زاڭ جوباسىن تالقىلاۋ بارىسىندا ءماجىلىس دەپۋتاتى جانات وماربەكوۆا اتالعان قۇجاتقا سايكەس كونستيتۋتسيالىق زاڭنىڭ 12-بابى, 4-تارماقپەن تولىقتىرىلاتىنىن, وندا پارلامەنتتىك وپپوزيتسيانىڭ ءبىر سەسسيا ىشىندە كەمىندە ءبىر پارلامەنتتىك تىڭداۋعا باستاماشىلىق جاساۋعا قۇقىلى ەكەنى كورسەتىلگەنىن ايتتى. وسى رەتتە دەپۋتات باياندامىشادان بۇل نورما قانشالىقتى قاجەت ەكەنىن cۇرادى. ويتكەنى قولدانىستاعى زاڭنىڭ 12-بابىندا دەپۋتاتتاردىڭ پارلامەنتتىك تىڭداۋعا باستاماشىلىق جاساۋىنا ەشبىر شەكتەۋ جوق دەپ كورسەتىلگەن ەكەن.
– دۇرىس ايتاسىز, زاڭ دەپۋتاتتاردىڭ پارلامەنتتىك تىڭداۋعا باستاماشىلىق جاساۋ قۇقىعىن شەكتەمەيدى. بىراق پارلامەنتتىك كوپشىلىكتىڭ ورنى شەشۋشى ەكەنىن ءبارىمىز جاقسى بىلەمىز. ال وسى زاڭنىڭ ماقساتى – پارلامەنتتىك وپپوزيتسيانىڭ قۇقىقتارىن ىسكە اسىرۋ. قوعامدى الاڭداتاتىن سۇراقتاردىڭ كوشەدە ەمەس, پارلامەنت قابىرعاسىندا كوتەرىلگەنىن قالايمىز. سول ءۇشىن وپپوزيتسياعا كەمىندە سەسسيا سايىن پارلامەنتتىك تىڭداۋلار دەڭگەيىندە وزەكتى ماسەلەلەردى قوزعاۋعا مۇمكىندىك بەرۋىمىز كەرەك, – دەدى ءماجىلىس دەپۋتاتى ازات پەرۋاشەۆ.
وسى تۇستا سوزگە ءماجىلىس توراعاسى نۇرلان نىعماتۋلين ارالاسىپ, بۇل نورمانىڭ باسقا نورمالارمەن سالىستىرعان ۇلكەن ايىرماشىلىعى بار ەكەنىن, ەندى زاڭ دەڭگەيىندە پارلامەنتتىك وپپوزيتسياعا كەمىندە ءبىر رەت پارلامەنتتىك تىڭداۋ وتكىزۋ مۇمكىندىگى بەرىلەتىنىن, بۇل بۇرىن بولماعىنىن اتاپ ءوتتى.
