اۋىل شارۋاشىلىعى ءمينيسترى ساپارحان وماروۆ, پاۆلودار وبلىسىنىڭ اكىمى ابىلقايىر سقاقوۆ, قاراعاندى وبلىسىنىڭ اكىمى جەڭىس قاسىمبەك, سونداي-اق اگروبيزنەس وكىلدەرى بايانداما جاسادى.
مال شارۋاشىلىعىندا 4% دەڭگەيىندە تۇراقتى ءوسىم ساقتالۋدا. وسى جىلدىڭ سوڭىنا دەيىن سالانىڭ جالپى ءونىمىنىڭ كولەمىن 2,6 ترلن تەڭگەگە دەيىن, ءىرى قارا مال باسىن – 7,8 ملن باسقا دەيىن, ۇساق مال باسىن – 17,5 ملن باسقا دەيىن جەتكىزۋ جوسپارلانعان. 9 برويلەر قۇس فابريكاسى سالىنادى, ولار قوسىمشا 105 مىڭ توننا قۇس ەتىن وندىرەتىن بولادى. سونىمەن قاتار جۇمىس ىستەپ تۇرعان قۇس فابريكالارىندا ءوندىرىستى ۇلعايتۋ كوزدەلگەن. ەلىمىزدىڭ قاجەتتىلىگىن تولىق قامتاماسىز ەتۋگە باسىمدىق بەرىلەدى. جىل سايىن 25 ءسۇت-تاۋار فەرماسىن سالۋ 2025 جىلعا قاراي قايتا وڭدەلگەن ءسۇتتى 500 مىڭ تونناعا ۇلعايتۋ ەسەبىنەن ءوزىن-ءوزى تولىق قامتاماسىز ەتۋگە كوشۋگە مۇمكىندىك بەرەدى.
قازىرگى ۋاقىتتا مال شارۋاشىلىعى ونىمدەرىن قايتا وڭدەۋ سالاسىندا جوسپارلانعان جانە ىسكە اسىرىلىپ جاتقان ينۆەستيتسيالىق جوبالاردىڭ كولەمى 717 ملرد تەڭگەدەن اسادى.
«ۇكىمەت مال شارۋاشىلىعى ونىمدەرىنىڭ جەتكىلىكتى بولۋىنا جانە ەكسپورتتى ۇلعايتۋعا باسا نازار اۋداراتىن بولادى. ءىرى وڭدەۋشى كاسىپورىنداردىڭ اينالاسىندا, ونىڭ ىشىندە جەرگىلىكتى وندىرۋشىلەرگە ەكسپورتتىق پروتسەسكە قاتىسۋعا مۇمكىندىك بەرەتىن ترانسۇلتتىق كومپانيالار مەن ينۆەستورلاردىڭ قاتىسۋىمەن زاكىرلى كووپەراتسيا ەرەكشە باسىمدىقتا بولۋى ءتيىس», - دەدى ا. مامين.
ۇكىمەت باسشىسى ءساتتى مىسال رەتىندە تۇركىستان وبلىسىنداعى تۇيە ءسۇتىن وڭدەۋ زاۋىتىن كەلتىردى. ينۆەستوردىڭ شيكىزاتتى تارتىمدى باعامەن ساتىپ الۋىنىڭ ارقاسىندا سۇتكە سۇرانىس ارتىپ, تۇيە شارۋاشىلىعى قارقىندى دامي باستادى. ءبىر تۇيەنىڭ قۇنى ەل بويىنشا 2 ەسەگە ءوستى. سالا اسا تارتىمدى بولا باستادى.
پرەمەر-مينيستر اۋىل شارۋاشىلىعى مينيسترلىگىنە وسى باعىتتاعى ۇيلەستىرۋ جۇمىستارىن كۇشەيتۋدى تاپسىرا وتىرىپ, مال شارۋاشىلىعىنىڭ باسقا سالالارىندا دا وسىنداي كووپەراتسيانى دامىتۋ قاجەت ەكەنىن اتاپ ءوتتى.
ا. مامين ۇساق قارا مال باسىن كوبەيتۋگە ەرەكشە نازار اۋدارۋدىڭ قاجەتتىگىن, وتاندىق قۇس شارۋاشىلىعىن ودان ءارى كەڭەيتۋدىڭ جانە ءىرى قارا مال باسىن ارتتىرۋ بويىنشا جۇيەلى جۇمىستىڭ ماڭىزدىلىعىن اتاپ ءوتتى.
بۇدان وزگە, ۇكىمەت باسشىسى بۇگىندە استىق ەگەتىن 300 ءىرى جانە ورتاشا شارۋاشىلىقتاردى مال شارۋاشىلىعىنا تارتۋعا مۇمكىندىكتىڭ بار ەكەنىنە, مۇنىڭ ءوزى سالانى دامىتۋعا قوسىمشا سەرپىن بەرەتىنىنە توقتالدى.
سىرتقى نارىقتاردا ايتارلىقتاي سۇرانىسقا يە شوشقا ەتىن ءوندىرۋ — مال شارۋاشىلىعى ونىمدەرىنىڭ ەكسپورتىن ۇلعايتۋداعى پەرسپەكتيۆالى باعىت رەتىندە اتالدى.
«جالپى, مال شارۋاشىلىعى سالاسى تۇراقتى دامىپ كەلەدى. مەملەكەت بارلىق قولداۋ شارالارىن كورسەتىپ جاتىر», - دەپ ا. مامين, بارلىق العا قويىلعان مىندەتتەردى جۇزەگە اسىرۋدى تاپسىردى.
