جۇمىس توبىنىڭ 42 وتىرىسى ءوتتى, 1 000-نان استام تۇزەتۋ قارالدى, وتاندىق جانە حالىقارالىق ساراپشىلاردى, ددسۇ وكىلدەرىن تارتا وتىرىپ, 11 كوپشىلىك تالقىلاۋ وتكىزىلدى.
ەلجان ءبىرتانوۆ ۆاكتسيناتسيا ماسەلەسىنە توقتالىپ ءوتتى. «سوڭعى كەزدە الەۋمەتتىك جەلىلەردە كودەكستىڭ قابىلدانۋىنا قارسى تالقىلاۋلار جۇرگىزىلىپ جاتىر, سونىڭ ىشىندە ساپاسىز ۆاكتسينالار, جوسىقسىز ساتىپ الۋ مەن ۆاكتسينالاردى دۇرىس تاسىمالداماۋ, مەديتسينالىق قيىندىقتار جانە ۆاكتسينادان باس تارتۋشىلار سانىنىڭ كوپتىگى تۋرالى شىندىققا جاناسپايتىن اڭگىمەلەر ايتىلۋدا. بۇل قوعامدىق سانانى اشىق تۇردە مانيپۋلياتسيالاۋ!
قازاقستاندا ۆاكتسينالاۋ ماجبۇرلەپ جۇرگىزىلمەيدى, ولاي بولعان دا ەمەس! بۇكىل الەمدەگى سەكىلدى ءبىزدىڭ ەلىمىزدە دە ەرىكتى تۇردە سالىناتىن جانە مىندەتتى ۆاكتسينالار بولادى. ءار جاعدايدا اتا-انالاردىڭ اقپاراتتاندىرىلعان كەلىسىمى نەمەسە ۆاكتسيناتسيادان باس تارتۋ قۇقىعى بار! ەكپە الماعان بالالار قۇقىعىن شەكتەيتىن ەشقانداي نورما جوق! ۇجىمدىق يممۋنيتەتتى, ياعني بالاباقشالارعا باراتىن بارلىق بالالاردىڭ دەنساۋلىعىن قورعاۋدى قامتاماسىز ەتەتىن ءبىر عانا نورما بار.
ستاتيستيكاعا سۇيەنسەك, 2019 جىلى بىزدە 4 841 334 بالاعا ۆاكتسينا سالىندى, ونىڭ ىشىندە 6 003 بالاعا عانا سالىنبادى (باس تارقان). ال بۇل تەك ‒ 0,12%. اسقىنۋ فاكتىلەرىنە توقتالساق, 2019 جىلى ەكپە ەگىلگەن 4 841 334 بالانىڭ ىشىندە تەك 143-ىندە عانا جاعىمسىز بەلگىلەر بايقالدى (تەمپەراتۋرانىڭ كوتەرىلۋى, ءىسىنۋ, تەرىنىڭ قىزارۋى), بۇل ‒ 0,003%! سونىمەن قاتار قازاقستاندا 2019 جىلى ۆاكتسينادان قايتىس بولعان بالالار تىركەلمەگەن.
ساندار بارىنە دالەل. ايتا كەتۋ كەرەك, قازاقستاندا ءاربىر ۆاكتسينا ءتيىستى وندىرىستىك تاجىريبەنىڭ (GMP) حالىقارالىق ستاندارتتارىنا سايكەس كەلەتىن قاۋىپسىزدىككە, تيىمدىلىگىنە جانە ساپاسىنا كوپ ساتىلى تەكسەرۋدەن وتكىزىلەدى», — دەپ ناقتىلادى ە. ءبىرتانوۆ.
