بەس بالادان 12 نەمەرە ءسۇيىپ وتىرعان قاريا جەتپىستى ەڭسەرسە دە, قارتايدىم دەپ قاراپ وتىرعان جوق. كۇن سايىن اۋىلدان 90 شاقىرىم قاشىق ورنالاسقان توسقاۋىل بەكەتىنە قاتىناپ, كۇزەتتە تۇرعان ءتارتىپ ساقشىلارىنا اس-سۋ تاسيدى. اس-سۋ بولعاندا, از-ماز ەت قوسىپ, مايعا بۇقتىرعان ماكارون سياقتى قالانىڭ تاقىل-تۇقىل تاعامى ەمەس. بابىنا كەلتىرىپ تۇرىپ اسقان بىلتىردان قالعان سوعىمنىڭ ءسۇر ەتى, مامىردىڭ سارى ۋىز مايى مەن جۇمساق قىمىزى, ايران, قيىقشا نان, قۇرت, ىرىمشىك سياقتى تولىپ جاتقان جەڭسىك اس. قىسقاسى كادىمگى مالدى اۋىلدىڭ ادەتتەگى اسى.
پوليتسەيلەردىڭ جۇمىسى اۋىر ەكەنىن بىلەمىن. كۇنى-ءتۇنى بەل جازباي بەكەت كۇزەتەدى. ولارعا قولدان كەلگەنشە كومەك كورسەتۋ پارىزىمىز بولعان سوڭ, وسىلاي كۇن سايىن كەلىپ, قال-جاعدايلارىن سۇراپ, اماندىقتارىن ءبىلىپ تۇرامىن. ەندى وسىنداي قيىن كەزەڭدە ءبىر-ءبىرىمىزدى سۇيەمەسەك, بولمايدى عوي. 12 نەمەرەمنىڭ ىشىندەگى فارحاتىم پوليتسيادا جۇمىس ىستەيدى, قازىر كاپيتان بولدى. ارقالىق قالاسىندا جەدەل ۋاكىل بولىپ قىزمەت اتقارادى. ءبارى دە ءوز بالام عوي, - دەيدى قاريا.
جالپى ايماقتا كارانتين باستالعالى تۇرعىنداردىڭ پوليتسياعا دەگەن كوزقاراسى وزگەرگەنىن ءتارتىپ ساقشىلارىنىڭ وزدەرى دە ايتىپ وتىر. وسى قىسقا مەرزىم ىشىندە تۇرعىندار تاراپىنان پوليتسەيلەرگە قولداۋ كورسەتۋ شارالارى جيىلەپ, وبلىستا 15 شاقتى اۋقىمدى قايىرىمدىلىق اكتسياسى وتكەن.
«تۇرعىندار كوبىنە ازىق-ت ۇلىك پەن بەتپەردە, انتيسەپتيك سياقتى قورعانىش قۇرالدارىن اكەلىپ بەرىپ جاتىر. ەندى وزىمىزدە ءبارى جەتكىلىكتى بولسا دا, شىنايى ىقىلاس-پەيىلمەن كەلىپ تۇرعان سوڭ, قولىن قايتارا المايمىز. العىسىمىزدى ايتىپ, رازىلىعىمىزدى بىلدىرەمىز. جالپى, بۇگىنگى جاعداي ءبارىمىزدى جۇدىرىقتاي جۇمىلدىرىپ, ءبىر-بىرىمىزگە جاقىنداستىرا ءتۇستى. جاعدايىنىڭ جۇتاڭدىعىنا قاراماي, ۇيىندەگى بار جىلى-جۇمساعىن اۋزىڭا توسقان قاراپايىم جانداردى كورگەندە ەرىكسىز تولقىپ كەتەمىز» - دەيدى ءتارتىپ ساقشىلارى.
قوستاناي وبلىسى
