زاڭ جوباسىندا تالقىلاۋ بارىسىندا ءماجىلىس توراعاسى نۇرلان نىعماتۋلين دەپۋتاتتاردىڭ زاڭ شىعارۋشىلىلىق جۇمىسىنا باسا نازار اۋداردى.
– ءبىز دەپۋتاتتارىمىزدىڭ باستاماسىمەن ازىرلەنگەن تاعى ءبىر زاڭ جوباسىن ماقۇلدادىق. ەرەكشە ايتۋ كەرەك, ءبىزدىڭ دەپۋتاتتاردىڭ زاڭ شىعارۋ باستاماشىلىعى وسى سەسسيادا وتە جوعارى. مىسالى, 41 زاڭ جوباسىنا دەپۋتاتتار وزدەرى باستاماشى بولدى. الدىمىزدا تاعى دا ون شاقتى زاڭ جوباسى بار, – دەدى نۇرلان نىعماتۋلين.
ماقۇلدانعان قۇجاتتا ۇكىمەتكە حالىقارالىق تاسىمالداردى قاداعالاپ وتىرۋ جۇيەسىنىڭ ۇلتتىق وپەراتورىن ايقىنداۋ بويىنشا قۇزىرەتتىلىك بەرۋ ۇسىنىلادى. سونىمەن قاتار حالىقارالىق اۆتوموبيل تاسىمالدارىن جۇزەگە اسىرۋ كەزىندە ەلەكتروندىق سايكەستەندىرگىشتەردى (ناۆيگاتسيالىق پلومبالاردى) پايدالانۋ بولىگىندە تاسىمالداۋشىلارعا قويىلاتىن تالاپتاردى بەلگىلەۋ قاراستىرىلعان.
وسىلاردىڭ قاتارىندا ەلەكتروندىق سايكەستەندىرگىشتەردى قاساقانا بۇلدىرگەنى نەمەسە جويعانى ءۇشىن اكىمشىلىك جاۋاپتىلىقتى ەنگىزۋ جانە ەلەكتروندىق سايكەستەندىرگىشتەردى پايدالانۋ ءتارتىبىن سالىق جانە بيۋدجەتكە تولەنەتىن باسقا دا مىندەتتى تولەمدەردىڭ ءتۇسۋىن قامتاماسىز ەتۋ سالاسىندا باسشىلىقتى جۇزەگە اسىراتىن ۋاكىلەتتى ورگاننىڭ بەكىتۋى كوزدەلەدى.
