ال اقپاراتتىڭ بارلىعى بىردەي پايدالى, بارلىعى بىردەي اقيقات ەمەس. ءتىپتى اراسىندا زياندىلارى دا كوپ. دۇنيەجۇزىلىك دەنساۋلىق ساقتاۋ ۇيىمى پاندەميا كەزىندە قوعامعا زيانى تيەتىن ينفودەميامەن كۇرەستىڭ كەرەكتىگىن ايتۋدا. نەمىس ءجۋرناليسى كارولين شۆارتس باق پەن قاتار الەۋمەتتىك جەلىلەردەگى جالعان اقپاراتتاردى زەردەلەپ, ولاردى 3 توپقا ءبولىپ قاراستىرىپتى. ءبىرىنشىسى, ادامداردى ناسىلگە بولۋشىلىك. دۇنيەدەگى دەرتتىڭ جامانى ازياتتاردان كەلۋدە, بارىنە سولار كىنالى, اتاپ ايتقاندا, قىتايلىقتاردىڭ تاماقتى تالعاماي جەي بەرەتىنى, ءومىر ءسۇرۋ سالتىنىڭ كەمشىلىگى دەيدى. بۇل جەردە ەۋروپالىقتار ەشكىمنىڭ قۇجاتىن تەكسەرىپ, ايىرىپ جاتقان جوق, ءتۇر-تۇسىنە قاراپ قانا, ازيات اتاۋلىدان قۇبىجىق كورگەندەي شوشىپ ءجۇر. ەكىنشىسى, اۋرۋعا شالدىقپاۋ مەن ودان ەمدەلۋ جونىندەگى زياندى كەڭەستەر بەرۋ. ءۇشىنشىسى, تاۋارلارعا جاسالعان جالعان جارنامالار, سولاردىڭ كەسىرىنەن كەيبىر زاتتاردىڭ باعاسىنىڭ شارىقتاپ كەتۋى, كەرىسىنشە كوپتەگەن كومپانيانىڭ تاۋارلارىن ساۋدادان الىپ تاستاۋعا ءماجبۇر بولعاندىعى دەيدى.
اقپاراتتىڭ تەز تاراپ, قولجەتىمدى بولۋىنا ءتۇرلى الەۋمەتتىك جەلىلەر, مەسسەندجەرلەر ءوزىنىڭ وراسان زور كومەگىن بەرگەنىمەن, سولاردان جەتكەن جالعان اقپاراتتاردىڭ جارعا جىعىپ جاتقان دا جايى بار. ءبىرى قاتەرلى ىندەتتى قاۋەسەت كورىپ, ەشتەڭەسى جوق, ءتىپتى ساقتانۋ دا قاجەت ەمەس, بۇل تۇماۋمەن باياعىدا اۋىرىپ كەتكەنبىز, قالىپتى تىرلىگىڭدى كەشىپ, تويىڭا, ساداقاڭا بارا بەر دەسە, ەندى ءبىرى جوق, بۇل امەريكا ما, قىتايدىڭ با, الدە ماسونداردىڭ با قولدان شىعارعان بيولوگيالىق قارۋى, جەر بەتىندە ادام كوبەيىپ كەتپەسىن دەپ سونى باسقارىپ وتىرعانى دەيدى. ايتەۋىر نە كەرەك, جەل سوزبەن تۇندىك جەلپ-جەلپ ەتەدى. تىلدە سۇيەك جوق, دەيدى قازاق, راس.
بريتاندىق Daily Mail تابلويدىندا ءبىر مەكتەپتىڭ مۇعالىمىنىڭ ۆيسكي مەن بالدى قوسىپ ءىشۋى ارقاسىندا دەرتىنەن ايىققانى تۋرالى جازىلۋى يراندىقتاردى تەحنيكالىق سپيرت-مەتانولدى ىشۋگە الىپ كەلگەن. اعزاعا تۇسىسىمەن توتىعىپ, فورمالدەگيدكە اينالاتىن مەتانولدان مىڭداعان ادام ۋلانىپ, 400-دەن استام ادام كوز جۇمعان. ال ادام ءومىرىن ويىنشىققا اينالدىرىپ, اقشا جولىندا نەدەن بولسا دا تايىنبايتىن پاقىرلار تىيىم سالىنعان مەتانول ساۋداسىن قىزدىرىپتى. قازىر يران ۇكىمەتى وسى اقپاراتتى العاش ەلگە تاراتقان ادامدى ىزدەستىرۋ ۇستىندە ەكەن.
ءبىزدىڭ ەلىمىزدە دە ۋاتساپقا دامىل جوق. ىشىندە جالعانى بار, راسى بار قانشاما اقپارات ءورىپ ءجۇر. بايىبىنا جەتىپ جاتقان جان جوق.
دۇنيە جۇزىندەگى قاي مەملەكەتتە دە جالعان اقپارات تاراتۋعا قاتىستى جازالاۋ تۇرلەرى قاراستىرىلعان. ول ءبىزدىڭ ەلىمىزدە دە بار, سوندىقتان ۋاتساپتان تاراعان ءاربىر اقپاراتتىڭ استارىنا ءۇڭىلۋ ارتىق ەتپەيدى. بىرىنشىدەن, جالعان ەمنىڭ قۇربانى بولمايسىز, ەكىنشىدەن, زاڭ بۇزىپ, باسىڭىز بالەگە قالمايدى.
