كەشە الماتىدا Rixos قوناقۇيىندە «Kasakhstan OnLike-2013» حالىقارالىق مەدياكونگرەسى ءوتتى. قر جۋرناليستەر وداعى مەن قازاقستان ينتەرنەت قاۋىمداستىعى ۇيىمداستىرىپ, قر مادەنيەت جانە اقپارات مينيسترلىگى مەن قر پرەزيدەنتى جانىنداعى ورتالىق كوممۋنيكاتسيا قىزمەتىنىڭ قولداۋىمەن وتكەن القالى جيىنعا 250-گە جۋىق قازاقستاندىق باق-تىڭ باس رەداكتورلارى, ينتەرنەت-رەسۋرستاردى پايدالانۋشىلار, تانىمال مەدياساراپشىلار مەن قوعامدىق ۇيىمداردىڭ باسشىلارى, بلوگەرلەر, ساياساتتانۋشىلار, ءباسپاسوز-قىزمەتى كومپانيالارىنىڭ باسشىلارى قاتىستى. سپيكەرلىككە قازاقستان, رەسەي جانە ۋكراينانىڭ تانىمال مەدياساراپشىلارى شاقىرىلدى.
كەشە الماتىدا Rixos قوناقۇيىندە «Kasakhstan OnLike-2013» حالىقارالىق مەدياكونگرەسى ءوتتى. قر جۋرناليستەر وداعى مەن قازاقستان ينتەرنەت قاۋىمداستىعى ۇيىمداستىرىپ, قر مادەنيەت جانە اقپارات مينيسترلىگى مەن قر پرەزيدەنتى جانىنداعى ورتالىق كوممۋنيكاتسيا قىزمەتىنىڭ قولداۋىمەن وتكەن القالى جيىنعا 250-گە جۋىق قازاقستاندىق باق-تىڭ باس رەداكتورلارى, ينتەرنەت-رەسۋرستاردى پايدالانۋشىلار, تانىمال مەدياساراپشىلار مەن قوعامدىق ۇيىمداردىڭ باسشىلارى, بلوگەرلەر, ساياساتتانۋشىلار, ءباسپاسوز-قىزمەتى كومپانيالارىنىڭ باسشىلارى قاتىستى. سپيكەرلىككە قازاقستان, رەسەي جانە ۋكراينانىڭ تانىمال مەدياساراپشىلارى شاقىرىلدى.
جيىندى اشىپ, قۇتتىقتاۋ ءسوز سويلەگەن قر مادەنيەت جانە اقپارات ۆيتسە-ءمينيسترى ارمان قىرىقباەۆ تورتكۇل دۇنيەدە ينتەرنەتتىڭ شاپشاڭ قارقىنمەن دامىپ, سوعان سايكەس نارىقتا جاڭا مەديا پايدا بولىپ وتىرعانىن, سوندىقتان مەملەكەت جاڭا مەديا وكىلدەرىمەن ىنتىماقتاستىققا مۇددەلى ەكەنىن جەتكىزدى.
– ەلىمىزدە ينتەرنەتتى پايدالانۋشىلاردىڭ جالپى ۇلەس سالماعى رەسمي اقپارات بويىنشا حالىق سانىنا شاققاندا 62 پايىزدان اسىپ وتىر. الداعى ۋاقىتتا بۇل كورسەتكىش ودان ءارى وسە بەرمەك. وتاندىق ينتەرنەت كەڭىستىگىن دامىتۋ, ەڭ الدىمەن قازاق ءتىلدى ينتەرنەت رەسۋرستارىنىڭ سانىن كوبەيتىپ, ولاردىڭ ساپاسىن ارتتىرۋ جۇمىسىن جولعا قويۋ, كەرەك بولسا ماتەريالدىق تۇرعىدان كومەك كورسەتۋ – ءبىز ءۇشىن كۇن تارتىبىندە تۇرعان باستى ماسەلە. بۇل جەردە ۆەلوسيپەد ويلاپ تابۋدىڭ قاجەتى جوق. كوپ نارسە بىزگە دەيىن دە ويلاستىرىلعان. سوندىقتان جاقسىلىعىن الىپ, جاماندىعىن كەرى ىسىرىپ وتىرۋىمىز كەرەك. بۇگىنگى كەزدەسۋدىڭ ماڭىزدىلىعى دا وسىندا جاتىر, – دەدى ۆيتسە-مينيستر.
