بىزگە تاعدىر 1991-2001 جىلدار اراسىندا تاجىك-اۋعان شەكاراسىندا بۇرىنعى كسرو, قازىرگى تاۋەلسىز مەملەكەتتەر دوستاستىعىنىڭ ىرگەسىن قورعاۋدى بۇيىرتىپتى. وسى ءبىر بەيمازا ايماقتا اسكەري قىزمەتىن اتقارعان 250-دەي بۇرىنعى جاۋىنگەر 2016 جىلى باس قوسىپ, «تاجىك-اۋعان شەكاراسىنداعى اسكەري قيمىلدار ارداگەرلەرى مەن مۇگەدەكتەرى» باتىس قازاقستان وبلىستىق قوعامدىق بىرلەستىگىن قۇردىق. بىرلەستىك مۇشەلەرى قارۋلاس دوسىمىز, 1995 جىلى 7 ساۋىردە پشيحەۆار شاتقالىندا بولعان ۇرىستا قازا تاپقان جەرلەسىمىز راديك قايمولديەۆتى ارقاشان ماقتانىشپەن ەسكە الادى. شىمكەنتتە قۇرىلعان 6506 اسكەري ءبولىمنىڭ جاۋىنگەرلەرى كۇشى الدەقايدا باسىم جاۋمەن 5 ساعات بويى ارپالىسىپ, 17 بوزداق جانىن قيدى. سونىڭ ءبىرى – باتىس قازاقستان وبلىسىنىڭ شىڭعىرلاۋ اۋدانىندا تۋىپ-وسكەن سەرجانت راديك قايمولديەۆ بولاتىن. وسى ەرلىگى ءۇشىن راديك ءىى دارەجەلى ايبىن وردەنىمەن ناگرادتالدى. بۇگىندە ونىڭ بەينەسى 29 اۋعاندىق جاۋىنگەرمەن بىرگە ورال قالاسىنداعى ماڭگىلىك الاۋ جانىندا, جەڭىس الاڭىنا ورناتىلعان.
شىنى كەرەك, ءبىز, تاجىك-اۋعان اسكەري قاقتىعىسىنا قاتىسقان جاۋىنگەرلەر, وسى كۇندى كوپ كۇتتىك. مىنە, ەندى تəجىكستان-اۋعانستان ۋچاسكەسىندە تمد شەكاراسىن قورعاعان əسكەري قىزمەتشىلەر عانا ەمەس, يراكتاعى حالىقارالىق بىتىمگەرشىلىك وپەراتسياعا بىتىمگەرلەر رەتىندە قاتىسقان, تاۋلى قاراباحتاعى ەتنوسارالىق قاقتىعىستى رەتتەۋگە قاتىسقان əسكەريلەر دە ارداگەر مارتەبەسىن الدى. بۇل مارتەبە بىزگە ءتۇرلى الەۋمەتتىك جەڭىلدىك قانا بەرمەيدى. ەڭ باستىسى – ءبىزدىڭ مارتەبەمىز ءوستى.
قارۋلاس دوستارىمىزدىڭ ءبارى دە جاڭا زاڭعا ەرەكشە ريزا. وسى زاڭ ارقىلى ەندى ءبىز مەملەكەت تاراپىنان ارنايى جاردەماقى الا الامىز, ءبىز دە اۋعان سوعىسىنا قاتىسقان ينتەرناتسيوناليست-جاۋىنگەرلەرگە كورسەتىلىپ كەلگەن بارلىق جەڭىلدىكتى پايدالانا الامىز. بۇل دەگەنىڭىز – تۇرعىن ءۇي كەزەگى, سالىق جەڭىلدىگى, تەگىن مەديتسينالىق قىزمەت, ەمدىك-ساۋىقتىرۋ ورىندارىنا جولداما عوي. ءبىزدىڭ ارامىزدا ءالى كۇنگە ءوز باسپاناسى جوق كوپ بالالى وتباسىلار بار, ەندى ولار جاڭا زاڭنىڭ يگىلىگىن كورەتىن بولادى.
مەن ءوزىم 1992 جىلى چاپاەۆ اۋداندىق اسكەري كوميسسارياتىنان اسكەرگە شاقىرىلىپ, جاركەنتتەگى №2091 اسكەري بولىمىندە بورىشىمدى اتقاردىم. 1993 جىلى 1 قىركۇيەكتە 2 جەكە اتقىشتار باتالونى قۇرامىندا دۋشانبە قالاسىنا جەتتىك. ودان ءارى حوروگ شەكارا بولىمشەسىنە, №6 زاستاۆاعا تۇستىك. وسى جەردە 4,5 اي كۇزەتتە بولىپ, اسكەري قاقتىعىستارعا دا قاتىستىم. سوندىقتان مەن ءۇشىن «اسكەري قيمىلدار ارداگەرى» مارتەبەسىن يەلەنۋ ماقتانىش. مەن ەڭ الدىمەن قارۋلاس دوستارىم ءۇشىن, وسى شەكارادا قانىن توككەن, ءتىپتى جانىن قيعان بوزداقتار ءۇشىن قۋاندىم.
داربەك سۇلەيمەنوۆ,
«تاجىك-اۋعان شەكاراسىنداعى اسكەري قيمىلدار ارداگەرلەرى مەن مۇگەدەكتەرى» وبلىستىق قوعامدىق بىرلەستىگىنىڭ توراعاسى
باتىس قازاقستان وبلىسى
