ۇزدىكتەر كوشىن ريكاردو لوپەس باستاپ تۇر. اسا جەڭىل جانە جەڭىل سالماق دارەجەلەرىندە ونەر كورسەتكەن مەكسيكانىڭ مورەلوس شتاتىنىڭ تۋماسى 1985-2001 جىلدار ارالىعىندا 52 مارتە شارشى الاڭعا كوتەرىلىپ, 51 رەت جەڭىسكە جەتتى. WBو, WBC, IBF نۇسقالارى بويىنشا چەمپيوندىق ءتاجدى يەلەنگەن ريكاردو 38 قارسىلاسىن نوكاۋتپەن ۇتتى. بۇل – جەڭىل سالماقتى بوكسشىلار ءۇشىن وتە كەرەمەت ناتيجە. تەك 1998 جىلى نيكاراگۋالىق روسەندو الۆارەسكە قارسى باسەكەنىڭ سەگىزىنشى راۋندىندا لوپەستىڭ قاباعى جارىلىپ, وسى جەكپە-جەكتە تەڭ ەسەپ تىركەلگەن ەدى. مەكسيكانىڭ مىقتىسى 34 جاستان اسقان شاعىندا بىلعارى قولعابىن شەگەگە ءىلدى.
داڭقى جەر جارىپ, ابىرويعا مولىنان كەنەلىپ, سونىمەن قوسا بايلىققا بەلشەسىنەن باتقان 44 جاستاعى فلويد مەيۆەزەر سپورتتىق مانسابىن اياقتاعانى جايىندا ءالى رەسمي تۇردە مالىمدەگەن جوق. كاسىپقوي رينگتە 20 جىلدان اسا جۇدىرىقتاسقان اقش-تىڭ جۇلدىزى 50 كەزدەسۋدىڭ بارلىعىندا باسىمدىق تانىتتى. 27 باسەكەنى مەرزىمىنەن بۇرىن اياقتادى. ءتۇرلى سالماق دارەجەسىندە كۇش سىناسقان فلويد قازىرگى كەزدە ءححى عاسىردىڭ ەڭ ۇزدىك بىلعارى قولعاپ شەبەرلەرىنىڭ كوشىن باستاپ تۇر. الايدا ءوزىنىڭ سوڭعى جەكپە-جەگىن ول وسىدان ءۇش جىل بۇرىن وتكىزدى. سونىڭ وزىندە كاسىپقوي بوكسشىمەن ەمەس, ەرەجەسىز جەكپە-جەك ونەرىنىڭ حاس شەبەرى كونور ماكگرەگورمەن كۇش سىناستى. بۇل سپورتتىق سايىس ەمەس, تازا اقشا تابۋدىڭ امالى ەكەنى بارشاعا ءمالىم. وسى جايتتىڭ بارلىعىن پايىمداي كەلە, مەيۆەزەردىڭ ەندى شارشى الاڭعا ورالۋى ەكىتالاي دەگەن پىكىردەمىز.
ەكىنشى دۇنيەجۇزىلىك سوعىس اياقتالعان تۇستا شارشى الاڭدى شايقاعان روككي مارچيانونىڭ ەسىمى ءالى دە ەل ەسىندە. گولليۆۋدتا تۇسىرىلگەن «روككي» ءفيلمىنىڭ باستى كەيىپكەرىنە اينالعان اقش-تىڭ ايتۋلى ازاماتى اسا اۋىر سالماقتا الەم چەمپيونى اتاندى. يتاليادان قونىس اۋدارعان ەميگرانتتار وتباسىنىڭ پەرزەنتى 49 باسەكەنىڭ التاۋىن عانا ۇپاي سانىمەن ۇتتى. قالعان كەزدەسۋلەردە ول قارسىلاستارىن تەگىستەي سۇلاتىپ سالدى. ۇلكەن سپورتتان قول ۇزگەننەن كەيىن مارچيانو بيزنەسپەن اينالىسىپ, باي-قۋاتتىلار قاتارىنا قوسىلدى. بىراق بەينەتتىڭ زەينەتىن ول كورە المادى. 1969 جىلدىڭ تامىز ايىنىڭ ەڭ سوڭعى كۇنى داڭقتى بوكسشى ءوزىنىڭ جەكە ۇشاعىمەن اپاتقا ۇشىراپ, ءجانتاسىلىم ەتتى. ال كەلەسى كۇنى, ياعني 1 قىركۇيەكتە روككي 46 جاسقا تولۋعا ءتيىس ەدى...
48 جاستاعى ۇلىبريتانيانىڭ وكىلى دجو كالزاگە 1993-2008 جىلدار ارالىعىندا ونەر كورسەتتى. ەكىنشى ورتا سالماقتا كۇش سىناسقان ول سول ارالىقتا 46 كەزدەسۋ وتكىزىپ, 32 قارسىلاسىن ايقىن باسىمدىقپەن ۇتتى. ونىڭ قۇرداسى سامسون داتچ بوي ءدجيمنىڭ دە جەڭىلگەن كەزى جوق. تايلاندتىق بوكسشى 43 جەكپە-جەكتىڭ 36-سىن نوكاۋتپەن اياقتادى.
مىنە, وزدەرىنىڭ سپورتتىق مانسابىن جەڭىلمەگەن كۇيى اياقتاعان ەڭ ۇزدىك بەس بوكسشى وسىلار. ارينە, قازىرگى كەزدە دە ءالى ەشكىمگە ەسە جىبەرمەي جۇرگەن كاسىپقوي رينگتىڭ حاس شەبەرلەرى جوق ەمەس. ماسەلەن, 34 جاستاعى تايلاند بوكسشىسى ۆاەنحونگ مەنايوتين 54 رەت جۇدىرىقتاسىپ, بارلىعىندا باسىمدىق تانىتتى. 18 ايقاستى مەرزىمىنەن بۇرىن اياقتادى. سوڭعى رەت ول بىلتىر كۇزدە وار وكىلى, الەمنىڭ ەكس-چەمپيونى سيمفيبە كونكونى جاقسىلاپ تۇرىپ ساباپ, ءالى بابىندا ەكەنىن بايقاتتى. بۇگىنگى تاڭداعى ەڭ جاقسى كورسەتكىش ازىرگە وسى بوكسشىعا تيەسىلى. دەسەك تە مەنايوتيننىڭ كارەراسى ءالى دە جالعاسۋدا. سول سەبەپتى دە ونى الداعى ۋاقىتتا نە كۇتىپ تۇرعانىن ايتۋ قيىن. ءبىر انىعى, ەشكىمگە ەسە جىبەرمەگەن كۇيى رينگپەن قوش ايتىسسا, وندا ۇزدىكتەر كوشىن ءداپ وسى جىگىت باستايدى.
