ءبىرىنشى وقيعا تاراز قالاسىندا انىقتالعان. 1996 جىلى تۋعان ناۋقاس بۇعان دەيىن اۋىرعاندارمەن بايلانىستا بولعان. پتر-تەكسەرۋدىڭ ناتيجەلەرى كوروناۆيرۋستىق ينفەكتسيانىڭ بار ەكەندىگىن انىقتادى. سونداي-اق, ىندەت اتىراۋ وبلىسىنىڭ تەڭىز كەنتىندە ۆاحتالىق ادىسپەن جۇمىس ىستەگەن 1964, 1966 جانە 1980 جىلى تۋعان ءۇش ەر ادامنان دا تابىلدى. بەلگىلەنگەن الگوريتمگە سايكەس, وڭىرگە كەلگەننەن كەيىن ولار كارانتيندىك ستاتسيونارعا وقشاۋلانعان. زەرتحانالىق تالداۋ قورىتىندىلارى بويىنشا ولارعا COVID-2019 دياگنوزى قويىلدى. ناۋقاستار ينفەكتسيالىق ستاتسيونارعا اۋىستىرىلعان. ولارمەن جاقىن بايلانىستا بولعان ادامدار كارانتينگە وقشاۋلانىپ, ولاردى تەكسەرۋ جۇمىستارى جۇرگىزىلۋدە.
جالپى, اعىمداعى جىلعى 5 مامىر كۇنگى جاعداي بويىنشا جامبىل وبلىسىنىڭ اۋماعىندا كوروناۆيرۋستىق ينفەكتسيانىڭ 158 جاعدايى تىركەلگەن. ونىڭ ىشىندە تاراز قالاسىندا 74, بايزاق اۋدانىندا 11, جامبىل اۋدانىندا 5, قورداي اۋدانىندا 37, مەركى اۋدانىندا 3, شۋ اۋدانىندا 2 جانە مويىنقۇم اۋدانىندا 1 ادامنان انىقتالعان. سونداي-اق, «دەلي – تاراز» رەيسىمەن كەلگەن جولاۋشىلاردان 6 وقيعا, تەڭىز ۆاحتالىق كەنتىنەن كەلگەن جۇمىسشىلار اراسىندا 19 وقيعا انىقتالعان. بارلىق دەرت جۇقتىرعانداردىڭ 51-ءى ساۋىعىپ, ءۇي كارانتينىنە شىعارىلعان. ولار دارىگەرلەردىڭ باقىلاۋىندا بولادى.
جامبىل وبلىسى
