وبلىس اكىمى ايماقتا كوروناۆيرۋستىڭ تارالۋىنا جول بەرمەۋ بويىنشا بارلىق شارالار قابىلدانىپ جاتقانىن اتاپ ءوتتى.
قوستاناي وبلىسىندا 15 مامىر ساعات 10.00-دەگى جاعداي بويىنشا COVID-19 جۇقتىرعان 72 ادام تىركەلىپ, 36 ادام ساۋىعىپ شىققان. قاتەرلى ىندەتتەن 1 ادام كوز جۇمدى.
جەدەل شتاب ەلىمىزدىڭ باس سانيتارلىق دارىگەرىنىڭ ۇسىنىستارى مەن قالىپتاسقان ەپيدەميولوگيالىق اھۋالدى ەسكەرە وتىرىپ, ايماقتا بىرقاتار جەڭىلدىكتەردى ەنگىزۋ تۋرالى شەشىم قابىلدادى. سونىمەن, تۇرعىندار 18 مامىردان باستاپ ۇيىنەن كوشەگە ەركىن شىعا الادى. بىراق 2 جانە ودان كوپ ادام بىرگە جۇرگەن جاعدايدا بەتپەردە تاعۋ كەرەك بولادى. سونىمەن قاتار, ساياباقتارعا, وزەن جاعالاۋلارىنا سەرۋەندەۋگە بولادى. الايدا بىرنەشە ادام بىرگە جۇرگەن جاعدايدا قاۋىپسىز ارا قاشىقتىق ساقتالۋ كەرەك.
جەدەل شتاب وتىرىسىندا, سونداي-اق, ساۋدا ورىندارى مەن باسقا دا مەكەمەلەردىڭ جۇمىس ىستەۋ ءتارتىبى بىلايشا ناقتىلاندى:
- اۋدانى 2 مىڭ ش/مەتردەن اسپايتىن ساۋدا ورىندارى مەن ازىق-ت ۇلىك جانە وزگە دە تاۋارلاردى ساتاتىن بازارلار ساعات 10:00-دەن 17:00-گە دەيىن جۇمىس ىستەيدى;
- سۇلۋلىق سالوندارىنىڭ كليەنتتەرى قىزمەت كورسەتۋ عيماراتىنا بەتپەردەمەن كىرۋى ءتيىس جانە الدىن الا تىركەلۋى كەرەك;
- باسپاحانا, تىگىن تسەحتارى, اياق كيىم جوندەۋ ورىندارى سياقتى حالىققا قىزمەت كورسەتۋ نىساندارىنىڭ جۇمىسى جاندانادى;
- مونشالار مەن ساۋنالار جۇمىس ىستەيدى. بىراق باسسەينگە تۇسۋگە بولمايدى جانە ادام سانى 20-دان اسپاۋى شارت;
- مەكتەپكە دەيىنگى تاربيە بەرۋ ۇيىمدارىندا كەزەكشى توپتار جۇمىس ىستەيدى;
- اشىق اۋادا سپورتتىق جاتتىعۋلار جاساۋعا بولادى;
- قوعامدىق كولىكتەر قالا ىشىندە ساعات 7.00-دەن 20.00-گە دەيىن, ال ساياجايلارعا باراتىن اۆتوبۋستار ساعات 7.00-دەن 21.00-گە دەيىن جۇرەدى.
- سانيتارلىق تالاپتار ەسكەرىلە وتىرىپ, مەملەكەتتىك ورگانداردىڭ (ۇيىمداردىڭ), كەڭسەلەردىڭ قىزمەتىنە رۇقسات ەتىلەدى.
الايدا بۇل جەڭىلدىكتەردىڭ جىتىقارا اۋدانىنا قاتىسى جوق. جىتىقارادا كارانتين رەجىمى 25 مامىرعا دەيىن ساقتالادى.
قوستاناي وبلىسى
