وتكەن جىلى عانا اتالعان تۇرعىن ءۇي القابىندا بىرنەشە كوشە اسفالتتالعانىمەن, ونىڭ ساپاسى كوڭىل كونشىتپەيتىن دەڭگەيدە بولىپ تۇر. بيىل جەتى بىردەي كوشەدەگى جول جابىنى جەلىنىپ, جارىلا باستاعان. سونداي-اق اتالعان اۋدان تۇرعىندارى كەيبىر كارىز ليۋكتەردىڭ اسفالت استىندا قالعانىنا دا نارازىلىق تانىتۋدا.
جامبىل وبلىسىنىڭ اكىمى بەردىبەك ساپارباەۆ وسى ماسەلەگە وراي, «اراي» تۇرعىن ءۇي القابىنىڭ تۇرعىندارىمەن كەزدەستى. اكىم تۇرعىندارعا جاعدايدىڭ رەتتەلەتىنىن, شەشىمىن تاباتىنىن جەتكىزدى. مەردىگەرلەردىڭ جۇمىسىن سىنعا الدى. «قالا تۇرعىندارى جول جوندەۋ جۇمىستارىنىڭ بارىسىن مۇقيات قاداعالاپ وتىرادى. ەگەر ولقىلىقتاردى بايقاسا, ولاردى شەشۋگە تىرىسىپ, الەۋمەتتىك جەلىلەرگە جاريالايدى. بۇل ءبىزدىڭ قوعامدىق باقىلاۋىمىز. وسىلايشا ولار جۇمىس ساپاسى مەن مەردىگەرلەردىڭ ءىس-ارەكەتتەرىن باقىلاۋعا كومەكتەسەدى. سونىمەن بىرگە, تەحنيكالىق قاداعالاۋ, تۇرعىن ءۇي-كوممۋنالدىق شارۋاشىلىق ماماندارى نەعۇرلىم بەلسەندى جۇمىس ىستەپ, جۇمىس ساپاسىن ءتيىستى دەڭگەيدە قاداعالاۋدى قامتاماسىز ەتۋى كەرەك. مەردىگەرلەر ءوز كەزەگىندە, كەز-كەلگەن كەمشىلىكتەردىڭ ءوز ەسەبىنەن تۇزەتىلەتىنىن تۇسىنۋلەرى ءتيىس», دەدى بەردىبەك ساپارباەۆ.
سونىمەن قاتار بەردىبەك ساپارباەۆ تاراز قالاسىنداعى قويگەلدى, اباي, نيەتقاليەۆ, كومراتوۆ, سىپاتاي باتىر جانە باسقا دا كوشەلەردى ارالادى. مۇندا جىلۋ ماگيسترالىن قايتا جاڭارتۋعا بايلانىستى جول توسەمى بۇزىلعان بولاتىن. الايدا, جۇمىستار اياقتالعاننان كەيىن جول جابىنى ءتيىستى تۇردە قالپىنا كەلتىرىلمەگەن. «جولداردى قالپىنا كەلتىرۋ ساپاسى ناشار. مەردىگەردى جانە تەحنيكالىق قاداعالاۋشىلاردى شاقىرىپ, بارلىق ولقىلىقتاردى جويۋ ءۇشىن قاجەتتى شارالار قولدانۋ كەرەك. مۇنداي دەڭگەيدەگى جۇمىستاردى قابىلداۋ مۇمكىن ەمەس», دەدى ول. جالپى, «جۇمىسپەن قامتۋدىڭ جول كارتاسى» باعدارلاماسى اياسىندا وبلىس ورتالىعىندا جول قۇرىلىسى بويىنشا 100 جوبا جۇزەگە اسىرىلۋدا. ول بويىنشا تاراز قالاسىنىڭ 130 كوشەسى قامتىلادى. سونداي-اق, 88 شاقىرىم اۆتوجولدار مەن تروتۋارلار سالىنىپ, جوندەلەدى. بۇل جۇمىستارعا بارلىعى 3,3 ميلليارد تەڭگە بولىنگەن. جۇمىستىڭ باسىم بولىگى بۇعان دەيىن اسفالت توسەلمەگەن كوشەلەردە ورىندالادى. بيىلعى جىلى جوندەلمەگەن كوپتەگەن كوشەلەردە قيىرشىق تاس توسەۋ جوسپارلانۋدا. سونداي-اق اعىمداعى جىلى 163 كوپقاباتتى تۇرعىن ءۇيدىڭ اۋلاسى اباتتاندىرىلادى. اۋلالاردىڭ كوپشىلىگىندە جۇمىس قازىردىڭ وزىندە باستالىپ كەتتى. مەردىگەرلەر اسفالت توسەپ, پايدالانۋعا جارامسىز سۋارۋ ناۋالارىن اۋىستىرىپ, شاعىن ساۋلەتتىك فورمالار مەن ويىن الاڭدارىن ورناتۋدا.
جامبىل وبلىسى
