بۇگىن, ياعني 2 مامىر, ساعات تاڭعى 4.30 كەزىندە ماقتاارال اۋدانىنىڭ شەكاراسىندا وتكىزۋ قۋاتى سەكۋندىنا 120 تەكشە مەتر بولاتىن «تسەنترالنىي گولودنوستەپنىي كوللەكتور (تسگك)» ارناسىندا سۋ اعىنى ورىن الىپ, جەڭىس, جاڭا تۇرمىس اۋىلدارىندا سۋ دەڭگەيى كوتەرىلدى. وبلىستىق ماڭىزى بار مىرزاكەنت-جەڭىس-جاڭا تۇرمىس اۆوموبيل جولىن سۋ الىپ كەتۋى سالدارىنان كولىكتەر جۇرە الماۋدا. قازىرگى تاڭدا اپاتتى-قۇتقارۋ جۇمىستارى جۇرگىزىلۋدە.
سونداي-اق مىرزاكەنت, فەردوۋسي, اتاكەنت كەنتىنە قاراستى جانتاقساي ەلدى مەكەندەرى تۇرعىندارىن ەۆاكۋاتسيالاۋ ماسەلەسى قاراستىرىلۋدا. ايتا كەتەلىك, مىرزاكەنت پەن اتاكەن ەلدى مەكەندەرىنىڭ ارا قاشىقتىعى - 35 شاقىرىم. مىرزاكەنت ەلدى مەكەنىندە 2848 ءۇي, 14 532 ادام, فەردوۋسي ەلدى مەكەنىندە 314 ءۇي, 2377 ادام تۇرادى. ال جانتاقساي ەلدى مەكەنىندە 95 ءۇي, 700 تۇرعىن بار.
اپاتتى-قۇتقارۋ جۇمىستارىنا تۇركىستان وبلىسى توتەنشە جاعداي دەپارتامەنتى جەكە قۇرامىنان 138 ادام, 8 تەحنيكا, شىمكەنت قالاسى «وسو» مم 5 ادام, 2 دانا قايىق, 1 تەحنيكا, شىمكەنت قالاسى تجد-نەن 2 دانا ۆاحتالىق اۆتوبۋسى, جەكە قۇرامنان 12 مامان, 4 دانا مپ-100 موتوپومپاسى, 2 ۇرلەنبەلى قايىق, 10 ل-1 جيىنتىعى (سۇڭگۋىرلەر كيىمى) جۇمىلدىرىلعان. سونداي-اق ۇلتتىق گۆارديانىڭ 6506 بولىمشەسىنەن 300 ادام مەن ءتيىستى تەحنيكالار, اۋداندىق پوليتسيا ءبولىمىنىڭ 7 تەحنيكاسى مەن 70 قىزمەتكەرى, جەرگىلىكتى اتقارۋشى ورگاننان 40 قىزمەتكەر, 5 تەحنيكا تارتىلدى.
وزبەكستان رەسپۋبليكاسى تجم شۇعىل مالىمەتىنە سايكەس, 1 مامىر 20:15 شاماسىندا «ساردوبا» سۋ قويماسى قازاقستان رەسپۋبليكاسى اۋماعىنا سۋ اعىزۋدى توقتاتقان. ماقتاارال اۋدانى اكىمدىگى شۇعىل شتاب قۇرىپ, ءتيىستى جۇمىستاردى اتقارۋدا. ەڭبەكشى اۋىلدىق وكرۋگىنە قاراستى جاڭا تۇرمىس ەلدى مەكەنى, جاڭا جول اۋىلدىق وكرۋگىنە قاراستى جەڭىس, نۇرلى جول ەلدى مەكەندەرىنە سۋ باسۋ قاۋپى تۋىنداپ, تۇرعىنداردى قاۋىپسىز جەرگە ەۆاكۋتسيالاۋ ءۇشىن اۋدان ورتالىعى مىرزاكەنت كەنتىندە ورنالاسقان 4 مەكتەپتە بارلىعى 2200 رىن دايىندالدى.
ماقتاارال اۋدانىنىڭ اكىمى, اۋداندىق توتەنشە جاعداي شتابىنىڭ توراعاسى باقىت اسانوۆتىڭ توراعالىعىمەن 2-مامىر كۇنى تۇنگى 00:00-دە شتاب مۇشەلەرىمەن ارنايى جيىن ءوتىپ, توتەنشە جاعداي جاريالاۋعا تاپسىرما بەرىلدى. قازىرگى تاڭدا جاڭاجول اۋىلدىق وكرۋگىنە قاراستى جەڭىس ەلدى مەكەنىنىڭ تۇرعىندارىن (1922 تۇرعىن) قاۋىپسىز جەرگە جاپپاي كوشىرۋ جۇرگىزىلۋدە.
ايتا كەتەيىك, مامانداردىڭ ايتۋىنشا, جوعارىدا اتالعان 3 ەلدى مەكەننەن باسقا كەنتتەر مەن ەلدى مەكەندەرگە قاۋىپ ءتونىپ تۇرعان جوق. سونداي-اق ماقتاارالعا كورشى جەتىساي اۋدانى اكىمىنىڭ مالىمدەۋىنشە, اۋدانعا كەلەر قاۋىپ - قاتەر جوق.
