ابىششە ايتساق, «...ول تىرىسىندە – ەلىنىڭ جەل جاقتاعى پاناسى, ىق جاقتاعى ساياسى بولا بىلگەن ازامات. جاۋدان ەلدى اراشالاعان باتىر. داۋدا ادىلەتتى اراشالاعان قازى. وزبىرلىقتان وبال مەن ساۋاپتى اراشالاعان ءپىرادار. ەلى مەن جەرىن شەكسىز سۇيگەن اسىل ازامات, ابزال ادام. ...السىزگە مەدەت, كۇشتىگە ايبات, زارىققانعا جەبەۋ, تارىققانعا دەمەۋ, اسقانعا توسقان, ساسقانعا سايا, ۇرپاققا ۇستاز, ۇلىسقا ۇران, ەل يەسى, جەر كيەسى».
عاسىرلار بويى جۇرتىنىڭ جادىنان جوعالماعان, جۇرەگىنەن جويىلماعان بەكەت اتا ەسىمى – تەنتەكتى تەزگە سالار تاربيە مەن تاعىلىم مەكتەبى. وزدەرىنەن بۇرىنعى بابالار جولىن جالعاستىرعان بۇگىنگى ۇرپاق ءپىر اتا رۋحىنا قۇرمەت پەن سۇيىسپەنشىلىكتى جوعالتقان جوق. بەكەت اتانىڭ مەرەيتويى قارساڭىندا ون جىل بۇرىن سالىنىپ حالىق يگىلىگىنە ۇسىنىلعان «اتا جولى» جاڭعىرتىلىپ-جاڭارتىلىپ قولدانىسقا قايتا قوسىلدى.
بۇگىندە وعىلاندى تاۋىنداعى بەكەت اتا جەرلەنگەن جەر – حالىق ءجيى زيارات ەتىپ باراتىن ورىن. اسىرەسە تۋريستىك سالانى دامىتۋعا باسىمدىق بەرگەن ەلىمىزدە ماڭعىستاۋدىڭ كورىكتى-كورنەكتى جەرلەرىنە تۋريستەردى كوپتەپ تارتۋ باعىتىندا تابيعي سۇلۋ ورىندارمەن بىرگە تاريحي-مادەني نىسانداردىڭ, تاريحي ەسكەرتكىشتەردىڭ الار ورنى زور. قازىرگى تاڭدا ماڭعىستاۋ وڭىرىندە ون ءۇش مىڭنان استام تاريحي-مادەني نىساندار زەرتتەلىپ, قۇجاتتالدى. ءتورت ءجۇز قىرىقتان استام ەسكەرتكىش مەملەكەتتىك قورعاۋعا الىندى, ولاردىڭ جيىرما ءبىرى رەسپۋبليكالىق ماڭىزعا يە. ەكى ءجۇز قىرىق توعىز ارحەولوگيالىق ەسكەرتكىشى تولىقتاي زەرتتەلگەن دەسەك, ولارعا تاس ءداۋىرى سوڭىنداعى تۇرعىن كەشەندەر, قولا ءداۋىرى مەن ەرتە تەمىر داۋىرىندەگى ءدىني-جەرلەۋ نىساندارى, ورتاعاسىرلىق ەسكى قالالار, بەكىنىستەر, ۇلى جىبەك جولى بويىندا ورنالاسقان كەرۋەن سارايلارى, ارحەولوگيا, ساۋلەتتىڭ ۇلكەن جانە شاعىن فورمالارى كىرەتىن ءجۇز قىرىق كەشەندىك انسامبلدەر, سونىمەن قاتار ساۋلەت پەن قۇرىلىس مادەنيەتىن تانىتاتىن الپىس ەسكەرتكىش جاتادى. ماڭعىستاۋداعى جەراستى مەشىتتەرى, قاۋىم-قويىلىمدارداعى قۇلپىتاستار مەن تامدار ەرەكشەلىكتەرى تۋريستەرگە زور اسەر سىيلايتىنى انىق. بۇل مۇمكىندىك ماڭعىستاۋ ءوڭىرىن قازاقستانداعى ون ۇزدىك تۋريستىك ايماقتىڭ ءبىرى رەتىندە ەرەكشەلەيدى. جىل وتكەن سايىن كاسپي تەڭىزىنىڭ جاعاسى تۋريستەر دەمالاتىن ورىنعا اينالىپ, كەلۋشىلەردىڭ سانى ارتا تۇسۋدە. ال قازاقستاننىڭ جەتى كەرەمەتىنىڭ ءبىرى سانالاتىن بەكەت اتا جەراستى مەشىتى جانە باسقا دا قاسيەتتى ورىندار ءارى زيارات ەتۋشىلەرگە, ءارى تۋريستەرگە مول اسەر, رۋحاني سەرپىلىس سىيلاي الادى.
بيىلعى مەرەيلى مەرەكەگە وراي بەكەت اتا مەشىتى مەن جول بويىندا ورنالاسقان شوپان اتا مەشىتتەرىنىڭ اۋماعى اباتتاندىرىلىپ, كونە جادىگەرلەردى قايتا قالپىنا كەلتىرۋ جۇمىستارى جۇرگىزىلۋدە. 12 شاقىرىم قاشىقتا جەر استىنان شىعاتىن تابيعي سۋعا قۇبىر تارتىلىپ, مەشىتكە اكەلىندى. 2017 جىلى باستالعان «اتا جولى» اۆتوموبيل جولىن رەكونسترۋكتسيالاۋ جۇمىستارى جوباسى ەكى كەزەڭمەن جۇرگىزىلدى. العاشقى بولىگىندە 5 ملرد 460 ملن تەڭگەگە 51 شاقىرىم جول جوندەلسە, ەكىنشى كەزەڭىندە 4 ملرد 554 ملن تەڭگەگە 46 شاقىرىم جولعا رەكونسترۋكتسيا جاسالىپ, اسفالت توسەلدى. ەندىگى كەزەكتە ايماق باسشىلىعىنىڭ تاپسىرماسىمەن بەكەت اتا مەشىتىنە گاز جەلىسىن تارتۋ ماسەلەسى قولعا الىندى. دەمەۋشىلەردىڭ كومەگىمەن الداعى ۋاقىتتا بۇل جوبا دا ىسكە اسادى دەپ كۇتىلۋدە.
– ارىپتەستەرمەن, ەل اعالارىمەن, «وزەنمۇنايگاز» اكتسيونەرلىك قوعامىمەن بىرگە بەكەت اتانىڭ باسىندا تاعى قانداي جۇمىستار ۇيىمداستىرۋعا بولاتىندىعىن اقىلداستىق. قازىرگى كەزدەگى وزەكتى ماسەلە – گاز اكەلۋ جانە كەلگەن سۋدى تۇشىتىپ, حالىق يگىلىگىنە جاراتۋ. ونى دا اقىلداستىق. دەمەۋشىلەردىڭ كومەگىمەن الداعى ۋاقىتتا ۇيىمداستىرامىز دەپ جوسپارلاپ وتىرمىز. سونداي-اق شوپان اتانىڭ باسىنا دا سۋ تارتۋ, كوگالداندىرۋدى جوسپارلاپ وتىرمىز, – دەيدى ماڭعىستاۋ وبلىسىنىڭ اكىمى سەرىكباي ترۇموۆ.
بەكەت اتا ەسىمى مەن رۋحى ۇرپاقتارىمەن بىرگە جاساي بەرمەك.
ماڭعىستاۋ وبلىسى
