بۇگىنگە دەيىن وبلىس بويىنشا 62 ادامنان COVID-19 ۆيرۋسى انىقتالدى. ونىڭ 46-سى جىتىقارادا تىركەلگەن. بۇل جەردە 28 ناۋقاستىڭ ەمدەلىپ شىققانىن ايتا كەتكەن ءجون.
سونىمەن جەدەل شتابتىڭ ۇيعارىمى بويىنشا مىناداي مازمۇنداعى شارالاردى وتكىزۋگە ءالى دە بولسا تىيىم سالىنادى:
- سپورتتىق جانە وزگە دە بۇقارالىق, وتباسىلىق, ەسكە الۋ شارالارى;
- ساۋدا-ساۋىق ورتالىقتارى, كينوتەاترلار, كورمەلەر جانە ت.ب. ادام كوپ شوعىرلاناتىن بۇقارالىق سيپاتتاعى شارالار;
- ءدىني نىسانداردىڭ قىزمەتى.
سونداي-اق, وبلىستىق شتابتىڭ ۇيعارىمى بويىنشا, ەگەر 7 كۇن ىشىندە
COVID-19 كورسەتكىشى 7 پايىزدان اسپايتىن بولسا, ايماقتا بىرتىندەپ رۇقسات شارالارى ەنگىزىلە باستايدى. ياعني, ايماقتا ەپيدەميولوگيالىق اھۋالعا تاعى ءبىر اپتا مونيتورينگ جۇرگىزىلىپ, 18 مامىردا قورىتىندى شەشىم قابىلدانادى.
وسىلايشا, ەپيدەميولوگيالىق اھۋال ەسكەرىلىپ جانە سانيتارلىق ءتارتىپ ساقتالا وتىرىپ, مىناداي رۇقسات شارالارى ەنگىزىلۋى مۇمكىن:
- ۇيدەن شىعىپ, ەركىن سەرۋەندەۋگە (2 نەمەسە ودان كوپ ادامدار مىندەتتى تۇردە ماسكا تاعۋى ءتيىس);
- ساياباققا, الاڭعا بارۋعا (3 ادامنان ارتىق بىرگە جۇرمەۋ كەرەك);
- ساعات 10:00 مەن 17:00 ارالىعىندا اۋدانى 2 مىڭ ش/مەترگە دەيىنگى ازىق-ت ۇلىك بازارلارى مەن كيىم-كەشەك, ت.ب. زاتتاردى ساتاتىن ساۋدا ورىندارىنىڭ جۇمىسىنا;
- سۇلۋلىق سالوندارىنىڭ جۇمىسىنا (كليەنتتەر ماسكامەن كىرۋى ءتىيس جانە الدىن الا تىركەلۋى كەرەك);
- سپورت نىساندارىنىڭ جۇمىسى (30 ادامعا دەيىن جاتتىعۋ ويىندارىن وتكىزۋگە);
- مادەنيەت نىساندارىنىڭ جۇمىسى (30 ادامعا دەيىن)
- حالىققا قىزمەت كورسەتۋ نىساندارىنىڭ جۇمىسى: باسپاحانالار, تىگىن تسەحتارى, اياق كيىم جوندەۋ ورىندارى;
- قوناق ۇيلەر, دەمالىس ۇيلەرى, تۋريستىك بازالار جانە ت.ب.
- بالالارعا ارنالعان ءبىلىم ورتالىقتارى مەن ۇيىرمە جۇمىستارى;
- قوعامدىق كولىك قوزعالىسى. (كولىك قوزعالىسىنا 07:00-دەن 19.00-گە دەيىن رۇقسات بەرىلۋى مۇمكىن. مۇنداي جاعدايدا سانيتارلىق-دەزينفەكتسيالىق تالاپ قاتاڭ ساقتالىپ, كولىك جۇرگىزۋشىسى دارىگەردىڭ باقىلداۋىندا بولادى. ال جولاۋشىلارعا قولما-قول ەسەپ ايىرىسۋعا تىيىم سالىنادى.
الايدا بۇل جەڭىلدىكتەردىڭ جىتىقارا اۋدانىنا قاتىسى جوق. جىتىقارادا كارانتين رەجىمى 25 مامىرعا دەيىن ساقتالادى.
قوستاناي وبلىسى
