اتالعان زاڭ جوباسى ويىن بيزنەسى سالاسىنداعى زاڭنامانى جەتىلدىرۋگە جانە ءباس تىگۋگە قاتىسۋشىلاردىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە, سونداي-اق بۋكمەكەرلىك كەڭسەلەر مەن توتاليزاتورلاردىڭ قىزمەتىن باقىلاۋدىڭ تيىمدىلىگىن ارتتىرۋعا باعىتتالعان.
زاڭ جوباسىن دەپۋتاتتاردىڭ نازارىنا مادەنيەت جانە سپورت ءمينيسترى اقتوتى رايىمقۇلوۆا ۇسىندى.
– ويىن بيزنەسى تۋرالى زاڭدا قۇمار ويىندار مەن ءباس تىگۋگە قاتىسۋدان ءوزىن-ءوزى شەكتەۋ تەتىگى ەنگىزىلەدى. ۋاكىلەتتى مەملەكەتتىك ورگانداردى بۋكمەكەرلىك كەڭسەلەر مەن ويىنشىلاردىڭ اراسىنداعى اقشا وپەراتسيالارى تۋرالى تولىق جانە دۇرىس اقپاراتپەن قامتاماسىز ەتۋ ءۇشىن, سونداي-اق ءباس تىگۋگە قاتىسۋدان شەكتەۋ تەتىگىن ىسكە اسىرۋ ءۇشىن ستاۆكالاردى ەسەپكە الۋ ورتالىعىن قۇرۋ كوزدەلەدى. قازىرگى ۋاقىتتا سالانى مەملەكەتتىك رەتتەۋدىڭ ماڭىزدى پروبلەماسى بولىپ بۋكمەكەرلىك كەڭسەلەر مەن توتاليزاتورلاردىڭ اينالىمى تۋرالى ناقتى مالىمەتتەردىڭ بولماۋى بولىپ تۇر. وسىعان بايلانىستى ستاۆكالاردى ەسەپكە الۋ ورتالىعىن قۇرۋ ۇسىنىلدى. بۇل رەتتە بۋكمەكەرلىك كەڭسەگە قولما-قول نەمەسە ەلەكتروندى تولەم جۇيەلەرى ارقىلى تۇسەتىن بارلىق تولەم ەسكەرىلەدى. بۋكمەكەرلىك كەڭسەلەر مەن توتاليزاتورلارعا تۇسەتىن بارلىق تولەمنىڭ بىرىڭعاي ەسەبى كولەڭكەلى اينالىمدى بولدىرماۋدى, سالىقتاردىڭ جينالۋىن ارتتىرۋدى باقىلاۋدى كۇشەيتەدى, – دەدى مينيستر.
بۇعان قوسا زاڭ جوباسى ءباس تىگۋگە قاتىسۋشىلاردىڭ دەرەكتەر قورى جالپىعا بىردەي دەكلاراتسيالاۋدى ەنگىزۋگە, ءباس تىگۋگە قاتىساتىن كليەتتى شەكتەۋ جانە كليەنتتىڭ ءوزىن-ءوزى شەكتەۋ ءراسىمىن ەنگىزۋگە ىقپال ەتەدى. سونداي-اق قىلمىستىق جولمەن الىنعان كىرىستەردى جىلىستاتۋعا جانە تەرروريزمدى قارجىلاندىرۋعا قارسى كۇرەس جونىندەگى شارالاردى كۇشەيتەدى.
وقيعانىڭ ناتيجەسىندەگى اشىقتىقتى جانە ويىنشىلاردىڭ قۇقىقتارىن قامتاماسىز ەتۋ ماقساتىندا بۋكمەكەرلىك كەڭسەلەرگە تەك سپورتتىق شارالارعا ستاۆكا قابىلداۋ مىندەتىن بەلگىلەۋ ۇسىنىلىپ وتىر.