ا.قىرىقباەۆتىڭ ايتۋىنشا, بۇكىل الەمدە بىرىزدەنۋ ۇدەرىستەرى ءجۇرىپ, اسىرەسە, مادەنيەتىمىزگە قاۋىپ ءتوندىرىپ جاتقاندا, وعان قالاي توتەپ بەرەمىز, وسىنداي اۋقىمدى عالامدىق ماسەلەلەردى قالاي شەشەمىز دەگەندە, ەلىمىز الىس-جاقىن شەتەلدىڭ الدىڭعى قاتارلى جاڭا مەديا وكىلدەرىمەن جاقسى قارىم-قاتىناستا بولىپ, ولاردان بىلمەيتىنىمىزدى ۇيرەنىپ, تاجىريبە الماسا ءبىلۋىمىز قاجەت. بۇگىنگى ۇيىمداستىرىلىپ وتىرعان ءىس-شارا سونىڭ ءبىر پاراسى. سونداي-اق, ۆيتسە-مينيستر بيىلدىڭ وزىندە مەملەكەت تاراپىنان مادەنيەت جانە اقپارات مينيسترلىگىنىڭ تىكەلەي قولداۋىمەن جۇزگە جۋىق وتاندىق, ونىڭ ىشىندە ايماقتىق گازەت-جۋرنالداردىڭ بارلىعىن ينتەرنەت جۇيەسىنە كوشىرۋگە جاعداي جاساۋ جونىندە شەشىم قابىلدانىپ, ارنايى قارجى بولىنگەنىن, بۇگىندە ول جۇمىستىڭ ويداعىداي اتقارىلىپ جاتقانىن, جىلدىڭ اياعىنا دەيىن ناتيجەسىن كورەتىنىمىزدى دە جەتكىزە كەتتى.
جيىندا «جاڭا مەديا جانە ساياسي كوممۋنيكاتسيا», «جاڭا مەدياكوممۋنيكاتسيا ەكونوميكا سالاسىندا», «ماسس-مەديا ەۆوليۋتسياسى: قاعازدان سانعا», «جاڭا باق-قا مودەلدى بيزنەس» اتتى تاقىرىپتار پلەنارلىق وتىرىستار مەن سەكتسيالاردا تالقىلاندى.
– مۇنداي جيىندار, القالى باسقوسۋلار ءجيى-ءجيى بولىپ تۇرعانى ابزال, – دەدى بىزبەن اڭگىمەسىندە قازاقستان ءباسپاسوز كلۋبىنىڭ اتقارۋشى ديرەكتورى ساكەن بالباەۆ. – ويتكەنى, قازىرگى بۇقارالىق اقپاراتتىڭ دامۋى جىل سايىن ارتىپ, ءتىپتى كۇن سايىن وزگەرىستەر بولىپ جاتىر. فورۋمدا «نەگە قازاق تىلىندەگى ينتەرنەتتىڭ دامۋ قارقىنى باياۋ» دەگەن ماسەلە دە كوتەرىلدى. ولاي دەيتىنىمىز, بۇكىل الەمدەگى قازاقشا سايتتاردىڭ سانى ەلۋگە جەتپەيدى ەكەن. ورىس تىلىندە مىڭداعان, ال اعىلشىن تىلىندە ەسەپسىز. قازاقستاندا سايتتاردىڭ ورىس تىلىندە بولسىن, قازاق تىلىندە بولسىن كونتەنتى, دامۋى شامالى. ياعني, ماعىناسى از, اقپاراتى از, جىلدام كەلمەيدى. ەندەشە, وسى ماسەلەلەرگە كوڭىل اۋدارۋعا ءتيىسپىز.
قورىتا ايتقاندا, مۇنداي فورۋمدار وسى سالادا تاجىريبە الماسۋدىڭ پلاتفورماسىنا, ىسكەرلىك قارىم-قاتىناستارى مەن ارىپتەستىك بايلانىستاردى دامىتۋعا كومەگىن تيگىزبەك.
گۇلزەينەپ سادىرقىزى,
«ەگەمەن قازاقستان».
