ايماقتار • 08 مامىر، 2020

اتىراۋ: بيۋدجەت قارجىسى نەگە يگەرىلمەيدى؟

94 رەت كورسەتىلدى

اتىراۋ وبلىسىنىڭ بىرنەشە سالاسىندا بيۋدجەتتىڭ 3 ميللياردتان استام تەڭگەسى يگەرىلمەي وتىر. مۇنىڭ سەبەبى نەدە؟ 

وڭىرلىك كوممۋنيكاتسيالار قىزمەتىنىڭ حابارلاۋىنشا، بۇل وبلىس اكىمى ماحامبەت دوسمۇحامبەتوۆ وتكىزگەن سەلەكتورلىق ماجىلىستە بەلگىلى بولدى.

​– بيۋدجەتتىك باعدارلاما اكىمشىلەرى قارجىلاندىرۋ جوسپارلارىن ناقتى جوسپارلامايدى. الدىن الا تالداۋ جاسالمايدى. سونداي-اق، مەردىگەرلەر دە جۇمىس كەستەسىن ساقتامايدى. اتاپ ايتقاندا، قارجىنى يگەرمەۋ قۇرىلىس، اۋىل شارۋاشىلىعى، ۆەتەريناريا، دەنساۋلىق ساقتاۋ، ءبىلىم بەرۋ، كاسىپكەرلىك، جۇمىلدىرۋ دايىندىعى سالالارىندا تىركەلىپ وتىر، – دەدى  وبلىستىق  قارجى باسقارماسى باسشىسىنىڭ مىندەتىن اتقارۋشى سەرىك دەمەگەنوۆ.

ونىڭ ايتۋىنشا، المالى اۋىلىنىڭ جاڭا شاعىن اۋداندارىنا ەلەكتر جەلىلەرىن تارتۋعا 305 ملن تەڭگە، اتىراۋ قالاسىنىڭ سول جاعالاۋىنداعى كاناليتسازيالىق تازارتۋ قوندىرعىسىنىڭ قۇرىلىسىنا بولىنگەن 1​ 293،3 ملن تەڭگە، ​ اۋىل شارۋاشىلىعى باسقارماسىندا سۋبسيديالاۋعا بايلانىستى 7،4 ملن تەڭگە يگەرىلمەي قالعان.

وسىعان وراي وبلىس اكىمى ماحامبەت دوسمۇحامبەتوۆ قارجىنى يگەرە الماعان سالا باسشىلارىن  سۇراقتىڭ  استىنا الدى. اتىراۋ قالاسى مەن  اۋداندار اكىمدەرىنە، ءتيىستى باسقارمالارعا ناقتى تاپسىرمالار جۇكتەدى.​

– بيۋدجەت قارجىسى سىزدەردىڭ بەرگەن ۇسىنىستارىڭىز بەن سۇرانىمدارىڭىزدىڭ نەگىزىندە ءبولىنىپ وتىر. سوندىقتان، قارجىنى ۋاقىتىندا ءارى ءتيىمدى پايدالانىپ، يگەرۋدى تاپسىرامىن. بيۋدجەتتى جوسپارلاعان كەزدە حالىقتىڭ بارلىق قاجەتتىلىگىن  مەيىلىنشە ەسكەرۋ كەرەك، -دەدى ماحامبەت دوسمۇحامبەتوۆ.​

جىل باسىنان بەرى وبلىستىق بيۋدجەتتىڭ  كىرىس كولەمى 167​ ملرد 617،4 ملن تەڭگەنى قۇراپ وتىر. ونىڭ ىشىندە ​ رەسپۋبليكالىق بيۋدجەت ترانسفەرتتەرى 25 ملرد 262،7 ملن تەڭگە بولسا، كرەديتتەر ​ 4 ملرد 597،6 ملن تەڭگەگە جەتتى.

سوڭعى جاڭالىقتار

ۇقساس جاڭالىقتار