قوعام • 15 مامىر، 2020

ەلوردادا تج رەجيمىنەن كەيىن قوعامدىق كولىكتىڭ جۇمىسى جاندانا باستادى

16 رەت كورسەتىلدى

ەلوردا اكىمدىگى جەلىگە 530 اۆتوبۋستىڭ شىققانىن حابارلادى.

بۇعان دەيىن 12 مامىردان باستاپ ساعات 07:00-دەن 21:00 ارالىعىندا قالاداعى قوعامدىق كولىك جۇمىسىن قايتا باستادى.

العاشقى كۇنى قوعامدىق كولىكتى 146 907 جولاۋشى پايدالاندى، ونىڭ 2 787 وقۋشى، 36 884 الەۋمەتتىك جەڭىلدىككە يە ازاماتتار.

13 مامىردا جولاۋشىلار لەگى 205 295 كورسەتتى، ونىڭ ىشىندە 48 418 جەڭىلدىككە يە ادامدار بولسا، 3 686 وقۋشى بار. كارانتين ەنگىزىلگەنگە دەيىن جولاۋشىلار لەگى كۇنىنە 762 مىڭ ادام بولاتىن.

«بۇگىن جەلىدە بارلىق قالالىق باعدارلار ءجۇرىپ جاتىر. قالا اۋماعىنا قاتىنايتىن باعدارلار ەكىنشى كەزەڭدە جۇرەتىن بولادى، ول تۋرالى قوسىمشا حابارلايمىز»، - دەدى City Transportation Systems (CTS) كومپانياسىنىڭ باسقارما توراعاسى بەكمىرزا يگەنبەردينوۆ.

قوعامدىق كولىكتەر جۇمىسىن باستاعان العاشقى كۇنى جەلىگە 450 اۆتوبۋس شىقتى. ال 13 مامىردا – 490، 14 مامىردا – 530 اۆتوبۋس. كارانتينگە دەيىن جەلىدەگى اۆتوبۋستاردىڭ سانى 872 ەدى.

«بارلىق اۆتوبۋستار بۇرىنعىداي دەزينفەكتسيالانادى. اۆتوبۋس جۇرگىزۋشىلەرى قاۋىپسىزدىك شارالارىن ساقتايدى: ماسكا مەن قولعاپ كيىپ، انتيسەپتيك پايدالانادى. سونداي-اق سانيتارلىق نورمالاردى جولاۋشىلار دا ساقتاۋى ءتيىس. قازىر جۇرگىزۋشىلەرگە قويىلىپ وتىرعان تالاپ – اۆتوبۋستا جولاۋشىلار جۇكتەمەسى 50%-دان اسپاۋى كەرەك. باسقا ۋاقىتتا اۆتوبۋستارعا تۇسەتىن ورتاشا جۇكتەمە 15% قۇرايدى، ال جۇمىسقا باراتىن جانە قايتاتىن ساتتە، ياعني قاربالاس كەزىندە بۇل تالاپتار ورىندالا بەرمەيدى»، - دەدى يگەنبەردينوۆ.

بۇدان بولەك، قوعامدىق كولىكتە جول اقىسىن قولما-قول اقشاسىز تولەۋ كەرەك. ول ءۇشىن كولىك كارتاسىن نەمەسە باسقا دا بالاما ادىستەرىن:  SMS، QR-كود جانە ءموبيلدى قوسىمشانى پايدالانۋعا بولادى. ايتا كەتەيىك، كارانتينگە دەيىن اۆتوبۋستارداعى قولما-قول اقشاسىز تولەم 98% قۇرادى.

«كارانتين كەزىندە الىنعان ايلىق جولاقى بيلەتى اۆتوماتتى تۇردە پايدالانۋشىلاردىڭ كولىك كارتاسىنا اۋىستىرىلدى. جولاقى  12 مامىردان 11 ماۋسىمعا دەيىن جارامدى»، - دەدى باسقارما توراعاسى.

ەسكە سالا كەتەيىك، بيىل 28 ناۋرىزدان باستاپ قوسىمشا تاريفتىك جوسپار ىسكە قوسىلدى. 18 جاسقا تولعان بالالار كولىك كارتاسى بولسا قالانىڭ قوعامدىق كولىكتەرىندە تەگىن قاتىناي الادى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • 10 شىلدە، 2020

پنەۆمونياعا باسقا اتاۋ بەرىلۋى مۇمكىن

كوروناۆيرۋس • 10 شىلدە، 2020

كوروناۆيرۋس ىندەتى 3 كەزەڭنەن تۇرادى

كوروناۆيرۋس • 10 شىلدە، 2020

ۇقساس جاڭالىقتار