الەم • 20 مامىر، 2020

شەتەلدىك باق-قا شولۋ: ستراتەگيالىق قۇجاتتىڭ كەمشىن تۇسى بار

59 رەت كورسەتىلدى

مەملەكەت باسشىسى قاسىم-جومارت توقاەۆ جوعارى ەۋرازيالىق ەكونوميكالىق كەڭەستىڭ وتىرىسىنا قاتىسقانى ءمالىم. اتالعان ونلاين جيىن بارىسىندا 2025 جىلعا دەيىنگى ەۋرازيالىق ەكونوميكالىق ينتەگراتسيانىڭ ستراتەگيالىق دامۋى تالقىلاندى. پرەزيدەنت وسى قۇجاتتىڭ كەي ءبولىمىن قايتا تالقىلاپ، ءالى دە پىسىقتاي ءتۇسۋ كەرەكتىگىنە نازار اۋدارعان. ق.توقاەۆتىڭ وسى ۇسىنىسى بۇقارالىق اقپارات قۇرالدارىندا كەڭىنەن ايتىلدى.

تاسس اگەنتتىگى «قازاق پرەزيدەنتى ەاەو-داعى ارىپتەستەرىن داعدارىستان كەيىنگى كەزەڭگە دايىندالۋعا شاقىردى» دەپ اقپارات تاراتتى.  اتالعان باق-تىڭ حابارلاۋىنشا، ق.توقاەۆ ارىپتەستەرىن پاندەميا داعدارىسىنان كەيىنگى كەزەڭگە دايىندالۋعا شاقىرعان.

«قاسىم-جومارت توقاەۆ بيزنەستى قولداۋ ماسەلەسىنە دە ەرەكشە نازار اۋداردى. پرەزيدەنت قازىرگىدەي داعدارىس كەزەڭىندە ەۋرازيالىق ەكونوميكالىق وداققا مۇشە مەملەكەتتەردىڭ بارلىق رەسۋرسى جۇمىس ورىندارىن تۇراقتاندىرۋعا جانە ساقتاپ قالۋعا باعىتتالعانىن ايتتى. سونىمەن قاتار مەملەكەت باسشىسى وداقتىڭ شىعىنى كوپ جەكەلەگەن شەشىمدەرىن ورىنداۋ، اتاپ ايتقاندا، قازىرگى داعدارىس جاعدايىندا كەيبىر تاۋار تۇرلەرىن مىندەتتى تۇردە تاڭبالاۋ اسا قاجەت ەمەس دەپ ەسەپتەيدى»، دەيدى تاسس.

8989

TimeTurk اگەنتتىگى قازاقستان پرەزيدەنتىنىڭ ءوزارا ساۋدا، بيزنەستى قولداۋ، تسيفرلاندىرۋ جانە كولىكتىك لوگيستيكا سالالارىنداعى ىقپالداستىق ماسەلەلەرىن ودان ءارى نىعايتۋ جونىندەگى ناقتى ۇسىنىستارىن ورتاعا سالۋ جونىندەگى سوزىنە ەكپىن بەرگەن.

«توقاەۆ ءوزارا ساۋدا، بيزنەستى قولداۋ، تسيفرلاندىرۋ جانە كولىكتىك لوگيستيكا سالالارىنداعى ىقپالداستىق ماسەلەلەرىن ودان ءارى نىعايتۋ جونىندەگى ناقتى ۇسىنىستارىن ورتاعا سالدى.

الىپ گەوگرافيالىق اۋماقتى الىپ جاتقان ەاەو-عا مۇشە مەملەكەتتەردە كولىكتىك لوگيستيكانى دامىتۋعا نازار اۋدارعان پرەزيدەنت توقاەۆ «اتالعان باستاما اياسىندا ءبىز ۇلتتىق تاۋار وتكىزۋ جۇيەسىن قۇرۋدى باستاپ كەتتىك. ول 2022 جىلعا قاراي 24 كوتەرمە-تاراتۋ ورتالىعىنان تۇراتىن بولادى. بۇل 5 ميلليون توننا اۋىل شارۋاشىلىق ءونىمىن ساقتاپ، وڭدەپ، تاراتۋعا مۇمكىندىك بەرەدى»، دەدى.

سونداي-اق پرەزيدەنت توقاەۆ وداققا مۇشە مۇددەلى ەلدەردىڭ اراسىندا تاۋار تاراتۋدىڭ ورتاق جۇيەسىن قۇرۋ مۇمكىندىگىن قاراستىرۋدى ۇسىندى»، دەپ حابارلادى TimeTurk اگەنتتىگى.

