قازاقستان • 18 مامىر، 2020

بالالارعا بازارلىق بايقاۋى مارەگە جەتتى

93 رەت كورسەتىلدى

ەلىمىزدە توتەنشە جاعداي جاريالانعالى بەرى ءساۋىر ايىنان باستاپ كۇن سايىن Egemen TV ارناسى «بالالارعا بازارلىق» ايدارىمەن ەرتەگى ۇسىنىپ كەلدى. وسى رەتتە بالالار اراسىندا ەرتەگى تىڭداۋ جانە ايتۋ ءداستۇرىن جاڭعىرتۋ ماقساتىندا ەل گازەتى «Egemen Qazaqstan» ارنايى ونلاين-بايقاۋ جاريالاعان بولاتىن.

بايقاۋعا قاتىسۋعا ەلىمىزدىڭ تۇكپىر-تۇكپىرىنەن وتىنىشتەر كەلىپ ءتۇستى. بارلىعى 26 بالا قاتىستى. ولار تۇرمىس-سالت، ادەت-عۇرىپ، دۇنيەتانىم كوزقاراسىن ساقتاۋعا، ادالدىققا، ەڭبەككە ۇندەگەن قازاق حالىق ەرتەگىسىنەن باستاپ، الەم ەرتەگىلەرىن ناقىشىنا كەلتىرە ايتىپ بەردى. قاتىسۋشىلار اراسىنداعى ەڭ كىشكەنتاي الماتىلىق 2 جاسار ۇمىتكەر سالتانات نۇرباقىت تا ءوز باعىن سىناپ كوردى. ەرتەگىنى مزمۇنداپ قانا قويماي، سان-الۋان ساحنالىق كورىنىستەر ارقىلى جەتكىزگەن تالاپتى بالاقايلاردىڭ ۆيدەو-مونتاج جۇمىستارى ءۇشىن دە از ەڭبەكتەنبەگەنى بايقالادى.

رەداكتسيا القاسى قاتىسۋشى بالالاردىڭ وي-ءورىسىن، سوزدىك قورىن، تانىمدىق-شىعارماشىلىق قابىلەتتەرى مەن جۇمىستاردىڭ كورنەكىلىگىن باعالاي كەلە ۇزدىك جەڭىمپازداردى انىقتادى.

الماتىلىق ءلايلا دۇيسەنالى (5 جاستا) جانە جامبىل وبلىسى، تالاس اۋدانى، ويىق اۋىلىنداعى د.قوناەۆ اتىنداعى ورتا مەكتەبىنىڭ 2-سىنىپ وقۋشىسى ارايلىم مەيرامبەك، نۇر-سۇلتان قالاسى، ب.مايلين اتىنداعى №52 مەكتەپ-گيمنازياسىنىڭ 2-سىنىپ وقۋشىسى ەردوس تولەگەنوۆتىڭ جۇمىسى ءبىرىنشى ورىنعا يە بولدى. ال سەمەي قالاسى، №37 گيمنازياسىنىڭ 1-سىنىپ وقۋشىسى ەلنازار جاقىشەۆ، اقتوبە قالاسى، م.ماقاتاەۆ اتىنداعى №73 مەكتەبىنىڭ 2-سىنىپ وقۋشىسى جانەركە جولامان،  ماڭعىستاۋ وبلىسى، بەينەۋ اۋدانى ج.قالدىقاراەۆ اتىنداعى ورتا مەكتەبىنىڭ 2-سىنىپ وقۋشىسى ابىلايحان اسقار جوعارى شىعارماشىلىق ىزدەنىستەرى ءۇشىن ەكىنشى ورىنعا لايىق دەپ تانىلدى. شىمكەنت قالاسى، №83 مەكتەبىنىڭ 1-سىنىپ وقۋشىسى نۇرمۇحاممەد قاراقۇل، جامبىل وبلىسى، تالاس اۋدانى، ويىق اۋىلى، د.قوناەۆ اتىنداعى ورتا مەكتەبىنىڭ 1-سىنىپ وقۋشىسى اسلانبەك مەيرامبەك بەلسەندى قاتىسقانى ءۇشىن جۇلدەلى ءۇشىنشى ورىننان كورىندى. جەڭىمپازدارعا «Egemen Qazaqstan» گازەتى  الەمنىڭ زاماناۋي كلاسسيكاسىنا اينالعان تاماشا ەرتەگىلەر توپتاماسىن تارتۋ ەتىپ، ديپلوممەن ماراپاتتايدى. ەرتەگى ايتۋ ءداسۇرىن جاڭعىرتۋعا ۇلەس قوسىپ، جان-جاقتى دايىندىعىمەن كوزگە تۇسكەن وزگە دە قاتىسۋشى بالدىرعاندارعا ارنايى ىنتالاندىرۋ سىيلىقتارى تاپسىرىلادى.

قازاق راديوسىنداعى «ەردەن اتانىڭ ەرتەگىلەرى»، «زامزاگۇل اجەنىڭ ەرتەگىلەرى»، «كەشكى ەرتەگىلەر» دەگەن اتپەن ءۇزىلىسسىز بەرىلىپ تۇراتىن ىزگىلىكتى ءداستۇردىڭ جالعاسىنداي بولعان جوبا از ۋاقىتتا ءوز تىڭدارماندارىن تاۋىپ ۇلگەردى. «بالالارعا بازارلىق» ەرتەگىلەر توپتاماسىن «Egemen Qazaqstan» گازەتىنىڭ YouTube ارناسىنان كۇن سايىن تىڭداي الاسىزدار.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • 10 شىلدە، 2020

پنەۆمونياعا باسقا اتاۋ بەرىلۋى مۇمكىن

كوروناۆيرۋس • 10 شىلدە، 2020

كوروناۆيرۋس ىندەتى 3 كەزەڭنەن تۇرادى

كوروناۆيرۋس • 10 شىلدە، 2020

ۇقساس جاڭالىقتار