پاكستاندا 7,4 باللدىق جەر سىلكىنىسى تىركەلدى. بۇل تۋرالى ريا «نوۆوستي» اگەنتتىگى حابارلادى.
ءزىلزالا پاكستاننىڭ بەلۋجيستان پروۆينتسياسىنا قاراستى اۆاران قالاسىنان سولتۇستىك-شىعىسقا قاراي 69 شاقىرىم قاشىقتىقتا ورىن العان. جەر سىلكىنىسىنىڭ وشاعى 22,9 شاقىرىم تەرەڭدىكتە بولعان.
بۇگىنگە دەيىن جەتكەن مالىمەتكە قاراعاندا, ءزىلزالادان 200 ادام كوز جۇمعان. ونىڭ 145-ءى اۆاران قالاسىنىڭ, 55-ءى مءاشكاي ەلدى مەكەنىنىڭ تۇرعىندارى. بۇعان قوسا, 400-گە جۋىق ادام ءتۇرلى دەڭگەيدە جاراقات العان. سونداي-اق, اۆاران قالاسى ماڭىنداعى ۇيلەردىڭ 30 پايىزى قيراعان. بەلۋجيستان پروۆينتسياسىنىڭ باس ءمينيسترى ابدۋل بالودج ايماققا توتەنشە جاعداي جاريالادى.
جەر سىلكىنىسىنەن زارداپ شەككەندەرگە كومەك بەرۋگە شەكاراشىلار مەن اسكەريلەر جۇمىلدىرىلدى.
جولدىباي بازار.
