سۋرەت: gizmochina.com
Xiaomi باس ديرەكتورى الەۋمەتتىك جەلىدە جاريالاعان پوستى Apple كومپانياسىنىڭ گادجەتىنەن جازىلعانى كورىنىپ قالعان. قىتايداعى Twitter انالوگى Weibo الەۋمەتتىك جەلىسىندە لەي تسزيۋن تۇراقتى تۇردە وقىرماندارمەن تىلدەسىپ وتىرادى ەكەن. ءوزىنىڭ كەزەكتى پوستىندا قانداي كىتاپتار وقۋ كەرەكتىگى جايىندا ايتقان قىتايلىق الپاۋىت كومپانيا باسشىسىنىڭ باسى پالەگە قالدى دەسە دە بولادى. ول پوست ءدال سول مەزەتتە باسەكەلەس كومپانيانىڭ سمارتفونىنان جازىلعانى كورىنىپ قالعان.
مۇنداي شاتاق جاعداي بۇرىندارى Samsung كومپانياسىنا دا قاتىستى بولعان ەدى. ەندى مىنە, قىتايلار وسىنداي جاعدايدى الەۋمەتتىك جەلىدە قاتتى تالقىلاۋدا. ءوز كومپانياسىنىڭ ءونىمىن مەنسىنبەۋ ناعىز بارىپ تۇرعان سوراقىلىق دەگەن سارىندا پىكىرلەر دە ايتىلۋدا.
بىراق لەي تسزيۋندى قورعاۋشىلار دا تابىلىپ جاتىر. سونىڭ ءبىرى تانىمال اناليتيك ءارى Xiaomi كومپانياسىنىڭ ينۆەستيتسيالىق ارىپتەسى پان تسزيۋتان باسەكەلەس كومپانيا ءونىمىنىڭ ساپاسىن مەن وزگەرىستەرىن تەكسەرۋ ءۇشىن ونىڭ گادجەتىن ۇستاعاندا تۇرعان ەشتەڭە جوق دەيدى. بۇل قايتا ءوز قۇرىلعىلارىن جەتىلدىرۋ ءۇشىن اسا قاجەت دۇنيە ەكەن.
ءبىر قىزىعى Xiaomi نەگىزىن سالۋشى ادام بىلتىرلارى ءوز قاراماعىنداعى ماماندارعا باسقا كومپانيالاردىڭ گادجەتتەرىن پايدالانۋعا تىيىم سالعان ايتقان ەدى. ەندى مىنانداي وقىس جاعداي بولىپ وتىر.
اۋزى كۇيگەن باس ديرەكتور ەندىگى پوستتارىن فلاگماندىق سمارتفون Xiaomi Mi 10 Pro ارقىلى جازۋدا.
