ت-34 تانكىنە توعىزاق وتشاشقىشى قوندىرىلىپ, 1942 جىلى جاڭا ۇلگىدەگى «وت-34» تانكتەرى العاش مايدان شەبىنە شىعادى. «وت-34» دەپ اتالعان شىنجىر تابان وت تانكتەردىڭ ادەتتەگى تانكتەن ارتىقشىلىعى دا وسى وتشاشقىشىندا ەكەن. 10 سەكۋند ىشىندە 3 دۇركىن قىزىل جالىن اتىپ, 130 مەتر قاشىقتاعى نىسانانى ءدال ءتۇسىپ ورتەي الاتىن وت تانكتەر شەشۋشى شابۋىلداردا جاياۋ اسكەر كۇشىن دەمەۋ ءۇشىن پايدالانىلعان. تالاي جويقىن ۇرىستاردا جاۋدىڭ الدىرماس امبرازۋراسى مەن قۇرىش قۇرسانعان اسكەري تەحيكاسىن وتقا وراپ, جان ساقتاماق بولعان فاشيست سولداتتارىن وكوپ ىشىندە تىرىدەي ءۇيتىپ جىبەرگەن توعىزاق وتشاشقىشى «ايداھار» دەگەن لاقاپ اتقا يە بولادى. ويتكەنى ءبىر مەزەتتە پۋلەمەتتەن وق جاۋدىرا وتىرىپ, كومەيىنەن جالىن قۇسىپ, جولىنداعىنىڭ ءبارىن جايپاپ وتە شىعاتىن «وت-34» تانكى دۇشپاننىڭ كوزىنە اۋزىنان توزاق وتىن شاشىپ جان الۋعا كەلە جاتقان الىپ اجداھانى ەلەستەتكەن دەسەدى.
سوعىس جىلدارى توعىزاق زاۋىتىنان 1170 وتشاشقىش شىقتى. بۇگىندە بۇل وتشاشقىشتىڭ ءبىر ۇلگىسى قوستاناي وبلىستىق تاريحي-ولكەتانۋ مۋزەيىندە ساقتاۋلى تۇر. مۇراجايدىڭ عىلىمي-ادىستەمەلىك ءبولىمىنىڭ مەڭگەرۋشىسى ءنازيما وتاشەۆانىڭ ايتۋىنشا, توعىزاق اسكەري زاۋىتى 1944-ءشى جىلدان باستاپ ترانشەيالىق وق-ءدارى وتشاشقىشتارىن شىعارا باستاعان. ال 1945 جىلى سوعىس اياقتالعان سوڭ توعىزاق مەحانيكالىق زاۋىتى بولىپ قايتا قۇرىلىپ, بەيبىت ەڭبەك ماقساتىنداعى تراكتورلار مەن اۋىلشارۋاشىلىق تەحنيكالارىنا ارناپ قوسالقى بولشەكتەر شىعارا باستاعان.
قوستاناي وبلىسى
