ءبىرىنشى بولىمدە 20 عاسىردىڭ جيىرماسىنشى جىلدارىنداعى ۋەزدىك رەۆوليۋتسيالىق كوميتەتتەر قورلارىنىڭ, اتقارۋشى كەڭەس جۇمىسشىلارىنىڭ, شارۋالارى مەن دەپۋتاتتارىنىڭ, كۋاگەرلەردىڭ ساياسي رەپرەسسيا جونىندەگى قۇجاتتارى ەنگىزىلگەن. سونداي-اق, ءدىني قىزمەتكەرلەر مەن مەشىتتەرگە قاتىستى جۇرگىزىلگەن ساياسي رەپرەسسيالىق شارالار جايىندا ءسوز ەتىلگەن ارحيۆ قۇجاتتارى دا باسىلعان.
– جيناقتىڭ ەكىنشى بولىمىندە, ۇلتتىق بەلگىگە قاراي رەپرەسسياعا ۇشىراعاندار جايلى جازىلعان. ولاردىڭ قاتارىندا پولياكتار, نەمىستەر, قاراشايلار, بولگارلار, شەشەندەر, ينگۋشتار مەن قىرىمدىق تاتارلار بار. بۇلاردىڭ بارلىعى وتانىن ساتقان دەپ ەسەپتەلىپ, جەر اۋدارىلعان. ءۇشىنشى بولىمدە «ستاليندىك رەپرەسسيا» جايىندا ارحيۆ قۇجاتتارى ەنگىزىلدى. ياعني, 30-50 جىلدارداعى ستالينيزمدىك ساياسي قۇرباندار جايىندا ءسوز ەتىلگەن. ال, ءتورتىنشى بولىمدە, قۋعىن-سۇرگىنگە ۇشىراعانداردان قالعان ەستەلىكتەر, جەكە حاتتار, كۇندەلىكتەر مەن فوتوسۋرەتتەر ەنگىزىلگەن,–دەيدى وبلىستىق مەملەكەتتىك ءارحيۆتىڭ ءبولىم جەتەكشىسى نازيرا يسەنوۆا.
20-شى عاسىردىڭ قاسىرەتتى وقيعاسىن راستايتىن جيناقتاعى بۇل قۇندى قۇجاتتار بۇگىندە ءوڭىر تاريحشىلارى مەن زەرتتەۋشىلەرى ءۇشىن قولجەتىمدى. سونداي-اق, جاڭا كىتاپ تاريحتا ءىزى قالعان «اقتاڭداقتار» جايلى بىلگىسى كەلەتىن قالىڭ وقىرمانعا دا ارنالادى.
