بۇگىنگى كۇندە اتالعان قورعا كاسىپورىندار, ۇيىمداردىڭ ەڭبەك ۇجىمدارى, قۇرىلىس جانە جول كومپانيالارى اتىنان, سونداي-اق, وبلىستاعى مەملەكەتتىك قىزمەتكەرلەردىڭ ءبىر كۇندىك ەڭبەكاقىسى ەسەبىنەن 728 282 322 تەڭگە اۋدارىلعان ەكەن.
جينالعان قاراجاتتىڭ 58 750 000 تەڭگەسىنە 10 دانا «ساپ-01» اۆتوكولىك دەزينفەكتور-بۇرىككىشتەرى ساتىپ الىنىپتى. بىراق, بەلگىسىز سەبەپتەرمەن ولاردىڭ سوماسى ءالى تولىق تولەنبەگەن...
اسپالى جانە بەنزين بۇرىككىشتەرىن الۋعا 33 918 926 تەڭگە جۇمسالىپتى. وبلىس اۋرۋحانالارىنا ءدارى-دارمەك جانە مەديتسينالىق قۇرال-جابدىقتار ساتىپ الۋعا 92 339 889 تەڭگە قور قارجىسى بولىنگەن. COVID-19 ىندەتىمەن كۇرەسۋگە قاتىسقان مەديتسينالىق قىزمەتكەرلەردىڭ مەكەمەلەردە تۇرۋىنا جانە تاماقتانۋىنا 34 938 500 تەڭگە قاراجات كەتىپتى.
مەديتسينا قىزمەتكەرلەرىن كارانتين جاعدايىندا تۇرىپ جاتقان تۇرعىلىقتى جەرلەرىنەن جۇمىسقا دەيىن تاسىمالداۋ ماقساتىنا 1 992 000 تەڭگە ءۇشىن تولەنگەن. COVID-19 جۇقتىرۋ قاۋپى بولعان «وبلىستىق جەدەل مەديتسينالىق جاردەم ستانتسياسى» كمك قىزمەتكەرلەرىنىڭ سىياقىسىنا 68 949 750 تەڭگە ءبولىنىپتى.
«كومەك-2020» وبلىستىق قوعامدىق قورىنداعى قارجىنىڭ جۇمسالۋىنا قامقورشىلىق كەڭەس باقىلاۋ جاسايدى. ونىڭ قۇرامىندا مەديتسينا عىلىمدارىنىڭ دوكتورى, پروفەسسور, مەملەكەتتىك سىيلىعىنىڭ يەگەرى قاني مۇسۇلمانبەكوۆ, «رۋحاني جاڭعىرۋ» باعدارلاماسىن جۇزەگە اسىرۋ بويىنشا قاراعاندى وبلىسى اكىمىنىڭ كەڭەسشىسى, قازاقستان حالقى اسسامبلەياسىنىڭ مۇشەسى, وبلىستىق ءماسليحات دەپۋتاتى بەكزات التىنبەكوۆ, «قاراعاندى مەديتسينا ۋنيۆەرسيتەتى» كەاق رەكتورىنىڭ كەڭەسشىسى, قازاقستان حالقى اسسامبلەياسىنىڭ عىلىمي-ساراپتامالىق توبىنىڭ مۇشەسى ۆيلەن مولوتوۆ-لۋچانسكي, قازاقستاننىڭ ەڭبەك سىڭىرگەن ونەر قايراتكەرى, قازاقستان جازۋشىلار وداعىنىڭ مۇشەسى سەرىك اقسۇڭقار ۇلى جانە قازاقستاننىڭ ەڭبەك سىڭىرگەن جاتتىقتىرۋشىسى, قۇرمەتتى سپورت قايراتكەرى ۆالەري گروموۆ بار.
قاراعاندى وبلىسى
