سۋرەتتى تۇسىرگەن ەرلان ومار, EQ
Astana Hub ەكى جىلدان بەرى كاسىپكەرلەر مەن مەملەكەت اراسىنداعى بايلانىستى نىعايتىپ كەلەدى. بۇگىندە ول ەلىمىزدەگى يننوۆاتسيا مەن IT سالاسىن دامىتۋعا باعىتتالعان بيزنەسمەندەر مەكتەبىنە اينالدى. تەحنوپارك جۇمىس الاڭىمەن قامتاماسىز ەتىپ, تاراتۋشى قىزمەتىن دە اتقارادى. قازىرگى تاڭدا تەحنوپارك ستارتاپتارىنىڭ 30 پايىزى شەتەلدىك كاسىپكەرلەرگە تيەسىلى. بۇل الدىمەن وتاندىق ەكونوميكاعا وتە ءتيىمدى. ويتكەنى ولاردىڭ جوبالارى مەملەكەتكە سالىق تولەپ, ەلىمىزدە جۇمىس ورنىنىڭ كوبەيۋىنە ۇلەس قوسادى. ودان بولەك الەمدەگى Nokia, Huawei سىندى ۇلكەن كورپوراتسيالار وكىلدىكتەرىن اشىپ, جاس كاسىپكەرلەرگە باعىت-باعدار بەرىپ تە كەلەدى. ەندى مىنە, ايماقتىق ارىپتەستىكتى دامىتۋ باعدارلاماسىن ىسكە قوسىلىپ وتىر.
بۇدان بىلاي وبلىستارداعى تەحنوپاركتەر, اكسەلەراتورلار, ينكۋباتورلار, كوۆوركينگتىك ۇيىمدارعا جان-جاقتى قولداۋ جاسالاتىن بولادى. سالانىڭ جاڭا جوبالارى وقۋ-ادىستەمەلىك قۇرالدارمەن قامتىلىپ, كاسىبي مامان كەڭەسىن الادى. بۇعان قوسا, باعدارلاما قاتىسۋشىلارى ءتۇرلى سالىقتىق جانە ۆيزالىق جەڭىلدىكتەر يەلەنبەك.
– بىزگە تىركەلىپ, كەلىسىمگە تۇرعان قاتىسۋشىلارعا قوسىمشا قۇن سالىعى, جەكە تابىس سالىعى دا سالىنبايدى. وسى سىندى بىرقاتار سالىقتىق جەڭىلدىكتەر بەرىلەدى. شەتەلدەن جۇمىس كۇشىن تارتۋ بويىنشا ارنايى ۆيزالىق ءتارتىپ تە قاراستىرىلعان. ءوتىنىش بەرۋ ونلاين جۇزەگە اسىرىلادى. ءبارى اشىق. ياعني IT- كومپانيالار ءوز وڭىرلەرىنەن تەگىن ءوتىنىش تاپسىرا الادى. كەڭەس مۇشەلەرى وتىنىمدەردى قاشىقتان قاراپ ىرىكتەيدى. كەيىن ءبىز كەلىسىم مەن سەرتيفيكات جىبەرەمىز. سودان سوڭ كومپانيا مەملەكەتتىك ورگاندارعا سالىقتىق جەڭىلدىكتەرگە قاتىستى ءوتىنىم جىبەرە الادى, – دەيدى Astana Hub IT-ستارتاپتار حالىقارالىق تەحنوپاركىنىڭ اتقارۋشى ديرەكتورى ادىلەت نۇرعوجين.
ايتا كەتەيىك, بىلتىر Astana Hub ساراپشىلار كومانداسى تەحنوپارك قىزمەتىمەن تانىستىرۋ ءۇشىن, سونداي-اق ەل اراسىندا تەحنولوگيالىق كاسىپكەرلىك مادەنيەتىن ىلگەرىلەتۋ ءۇشىن وڭىرلەردى ارالاعان بولاتىن. Startup Sapary باعدارلاماسى ارقىلى ستارتاپ-جوبالاردى دامىتۋ بويىنشا ءبىلىم العىسى كەلەتىن جانە ءوز يدەيالارىن بارىنشا قىسقا مەرزىمدە ىسكە اسىرۋعا بەيىم باستاۋشى كاسىپكەرلەردىڭ جولىن اشقان ەدى. سونىڭ زاڭدى جالعاسى رەتىندە Astana Hub ەل اۋماعىنداعى تەحنوپاركتەردىڭ الەۋەتىن ارتتىرۋعا مۇدەلى. IT-ماماندار تىڭ ونەرتابىستارىن ىسكە اسىراتىن جاڭا مۇمكىندىكتەرگە يە بولادى. سالاعا قاتىستى سوڭعى جاڭالىقتاردان دا قۇلاعدار ەتىلىپ تۇرادى.
– 2019 جىلى Astana Hub ايماقتارداعى بارلىق ءىرى تەحنوپاركتەردى ارالاپ, IT ماماندارمەن كەزدەستى. ولاردىڭ كوبىندە ءالى جۇزەگە اسپاعان تىڭ ويلار بار. ءبىز ينۆەستيتسيا تارتۋ بويىنشا بىرقاتار جەتىستىكتەرگە جەتتىك. «بيزنەس پەرىشتەلەر» كلۋبى قۇرىلدى. سونداي-اق كوپتەگەن حالىقارالىق ۆەنچۋرلىك قور, كلۋب جانە كومپانيالارمەن ارىپتەستىك ورناتتىق. قاناتقاقتى جوبالاردى ۆەنچۋرلىك ينۆەستورلارعا ۇسىناتىن بولامىز, – دەدى ءا.نۇرعوجين.
ماماندار جاڭا باستاما قازاقستاننىڭ يننوۆاتسيالىق ەكوجۇيەسىن جاقسارتۋعا تىڭ سەرپىن بەرەتىنىنە سەنىمدى. بۇل تەك ءىرى شاھارلاردى عانا ەمەس, جالپى بارلىق ايماقتاردى بىرىكتىرەتىن ەلىمىزدىڭ بىرىڭعاي IT-قاۋىمداستىعىنا اينالۋى ءتيىس.
Astana Hub باسشىلىعىنىڭ ايتۋىنشا, الداعى ۋاقىتتا ناقتى جوسپارى قۇرىلعان ستارتاپتار مەكەنى ەلىمىزدەگى ءار سالانىڭ IT جۇيەسىن دامىتاتىن, حالىق ءومىرىن جاقسارتۋعا باعىتتالعان جوبالاردىڭ ورداسىنا اينالماق.
