كەشە قازاقستان پرەمەر-ءمينيسترى سەرىك احمەتوۆ استاناعا جوعارى ەۋرازيالىق ەكونوميكالىق كەڭەس وتىرىسىنا كەلگەن رەسەي ۇكىمەتىنىڭ توراعاسى دميتري مەدۆەدەۆپەن, قىرعىزستان پرەمەر-ءمينيسترى جانتورو ساتىبالديەۆپەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەشە قازاقستان پرەمەر-ءمينيسترى سەرىك احمەتوۆ استاناعا جوعارى ەۋرازيالىق ەكونوميكالىق كەڭەس وتىرىسىنا كەلگەن رەسەي ۇكىمەتىنىڭ توراعاسى دميتري مەدۆەدەۆپەن, قىرعىزستان پرەمەر-ءمينيسترى جانتورو ساتىبالديەۆپەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى.
رەسەيلىك ارىپتەسىمەن كەزدەسۋدە س.احمەتوۆ قازاقستان-رەسەي قارىم-قاتىناستارىنىڭ كوكەيكەستى ماسەلەلەرى بويىنشا ەكى ەل اراسىنداعى بايلانىستاردىڭ بەلسەندىلىگىن, كەدەن وداعى شەڭبەرىندەگى ءماسەلەلەردىڭ جەدەل شەشىلەتىندىگىن اتاپ كورسەتتى.
د.مەدۆەدەۆ تە ەكىجاقتى بايلانىستاردىڭ تابىستىلىعى مەن ىرعاقتىلىعىن اتاپ ءوتتى.
قازاقستان مەن رەسەي اراسىنداعى قارىم-قاتىناستار تابىستى جانە ىرعاقتى دامۋدا, دەدى رەسەي ۇكىمەتىنىڭ باسشىسى.
كەزدەسۋ بارىسىندا ساۋدا-ەكونوميكالىق ىنتىماقتاستىقتىڭ كوكەيكەستى ماسەلەلەرىنىڭ كەڭ اۋقىمى بويىنشا پىكىر الماسىلدى. اتاپ ايتقاندا, كولىك, ەنەرگەتيكا سالاسىنداعى بىرلەسكەن جوبالاردى جۇزەگە اسىرۋ بارىسى تالقىلاندى. سول سياقتى كو جاعدايىنداعى ءوزارا ءىس-قيمىلداردى دامىتۋدىڭ كوكەيكەستى ماسەلەلەرى دە اڭگىمە وزەگىنە اينالدى.
قىرعىزستان پرەمەر-ءمينيسترى جانتورو ساتىبالديەۆپەن كەزدەسۋدە ساۋدا-ەكونوميكالىق, ينۆەستيتسيالىق سالالارداعى كولىك ءترانزيتى, سۋ-ەنەرگەتيكا, وتىن سەكتورىنداعى, شەكارا بويى ىنتىماقتاستىعىنداعى قازاقستان-قىرعىزستان ەكىجاقتى بايلانىستارىن ودان ءارى نىعايتۋ ماسەلەلەرى قارالدى.
2012 جىلدىڭ قورىتىندىسى بويىنشا ساۋدا-ەكونوميكالىق تاۋار اينالىمى كولەمى ميلليارد دوللاردان استى, – دەدى س.احمەتوۆ. سونداي-اق, ول ءوزارا ساۋدانى ودان ءارى ارتتىرۋدا ۇلكەن الەۋەتتىڭ بار ەكەندىگىنە نازار اۋداردى.
ءوز كەزەگىندە ج.ساتىبالديەۆ مەملەكەتارالىق ۋاعدالاستىقتاردى تابىستى جۇزەگە اسىرۋ ءۇشىن زور مۇمكىندىكتەرگە يە ارىپتەستىك بايلانىستاردى بەلسەندى ارتتىرا ءتۇسۋ قاجەتتىگىنە توقتالدى.
وسى كۇننىڭ ەكىنشى جارتىسىندا پرەمەر-مينيستر سەرىك احمەتوۆ بەلارۋس, ۋكراينا ۇكىمەتتەرىنىڭ باسشىلارى ميحايل مياسنيكوۆيچپەن جانە نيكولاي ازاروۆپەن كەزدەستى.
بەلارۋس پرەمەر-ءمينيسترى م.مياسنيكوۆيچپەن كەزدەسۋدە ساۋدا-ەكونوميكالىق جانە ينۆەستيتسيالىق سالالارداعى ەكىجاقتى قىزمەتتەستىكتى كەڭەيتۋ ماسەلەلەرى قارالدى. تاراپتار سول سياقتى كەدەن وداعى مەن ءبىرتۇتاس ەكونوميكالىق كەڭىستىك شەڭبەرىندەگى ءوزارا ءىس-قيمىلداردىڭ كوكەيكەستى ماسەلەلەرىن دە تالقىلادى.
ۋكراينا پرەمەر-ءمينيسترى ن.ازاروۆپەن كەزدەسۋ بارىسىندا ساۋدا-ەكونوميكالىق قاتىناستاردىڭ شەشۋشى باعىتتارىن دامىتۋعا نازار اۋدارىلدى. ۇكىمەت باسشىلارى ەكونوميكالىق ىنتىماقتاستىق جونىندەگى مەملەكەتارالىق كوميسسيا قىزمەتىنىڭ بەلسەندىلىگىن ارتتىرۋ قاجەتتىگىن اتاپ ءوتتى.
