ايماقتار • 25 مامىر، 2020

العاش رەت سوڭعى قوڭىراۋ ونلاين رەجيمدە وتەدى

1529 رەتكورسەتىلدى

25 مامىردا بارلىق مەكتەپتە وقۋ جىلى اياقتالادى. پاندەميا كەزىندە قاشىقتان وقۋ فورماتىنا بايلانىستى مەملەكەتتىك قورىتىندى ەمتيحاندار بولمايدى. جىلدىق قورىتىندى باعانى قويۋ ءۇشىن مەكتەپتەردە ءبولىم بويىنشا جيىنتىق باعالاۋ مەن توقساندىق جيىنتىق باعالاۋ جۇرگىزىلدى. بۇل تۋرالى نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا حابارلادى.

«بيىل مەكتەپ ءبىتىرۋ شارالارى «Birgemiz: تۇلەك – 2020» ۇرانىمەن وتەدى. 25 مامىردا ساعات 11:00-دە بارلىق مەكتەپتەردە اتا-انالار، قامقورلىق كەڭەسىنىڭ مۇشەلەرى، مەكتەپتىڭ ۇزدىك تۇلەكتەرى، بيزنەس وكىلدەرىنىڭ قاتىسۋىمەن 1-10 سىنىپتارعا ارنالعان ونلاين-سوڭعى قوڭىراۋ وتەدى. ءبىلىم جانە عىلىم ءمينيسترى اسحات ايماعامبەتوۆتىڭ قۇتتىقتاۋى بولادى»، - دەدى ش.قادىروۆا.

3 ماۋسىمدا مەكتەپتەردە 11 سىنىپ تۇلەكتەرىنە اتتەستات پەن «التىن بەلگى» تابىستاۋ سالتاناتى وتەدى. جيىن مەكتەپتىڭ اۋلاسىندا اشىق اسپان استىندا سانيتارلىق نورمالاردى ساقتاي وتىرىپ وتكىزىلەدى. تۇلەكتەرگە مەكتەپ فورماسىمەن قاتىسۋ تۋرالى ەسكەرتىلدى. سالتاناتتى جيىننان سوڭ «تۇلەكتەر اللەياسىندا» اعاش وتىرعىزۋ جوسپارلانۋدا.

«مەكتەپ اكىمشىلىگىنە مەيرامحانالار مەن ءدامحانالاردا مەكتەپ ءبىتىرۋ كەشىن وتكىزۋ كەزىندە قۇقىق بۇزۋشىلىققا جول بەرمەۋگە مىندەتتەلدى»، - دەدى باسقارما باسشىسى.

بۇعان دەيىن حابارلانعانداي، بيىل ەلوردا مەكتەپتەرىن 6 515 تۇلەك بىتىرەدى. ونىڭ 6 199-ى نەمەسە 95 % ۇبت تاپسىرۋعا ءوتىنىش ءبىلدىردى. ۇبت سانيتارلىق نورمالاردى ساقتاي وتىرىپ، 20 ماۋسىم مەن 5 شىلدە ارالىعىندا ۇيىمداستىرىلادى. تەست تاپسىرۋ ۋاقىتى 3 ساعات 50 مينۋت، ول ەكى بولىمنەن تۇرادى – ءۇش مىندەتتى ءپان (20 تاپسىرما) جانە بەيىندىك ءپان (30 تاپسىرما). بيىل ۇبت-دا 11 سىنىپتىڭ 4 توقسانىنىڭ باعدارلاماسىنان سۇراقتار بولمايدى.

«وسى ورايدا تۇلەكتەردىڭ اتا-انالارىنا ۇيلەرىندە قالۋىن سۇرايمىز، سوندا بالالاردىڭ دەنساۋلىعى مەن قاۋىپسىزدىگىن ساقتايتىن بولامىز. مەكتەپكە دەيىنگى ۇيىمدارداعى دايىندىق توبىنىڭ بالالارى 1 تامىزعا دەيىن بالاباقشاعا بارۋىن جالعاستىرادى. 1 ماۋسىمنان باستاپ بارلىق بالاباقشالار مەن قوسىمشا ءبىلىم بەرۋ ۇيىمدارىنىڭ جۇمىسىن شتاتتىق رەجيمدە قايتا جانداندىرۋ جوسپارلانۋدا»، - دەدى ول.

سوڭعى جاڭالىقتار

ۇقساس جاڭالىقتار