9889

Fergana agency مەملەكەت باسشىسى ق.توقاەۆتىڭ ەۋرازيالىق ينتەگراتسيانى توقتاتا تۇرۋ تۋرالى ايتقان سوزىنە نازار اۋدارعان.

«قازاقستان پرەزيدەنتى قاسىم-جومارت توقاەۆ جوعارى ەۋرازيالىق ەكونوميكالىق كەڭەستىڭ وتىرىسىندا ەۋرازيالىق ەكونوميكالىق ينتەگراتسيانىڭ ستراتەگيالىق دامۋى قۇجاتىن ءالى دە تالقىلاۋ قاجەت ەكەنىن ايتتى

توقاەۆ اتالعان قۇجاتتى وداققا مۇشە مەملەكەتتەر باسشىلارىمەن بەتپە-بەت كەزدەسكەن سوڭ عانا قابىلداۋ دۇرىس دەپ ەسەپتەيتىنىن جەتكىزدى. «جالپى، بۇل ماڭىزدى قۇجاتتى قابىلداۋ يدەياسىن قولدايمىن، بىراق ستراتەگيانىڭ كەيبىر بولىمدەرىن قايتا تالقىلاپ، ءالى دە پىسىقتاي ءتۇسۋ كەرەك»، دەپ اتاپ ءوتتى.

سونداي-اق قاسىم-جومارت توقاەۆ ءبىرىنشى كەزەكتە تاۋارلاردىڭ كەدەرگىسىز ءارى شەكتەۋسىز تاسىمالىن ءىس-جۇزىندە قامتاماسىز ەتۋ، سەكتورلار بويىنشا تاراپتارمەن كەلىسىلگەن بىرىڭعاي قىزمەت كورسەتۋ نارىعىن كەزەڭ-كەزەڭىمەن قۇرۋ، ورتاق ەنەرگەتيكالىق جانە قارجى نارىعىنا دايىندالۋ قاجەتتىگىن اتاپ كورسەتتى.

بىرنەشە كۇن بۇرىن ەۋرزايالىق ەكونوميكالىق كوميسسيا وكىلى ەۋرازيالىق ەكونوميكالىق ينتەگراتسيانىڭ ستراتەگيالىق دامۋى قۇجاتى قابىلدانعانىن مالىمدەگەن. ق.توقاەۆ ونى ورىنسىز ەكەنىن ايتتى»، دەيدى Fergana agency.

8

EADaily سايتىنىڭ حابارلاۋىنشا، قاسىم-جومارت توقاەۆ جيىن بارىسىندا دەنساۋلىق ساقتاۋ، ءبىلىم جانە عىلىم سالالارى ەۋرازيالىق ەكونوميكالىق كوميسسيانىڭ قۇزىرەتىنە كىرمەۋى ءتيىس ەكەنىنە نازار اۋدارعان.

«دەنساۋلىق ساقتاۋ، ءبىلىم جانە عىلىم سالالارىن ەۋرازيالىق ەكونوميكالىق كوميسسيانىڭ قۇزىرەتىنە تولىق كولەمدە بەرۋ، ونىڭ ەكونوميكالىق باعىتىن ايتارلىقتاي وزگەرتىپ جىبەرۋى مۇمكىن. ياعني، 2015 جىلعى ەۋرازيالىق ەكونوميكالىق وداق قۇرۋ تۋرالى كەلىسىمنىڭ مانىنە قايشى كەلەدى، دەدى قاسىم-جومارت توقاەۆ.

9

قاسىم-جومارت توقاەۆ ەۋرازيالىق ەكونوميكالىق كوميسسيانىڭ وكىلەتتىگىن كەڭەيتۋ ماسەلەلەرىنە مۇقيات بولۋعا شاقىردى. سونداي-اق ەۋرازيالىق ەكونوميكالىق وداققا مۇشە-مەملەكەتتەردىڭ قىزمەت كورسەتۋ، ءوزارا ساۋدا ماسەلەلەرى بويىنشا ءۇشىنشى ەلمەن وتكىزەتىن ەكىجاقتى كەلىسسوزدەرىنە كوميسسيانىڭ قاتىسۋ قۇقىعىنا كەلىسپەيتىنىن جەتكىزدى»، دەيدى EADaily سايتى.

 

شولۋدى دايىنداعان،

اباي اسانكەلدى ۇلى،

Egemen Qazaqstan

 

 

 

سوڭعى جاڭالىقتار

ۇقساس جاڭالىقتار