جوبانىڭ نەگىزگى ماقساتى – وتكەننىڭ تاريحي-مادەني مۇراسىن ساقتاۋ جانە كوپشىلىككە تاراتۋ ماسەلەلەرىن وزەكتەندىرۋ, مۋزەيدىڭ الەۋەتىن تانىتۋ جانە كەلۋشىلەردى, اسىرەسە جاستار ءۇشىن وزىندىك دامۋ مەن ءوزىن ءوزى كورسەتۋدىڭ جاڭا مادەني-زياتكەرلىك مۇمكىندىكتەرىن ارتتىرۋدى كوزدەيدى. داستۇرگە اينالعان تاعىلىمدى شارا مۋزەيدىڭ ماڭىزدىلىعىن ارتتىرۋعا, تاريحي جانە وتباسىلىق قۇندىلىقتاردى تانىمال ەتۋگە, وسكەلەڭ ۇرپاققا پاتريوتتىق, ادامگەرشىلىك تاربيە بەرۋگە باعىتتالعان. ءىس-شارا ەڭ الدىمەن, جاستاردىڭ جاڭاشىل يدەيالارى مەن باستامالارىن قولداۋعا باعىتتالعان.
– بارشاڭىزدى بۇگىنگى حالىقارالىق مۋزەيلەر كۇنى مەرەكەسىمەن شىن جۇرەكتەن قۇتتىقتايمىن. ايتۋلى مەرەكە جىل سايىن ءبىزدىڭ ەلىمىزدە عانا ەمەس, دۇنيە ءجۇزى بويىنشا بارلىق مۋزەيلەردە كەڭ كولەمدە اتاپ وتىلەدى. بيىلعى «مۋزەي ءتۇنى» مەرەكەسى ونلاين فورماتقا اۋىسىپ وتىر. حالىقارالىق مۋزەي كۇنى مەرەكەسى 1977 جىلى حالىقارالىق مۋزەيلەر كەڭەسىنىڭ باس كونفەرەنتسياسىندا بەكىتىلگەن. «مۋزەيلەر ءتۇنى» اكتسياسى ۇلتتىق مۋزەيدە جىل سايىن ءداستۇرلى تۇردە ۇيىمداستىرىلىپ كەلەدى. العاش رەت 2015 جىلى ۇيىمداستىرىلىپ, كوپشىلىك تاراپىنان ۇلكەن قولداۋ تاپتى. بۇل شارا تەك حالىقارالىق مۋزەيلەر كۇنى مەرەكەسىندە ەمەس, ۇلتتىق مۋزەي باستاماسىمەن «ناۋرىز» مەرەكەسىنە وراي «ناۋرىز – جاڭعىرۋ نىشانى» دەگەن تاقىرىپپەن دە ۇيىمداستىرىلىپ ءجۇر, دەدى ۇلتتىق مۋزەي ديرەكتورى ارىستانبەك مۇحامەدي ۇلى.
