كەشە ورتالىق كوممۋنيكاتسيالار قىزمەتىندە وتكەن ءداستۇرلى بريفينگتە رەسمي وكىل التاي ابيبۋللاەۆ اپتا ىشىندە ەلىمىزدىڭ ىشكى جانە سىرتقى ساياساتىنا قاتىستى جۇرگىزىلەتىن باستى وقيعالاردى جۋرناليستەر نازارىنا ۇسىندى.
كەشە ورتالىق كوممۋنيكاتسيالار قىزمەتىندە وتكەن ءداستۇرلى بريفينگتە رەسمي وكىل التاي ابيبۋللاەۆ اپتا ىشىندە ەلىمىزدىڭ ىشكى جانە سىرتقى ساياساتىنا قاتىستى جۇرگىزىلەتىن باستى وقيعالاردى جۋرناليستەر نازارىنا ۇسىندى.
الدا قىلىشىن سۇيرەتىپ كارلى قىس كەلە جاتقاندىقتان, وعان دايىندىق بارىسىنىڭ دا ۇكىمەت نازارىندا ەكەندىگىن جۋرناليستەر قاپەرىنە سالعان رەسمي وكىل وسىعان وراي 24 قىركۇيەكتە پرەمەر-مينيستر سەرىك احمەتوۆتىڭ ءتوراعالىعىمەن بولاتىن ۇكىمەت وتىرىسىندا ەلدىڭ بارلىق وڭىرلەرىندە جىلۋ بەرۋ ماۋسىمىنا دەگەن دايىندىق ماسەلەسى قارالاتىنىن جەتكىزدى.
وسى اپتا ىشىندە, ياعني 25 قىركۇيەكتە استانادا كەدەن وداعىنىڭ جانە قازاقستان, رەسەي, بەلورۋسسيانىڭ ءبىرتۇتاس ەكونوميكالىق كەڭىستىگىنىڭ جوعارى ورگانى بولىپ تابىلاتىن جوعارى ەۋرازيالىق ەكونوميكالىق كەڭەستىڭ جۇمىسى جۇرەتىنى جانە وعان پرەمەر-مينيستر سەرىك احمەتوۆتىڭ قاتىساتىنى دا بريفينگتە ءمالىم بولدى. ا.ابيبۋللاەۆ سول كۇنى مەملەكەت باسشىسى نۇرسۇلتان نازارباەۆتىڭ وتىرىسقا قاتىسۋشى تاراپتار – قازاقستان پرەمەر-ءمينيسترى سەرىك احمەتوۆتى, رەسەي ۇكىمەتىنىڭ ءتوراعاسى دميتري مەدۆەدەۆ پەن بەلارۋس ۇكىمەتىنىڭ پرەمەر-مينيسترى ميحايل مياسنيكوۆيچتى قابىلدايتىنىن ايتتى.
جالپى, رەسەي ۇكىمەتى ءتوراعاسىنىڭ استاناعا ساپارى اياسىندا رەسەيلىك تاراپپەن ەكىجاقتى قارىم-قاتىناستىڭ اۋقىمدى ماسەلەلەرى, ساۋدا جانە ەنەرگەتيكالىق ىنتىماقتاستىقتىڭ نەگىزگى تەتىكتەرى, عارىش سالاسىنداعى ءوزارا ىنتىماقتاستىق, سونىمەن قاتار, ەكاتەرينبۋرگتە وتكەلى وتىرعان 10-شى مەرەيتويلى قازاقستان-رەسەي وڭىرارالىق فورۋمىنا دايىندىق پەن كەدەن وداعى جانە ءبىرتۇتاس ەكونوميكالىق كەڭىستىك اياسىنداعى ءوزارا ىنتىماقتاستىقتى جەتىلدىرۋ شارالارى ەگجەي-تەگجەيلى تالقىلاناتىن كورىنەدى.
وسىدان كەيىن بريفينگتە جۋرناليستەر الدىنا شىققان اۋىل شارۋاشىلىعى ءمينيسترى اسىلجان مامىتبەكوۆ بيىلعى ەگىن جيناۋ ناۋقانىنىڭ وزگەشەلىكتەرىن ورتاعا سالدى. ونىڭ ايتۋىنشا, بيىل اۋا رايىنىڭ قولايسىز جاعدايىنا بايلانىستى ەلىمىزدىڭ ءۇش نەگىزگى بيداي ءوسىرۋشى وبلىستارىندا ەگىن جيناۋ ناۋقانى ەكى اپتاعا كەش باستالعان.
ستاتيستيكا اگەنتتىگىنىڭ ءمالىمەتىنە سۇيەنە دەرەكتەر كەلتىرگەن مينيستر 2013 جىلى بارلىق اۋىل شارۋاشىلىعى ءداندى داقىلدارىنىڭ ەگىستىك القاپتارى 21,5 ملن. گەكتار قۇراپ وتىرعانىن جەتكىزدى. سوڭعى 21 قىركۇيەكتەگى دەرەكتەرگە قاراعاندا, 10,3 ملن. گا (65,0%) جەردىڭ ەگىنى جينالعان كورىنەدى. مينيستر ءوز سوزىندە بيىلعى ەگىن جيناۋ ناۋقانىنىڭ كەش باستالعانىنا قوسا, وزگە دە قيىندىقتار تۋىپ وتىرعانىن جەتكىزدى. ديقان قاۋىمىنا اۋا رايىنا جانە ەگىستىك القاپتاردىڭ جالپى كۇيىنە وراي (ارامشوپتىلىك جانە ت.ب.) جيناۋ جۇمىستارىن ەكى ساتىلىق ءادىس ارقىلى جۇرگىزۋگە تۋرا كەلگەنىمەن دە ءبولىستى.
سونداي اق, اسىلجان سارىباي ۇلى ەگىن وراعىن وتكىزۋ بارىسىنا مەملەكەت تاراپىنان جاسالعان قولداۋ جايلى دا اڭگىمەلەپ بەردى. ماسەلەن, بيىلعى ەگىن وراعىنا 410 مىڭ توننا ءمولشەرىندە ديزەل وتىنى ءبولىنىپ, ول مۇناي وڭدەۋ زاۋىتىنان ءليترى 78 تەڭگەدەن ساتىپ الىنعانىن ايتقان مينيستر ديقانعا جەتكەن وتىننىڭ نارىقتاعى باعادان 10 پايىزعا ارزانعا تۇسكەنىن دە نازارعا سالدى.
مينيستر بريفينگتە استىق قابىلداۋ كاسىپورىندارىنىڭ (اقك) استىق ساقتاۋعا دايىندىعىنا دا توقتالىپ ءوتتى. بۇگىنگى تاڭدا استىق ساقتايتىن سىيىمدىلىقتار 24,6 ملن. توننانى قۇراپ وتىر, بۇل بولجامدالعان 18,5 ملن. تونناداي استىقتى ساقتاۋعا مۇمكىندىك بەرەدى, دەگەن ول 19 قىركۇيەكتە اقك-لەرگە جەتكەن استىق كولەمىن جاريا ەتتى. ول بويىنشا 2053,2 مىڭ توننا استىق كىرسە, ونىڭ ىشىندە بيدايى 1869,2 مىڭ توننا, ارپا 147,1 مىڭ توننا, باسقا دا ءداندى داقىلدار 26,3 مىڭ توننا, كۇرىش 10,6 مىڭ توننانى قۇراعان كورىنەدى.
ەگىن وراعى كەش باستالسا دا, ەل ريزىعى كەمىمەسە كەرەك.
انار تولەۋحانقىزى,
«ەگەمەن قازاقستان».
