«كۇمىستىڭ ماڭگىلىك ساۋلەسى» ۆيرتۋالدى كورمەسىنىڭ ءاربىر بۇيىمى شىعۋ تەگىنىڭ گەوگرافياسىن, ءتۇرلى دايىنداۋ تەحنيكاسىن, ءپىشىنىن كورسەتەدى, الەمنىڭ بەلگىلى ءبىر حالقىنا ءتان اشەكەيدىڭ ءداستۇرلى تاسىلدەرىن تەرەڭ تۇسىنۋگە جانە زەردەلەۋگە مۇمكىندىك بەرەدى. ويتكەنى كوپتەگەن حالىقتار مادەنيەتىندە كۇمىس ايرىقشا ورىن الادى. كورمە جادىگەرلەرى قولدانىلۋ ماقساتىنا قاراي توپتاستىرىلىپ, كوپتەگەن ەلدەر مەن حالىقتىڭ ساندىك-قولدانبالى جانە زەرگەرلىك ونەر تەحنيكاسى مەن تاسىلدەرى جونىندە اقپاراتپەن تولىقتىرىلعان.
كورمە سەگىز تاراۋدان تۇرادى, وندا: اسحانالىق كۇمىستەر, شايعا ارنالعان جيىنتىقتار, قۇمعاندار, ساندىك تارەلكەلەر, قۇمىرالار, مۇسىندەر, قوبديشالار جانە جازۋعا ارنالعان سان الۋان زاتتار بار. مىسالى, ماريا تەرەزە پاتشايىمنىڭ پورترەتى بار كۇمىس تاباقشالاردى اۋستريا پرەزيدەنتى ت.كلەستيلدەن 1999 جىلى 1 شىلدەدە تارتۋ ەتكەن. ال ۋكراينا دەلەگاتسياسىنىڭ «سيايۆو» شارابىنا ارنالعان جيىنتىعى, ءۇندىستاننىڭ توتەنشە جانە وكىلەتتى ەلشىسى سىيلاعان كۇمىس قۇمعانى مەن شاي سەرۆيزى بىرەگەي دە قايتالانباس ونەر تۋىندىلارى دەۋگە بولاتىنداي. زەرگەرلەردىڭ قولىنان شىققان بۇيىمدار وزگەشە ءبىر دارالىق مانەرىمەن, اسەمدىگىمەن ەرەكشەلەنەدى.
كوپشىلىك نازارىنا ۇسىنىلعان ەكسپوزيتسيالار رەسپۋبليكانىڭ ەگەمەن مەملەكەت رەتىندە قالىپتاسۋىنان باستاپ وسى كۇنگە دەيىنگى ەلىمىزدىڭ جاڭا تاريحىنان سىر شەرتىپ, ونىڭ تۇڭعىش پرەزيدەنتى ن.ءا.نازارباەۆتىڭ تاۋەلسىز دەموكراتيالىق مەملەكەت قۇرۋداعى تاريحي ءرولىن جان-جاقتى تانىستىرادى.
قازىر ەلباسى كىتاپحاناسىنىڭ مۋزەيىندە الەمنىڭ 50-دەن استام ەلى تارتۋ ەتكەن 11 مىڭنان استام جادىگەر ساقتاۋلى.
«كۇمىستىڭ ماڭگىلىك ساۋلەسى» ۆيرتۋالدى كورمەسىن presidentlibrary.kz ەلباسى كىتاپحاناسىنىڭ سايتىنان تاماشالاۋعا بولادى.
