وقيعا بىلاي بولعان ەدى, 29 قاڭتاردا تۇنگى ساعات 23.30-دا اۋداندىق پوليتسيا بولىمىنە ايەت اۋىلىنىڭ جاباعى باتىر كوشەسىندەگى جەكە ۇيلەردىڭ بىرىنەن ءورت شىققانى تۋرالى حابار تۇسەدى. كەزەكشى بىردەن دابىل قاعىپ, توسىن وقيعانى ءورت سوندىرۋشىلەر مەن جەدەل جاردەم قىزمەتىنە حابارلايدى. الايدا ءورت شىققان ۇيگە ءبىرىنشى بولىپ پوليتسيا قىزمەتكەرلەرى جانات مەڭدىعاليەۆ پەن سەرگەي چەكين جەتكەن ەدى.
- وقيعا ورنىنا كەلگەنىمىزدە اۋلادا ءۇي يەسى مەن كورشىلەرى جيىلىپ تۇر ەكەن. ەر ادام ءۇيدىڭ ىشىندە اپكەسى قالعانىن ايتتى, - دەيدى ۋچاسكەلىك پوليتسيا ينسپەكتورى جانات مەڭدىعاليەۆ.
ساناۋلى ساتتە قىزىل جالىن شارپىپ ۇلگەرگەن ۇيگە كىرۋ مۇمكىن ەمەس ەدى. پوليتسيا قىزمەتكەرلەرى ءورت سوندىرۋشىلەر جاساعى كەلگەنشە ءتىلسىز جاۋ ءورشىپ كەتپەۋ ءۇشىن تەرەزەدەن قار لاقتىرىپ ارپالىسقا تۇسەدى. كوپ كەشىكپەي ءورت سوندىرۋشىلەر دە جەتىپ, جالىننىڭ بەتىن قايتارادى. بىراق ءالى تولىق سونە قويماعان ءۇي بۇل كەزدە ىستىعى سىرتقا تەۋىپ تۇتىندەۋگە كوشكەن ەدى. سول ساتتە جانات مەڭدىعاليەۆ تۇمشالاعان ءتۇتىن مەن بەت قارىعان ىسقا قاراماستان دەرەۋ ۇيگە كىرەدى. قولشامنىڭ كومەگىمەن قارمانىپ ءجۇرىپ سوڭعى بولمەدەن كەرەۋەتتە ەس-ءتۇسسىز جاتقان ايەل ادامدى كورەدى.
- ويلانۋعا ۋاقىت بولمادى. ءتۇتىن باسقان بولمەدە جاتقان ايەلدى كورگەندە ميىمدا «قالايدا قۇتقارۋ كەرەك» دەگەن جالعىز-اق وي بولدى. ايتەۋىر اۋپىرىمدەپ ءجۇرىپ سىرتقا الىپ شىقتىم, - دەيدى ۋچاسكەلىك ينسپەكتور. جانات ايەلدى كوتەرىپ سىرتقا ۇمتىلعان ساتتە ەدەندە بۇكتۇسىپ ىڭىرسىپ جاتقان تاعى ءبىر ادامدى بايقاپ قالادى. ايەلدى سىرتتا تۇرعان ارىپتەسىنە تابىستاعان ۋچاسكەلىك ينسپەكتور قويۋ ءتۇتىن باسقان ۇيگە ەكىنشى رەت كىرىپ, ەر ادامدى سىرتقا الىپ شىعادى. سويتسە, ول ىشكە وزىنەن كەيىن ىلە-شالا كىرگەن ءۇي يەسى ەكەن. اكپەسىن قۇتقارماق بولعان ەر ادامدى از عانا ۋاقىت ىشىندە ىستىق ۇرىپ قۇلاتقان.
پوليتسەيلەر جەدەل جاردەم كولىگىن كۇتپەستەن, 54 جاستاعى ايەل مەن ونىڭ 52 جاستاعى باۋىرىن اۋداندىق اۋرۋحاناعا جەتكىزەدى. دارىگەرلەر ەكى ادامنىڭ دا ۋلانعانىن حابارلادى.
قاڭتاردىڭ قاقاعان ايازىندا قىزىل جالىنعا ورانعان ءۇيدىڭ ىشىنەن ەكى بىردەي ادامدى امان الىپ شىققان پوليتسيا قىزمەتكەرىنىڭ ەرلىگى ەسكەرۋسىز قالعان جوق. وتان قورعاۋشىلار كۇنى مەرەكەسى قارساڭىندا ىشكى ىستەر مينيسترلىگىنىڭ باسشىلىعى جانات مەڭدىعاليەۆكە «ەرلىگى ءۇشىن» مەدالىن تابىس ەتتى.
- 2019 جىلى ش. قابىلباەۆ اتىنداعى قوستاناي اكادەمياسىن ءتامامدادىم. قىزمەتتە ءجۇرىپ ءۇي بولىپ, وتباسىن قۇردىم. تاياۋدا ءبىر قۋانىش بولىپ قالار دەپ ۇمىتتەنىپ وتىرمىز. قىزمەت بابىندا مۇنداي جاعدايلار ءجيى بولادى. ەسكەرىپ, ومىراۋىما مەدال تاعىپ جاتقان باسشىلارعا العىس ايتامىن. اسىرەسە, ءوزىمدى دۇنيەگە اكەلىپ, باعىپ-قاعىپ وسىرگەن اتا-اناما, اكادەميادا شىڭداپ, تاربيەلەپ ازامات ەتىپ قالىپتاستىرعان ۇستازدارىما العىسىم ەرەكشە, - دەدى بەيبىت كۇننىڭ باتىرى.
قوستاناي وبلىسى
