- «قارابۇتاق-قوستاناي» جوباسى بويىنشا سالىناتىن جولدىڭ جالپى ۇزىندىعى 114 شاقىرىم بولادى. قازىر جۇمىس ءجۇرىپ جاتىر. جول ساپاسىنا قويىلاتىن تالاپتاردىڭ بارلىعى ساقتالۋى شارت. ماسەلەن, جەر توسەمىنىڭ قۇرىلىمى, توسەمنىڭ تومەنگى جانە ۇستىڭگى قاباتىنىڭ قالىڭدىعى نورماعا ساي بولۋى كەرەك. سوندىقتان ءبىزدىڭ مەكەمە جول بويىندا ءجۇرىپ جاتقان جۇمىستى تولىق قاداعالاپ وتىر. اسفالت-بەتوندى قوسپانىڭ جانە كەرن سىنامالارى الىندى. ولار كەلەسى سىناقتار ءۇشىن سىناق زەرتحاناسىنا تاسىمالداندى» - دەدى جول اكتيۆتەرى ۇلتتىق ساپا ورتالىعى مەكەمەسىنىڭ وبلىستىق فيليال باسشىسى ابىلايحان الشىنباەۆ.
فيليال باسشىسىنىڭ ايتۋىنشا, قوستاناي وبلىسى ارقىلى وتەتىن «ورتالىق-باتىس» جوباسى دا «نۇرلى جول» باعدارلاماسى بويىنشا جۇزەگە اسىرىلىپ جاتىر. جالپى ۇزىندىعى 401 شاقىرىمدىق جولدى قامتيتىن بۇل جوبا ەلوردانى باتىس ايماقتارمەن تىكەلەي كولىك ءدالىزى ارقىلى قوسۋدى كوزدەيدى.
– ء بىزدىڭ مەكەمە جولدىڭ زاماناۋي تەحنولوگيالار ارقىلى سالىنۋىنا مۇرىندىق بولعانىمەن, ناقتى ساپاسىنا تاپسىرىس بەرۋشى تىكەلەي جاۋاپتى. جول سالاسىندا جاڭا ادىستەمەلەر مەن تەحنولوگيالاردى ءتيىمدى ەنگىزۋ, كەپىلدىك مەرزىمدەرىن ۇلعايتۋ, جول ينفراقۇرىلىمىنىڭ قاۋىپسىزدىگىن ارتتىرۋ باستى مىندەتىمىزگە كىرەدى. جولدى كۇردەلى جانە ورتاشا جوندەۋدەن وتكىزۋ, اۆتوموبيل جولدارىن كۇتىپ ۇستاۋ كەزىندە قۇرىلىس-مونتاج جۇمىستارى مەن ماتەريالداردىڭ ساپاسىنا ساراپتاما جۇرگىزۋدى جوسپارعا قويدىق. جالپىعا ورتاق پايدالانىلاتىن اۆتوموبيل جولدارى مەن ەلدى مەكەندەردىڭ كوشەلەرىن كۇتىپ ۇستاۋ ساپاسىن جاقسارتۋ ماقساتىندا نورماتيۆتىك-تەحنيكالىق بازانى جەتىلدىرۋ ۇستىندەمىز. وبلىستا بىلتىردان بەرى تەكسەرۋ جۇمىستارى بەلسەندى جۇرگىزىلۋدە. سوڭعى ءبىر جىل ىشىندە رەسپۋبليكالىق جانە جەرگىلىكتى ماڭىزى بار اۆتوموبيل جولدارىندا 624 تەكسەرۋ جۇرگىزىپ, 593 زاڭ بۇزۋ ارەكەتىن انىقتادىق. جول قۇرىلىسى نىساندارىنان 702 سىناما الىنىپ, زەرتحانالىق تالداۋعا جىبەرىلدى. ناتيجەسىندە جول قۇرىلىسىندا 81 ماتەريالدى پايدالانۋعا تىيىم سالىندى. قازىر 28 سىناما تەكسەرىستەن وتۋدە, - دەيدى فيليال ديرەكتورى ابىلايحان الشىنباەۆ.
قوستاناي وبلىسى
