جيىنعا قاتىسۋشىلار اتاپ وتكەندەي, قالادا كوروناۆيرۋس ينفەكتسياسىنىڭ تارالۋىنىڭ الدىن الۋ ءۇشىن سانيتارلىق-پروفيلاكتيكالىق جۇمىستار ىستەلۋدە. قازىر ستۋدەنتتەر مەن وقۋشىلاردىڭ قالادان شىعۋ جانە كىرۋ الگوريتمى, الەۋمەتتىك وسال توپتىڭ, اسىرەسە از قامتىلعان حالىقتىڭ كۆي-نا تالداۋدى تەگىن جاساۋ ماسەلەسى قارالىپ جاتىر.
تاعى ءبىر ماڭىزدى ماسەلە – الداعى شومىلۋ ماۋسىمىنا دايىندىق. نۇر-سۇلتان قالاسى بويىنشا توتەنشە جاعدايلار دەپارتامەنتى باسشىسىنىڭ م.ا. ەسەن بايىروۆتىڭ ايتۋىنشا, وسى كۇنى ەلوردادا 90 تىيىم سالۋ بەلگىسى, 20 اقپاراتتىق ستەند, 20 قالقىمالى بەلگى ورناتىلدى. جالپى, سۋعا ءتۇسۋ ماۋسىمى كەزىندە كۇن سايىن جەكە قۇرامنىڭ 20 قىزمەتكەرى, 14 قايىق, 1 گيدروتسيكل پاترۋلدەۋگە شىعادى. سونداي-اق قوعامدىق قۇتقارۋشىلار مەن قالا اكىمدىگىنىڭ ازاماتتىق قورعانىستى قامتاماسىز ەتۋ ورتالىعىنىڭ 15 مامانى جۇمىلدىرالادى.
ەسەن بايىروۆ ءورت قاۋىپسىزدىگى مەن بالالاردىڭ تەرەزەدەن قۇراۋ وقيعالارىن دا تىلگە تيەك ەتتى. سوڭعىسى قالاداعى وزەكتى ماسەلە بولىپ تۇر. سەبەبى 2018 جىلدان باستاپ بۇگىنگە دەيىن 51 ءبۇلدىرشىن تەرەزەدەن قۇلاپ كەتكەن.
ەلوردا اكىمىنىڭ ورىنباسارى باقتيار ماكەن جيىندى قورىتىندىلاي كەلە, قالالىق جاعاجايلاردىڭ اباتتاندىرىلۋى مەن سۋداعى قاۋىپسىزدىكتى قامتاماسىز ەتۋ قاجەتتىلىگىن ايتتى.
«قۇرمەتتى ارىپتەستەر, كۇن جىلىنىپ, سۋعا ءتۇسۋ ماۋسىمىنىڭ ەرتە باستاۋىنا وراي, قالا اۋماعىنداعى تەگىن جاعاجايلار اشىلا باستايدى. ولاردى سۋ ايدىندارىنداعى قاۋىپسىزدىك ەرەجەلەرىنە سايكەس اباتتاندىرۋ كەرەك. جاعاجايلاردا باسقا دا قاجەتتى قۇرالداردان بولەك سۋدىڭ تەمپەراتۋراسى, تەرەڭدىگى مەن باسقا دا ماڭىزدى مالىمەتتەردى قامتيتىن اقپاراتتىق ستەند ورناتىلۋى ءتيىس. تۇرعىندار جاعاجايدا كارانتين مەن سانيتارلىق نورمالاردى ساقتاۋى كەرەك», – دەدى اكىمنىڭ ورىنباسارى.
باقتيار ماكەن بالالاردىڭ سۋداعى قاۋىپسىزدىگى ءۇشىن الدىمەن اتا-انالارى جاۋاپتى ەكەنىن ەسكە سالدى. سوندىقتان قانداي جاعداي بولسا دا, بالالاردىڭ سۋعا ۇلكەندەردىڭ قاراۋىسىز تۇسۋىنە جول بەرىلمەۋى كەرەك.
