جوباسىنىڭ جىلناماسىنا اتى جازىلدى.
وكىنىشكە قاراي, كۇللى الەمگە ءامىرىن جۇرگىزگەن كوروناۆيرۋستىڭ كەسىرىنەن توكيو وليمپياداسىنىڭ وتەتىن مەرزىمى كەلەسى جىلعا قالدىرىلدى. امال قانشا, ابىلايحان دا الەمنىڭ وزگە ەڭ مىقتى سپورتشىلارى سياقتى ىشتەن تىنىپ ءجۇر. بىلعارى قولعاپ شەبەرىنە «وليمپيادا چەمپيونى بولسام» دەگەن ارزۋ ارمانىن تاعى ءبىر جىلعا ايالداتا تۇرۋعا تۋرا كەلەدى.
P.S. ابىلايحانداي التىن ۇلدان قاراعاندى عانا ەمەس, بارشا قازاق تاقىم قىسىپ جەڭىس كۇتەدى. توكيودان تارلانىم جارقىراتىپ التىنمەن كەلسە دەپ تىلەيدى. ء«بىر جاعىنان الىپ قاراعاندا, – دەيدى قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ, – توكيو وليمپياداسىنىڭ كەيىنگە شەگەرىلگەنىن ۇلكەن مۇمكىندىك دەپ تە قاراستىرۋعا بولادى. ويتكەنى, ءبىزدىڭ ابىلايحان ءوزىنىڭ ومىرىندەگى ەڭ باستى دوداسىنا ەسەيگەن, كۇشەيگەن قالپىندا بارادى دەگەن ءۇمىت بار. قازاققا قاسيەتى وتكەن ابىلايحان دەگەن اتقا كىر كەلتىرمەي, نامىستى قولدان بەرمەس دەگەن سەنىمدەمىز».
قاراعاندى وبلىسى
