وبلىستا ەگىستىكتىڭ ەش كەدەرگىسىز جۇرۋىنە بارىنشا جاعداي جاسالۋدا. اسىرەسە, جانار-جاعارماي جەتكىزۋ جولعا قويىلعان. ديقاندارعا قاجەتتى 5 300 توننا ديزەل وتىنى شارۋاشىلىقتارعا تاسىمالدانىپ, 4 200 تونناسى ىسكە جاراتىلىپتى. شارۋالار جانارمايدىڭ ءار ءليترىن 165 تەڭگەدەن ساتىپ الۋدا.
- ايماقتا «قولداۋ» جۇيەسى ارقىلى بەرىلگەن ەلەكتروندى ءوتىنىش نەگىزىندە 1086 شارۋا سۋبسيديا الدى. بۇل اگروونەركاسىپ كەشەنى بويىنشا تاۋار وندىرۋشىلەردى قولداۋعا بەرىلەتىن مەملەكەتتىڭ كومەگى. قازىرگە دەيىن وبلىستىڭ شارۋا قوجالىقتارى 1 024,9 ملن تەڭگە سۋبسيدياعا قول جەتكىزدى. سول سياقتى ەگىس ناۋقانىن مەرزىمىندە ءارى ساپالى اتقارۋ ءۇشىن «اگرارلىق نەسيە» كورپوراتسياسىنىڭ «كەڭ دالا» باعدارلاماسى ارقىلى جىل باسىنان بەرى 78 زايم الۋشىعا 888,4 ملن تەڭگە سوما نەسيە بەرىلگەن. مۇنان بولەك, وبلىستاعى 11 اۋىل شارۋاشىلىعى تاۋارىن ءوندىرۋشى نىسان «قاراپايىم زاتتار ەكونوميكاسى» باعدارلاماسى شەڭبەرىندە جالپى سوماسى 290 ملن تەڭگە نەسيە الۋعا ءوتىنىش بەردى, - دەيدى وبلىس اكىمىنىڭ ورىنباسارى سەرىكجان بەسكەمپىروۆ.
الماتى وبلىسى
