قوستانايلىق كاسىپكەر 83 ملن تەڭگە قازىنا قارجىسىن جىمقىرماق بولعان

ايماقتار • 22 مامىر، 2020

قوستانايلىق كاسىپكەر 83 ملن تەڭگە قازىنا قارجىسىن جىمقىرماق بولعان

76 رەت كورسەتىلدى

2019 جىلى رۋدنىي قالاسىنداعى جاڭا شاعىن اۋدانعا قۇنى 106،2 ملن تەڭگە تۇراتىن جىلۋ قازاندىعىن سالۋ ءۇشىن مەملەكەتتىك تاپسىرىس ۇتىپ العان «تەپلوەنەرگوستروي» سەرىكتەستىگى سىبايلاس جەمقورلىققا قارسى كۇرەس قىزمەتىنىڭ قىراعى نازارىنا ىلىكتى.

نۇرقانات قۇلاباەۆ

سەرىكتەستىك قازىنادان بولىنگەن قوماقتى قارجىعا «بوران بويلەر» كومپانياسىنان بلوكتى-ءمودۋلدى جىلۋ قۇرىلعىسىن ساتىپ الىپ، ونى جاڭا سالىنىپ جاتقان شاعىن اۋدانعا اكەلىپ، ورناتۋى ءتيىس ەكەن. الايدا «تەپلوەنەرگوستروي» باسشىسى ب. شەكتىباەۆ جوبالىق-سمەتالىق قۇجاتتى اينالىپ ءوتىپ، «بوران بويلەردى» مونتاج جۇمىستارى اياقتالعان سوڭ، نىساندى وتكىزەتىن كەزدە ورناتامىز دەگەن جەلەۋمەن، قىمبات تۇراتىن بلوكتى-ءمودۋلدى جىلۋ قۇرىلعىسىنىڭ ورنىنا قاراپايىم ستاتسيونارلىق جىلۋ قۇرىلعىسىن قويۋدى ۇيعارادى.

2019 جىلدىڭ قاراشا ايىنان باستاپ بۇعان سىبايلاس جەمقورلىققا قارسى كۇرەس قىزمەتى ارالاسا باستاعان. ناتيجەسىندە، جىلۋ قازاندىعىنىڭ قۇرىلىسىنا قاجەت قۇرىلعىنىڭ جەتكىزىلمەگەنى جانە مەردىگەردىڭ موينىنا جۇكتەلگەن جۇمىس اۋقىمىنىڭ تولىق ورىندالماعانى اشكەرەلەنىپ، مەملەكەتكە 83 ملن 698 400 تەڭگە زيان كەلگەنى انىقتالادى. كاسىپكەر العاشقىدا قازىنا قارجىسىن جىمقىرۋ تۋرالى وي ءۇش ۇيىقتاسا تۇسىنە كىرمەگەنىن ايتىپ اقتالعان. بىراق كەيىنىرەك ءوز ارەكەتىنىڭ زاڭعا قايشى ەكەنىن تۇسىنگەن ول مەملەكەتتىك ساتىپ الۋ كەلىسىمشارتىنىڭ تالاپتارىن تولىق ورىنداپ، قىمبات قۇرىلعىنى ساتىپ اكەلىپ ورناتقان.

سىبايلاس جەمقورلىققا قارسى كۇرەس قىزمەتىنىڭ ارالاسۋىمەن مەردىگەر مەملەكەتكە كەلتىرگەن زياننىڭ ورنىن تولتىردى. وسىلايشا، وبلىستىق بيۋدجەتتەن جىمقىرىلماق بولعان 83 ملن تەڭگەدەن استام قارجى ءوز ورنىنا قايتىپ كەلدى. ءبىزدىڭ باستى مىندەتىمىز – قۇقىق بۇزعانداردىڭ ءبارىن تەمىر توردىڭ ار جاعىنا توعىتا بەرۋ ەمەس. باستى ماقسات - ازاماتتاردىڭ قۇقىعى مەن ەركىندىگىن قورعاي وتىرىپ، قىلمىستىڭ الدىن الۋ. بۇل جولى مەملەكەت پەن ازاماتتىڭ، اتاپ ايتقاندا كاسىپكەردىڭ اراسىندا ساپالى ءارى تۇسىنىكتى اڭگىمە ءوربىپ، مەملەكەت قارجىسىنىڭ قىمقىرىلۋىنا جول بەرىلگەن جوق، - دەدى سىبايلاس جەمقورلىققا قارسى ءىس-قيمىل دەپارتامەنتى باسشىسىنىڭ ءبىرىنشى ورىنباسارى دانيار سماعۇلوۆ.

قوستاناي وبلىسى