جاڭا زاۋىتتىڭ اشىلۋىنا الماتى وبلىسىنىڭ اكىمى اماندىق باتالوۆ, مەملەكەت جانە قوعام قايراتكەرى, حالىق قاھارمانى, ەڭبەك ەرى سەرگەي تەرەششەنكو جانە بەلگىلى كاسىپكەر تەمىرحان دوسمۇحامبەتوۆ قاتىستى.
- بۇگىن ءبىز بىرلەسىپ «تالدىقورعان» يندۋستريالدى ايماعىندا مايلى داقىلدار وڭدەپ, وسىمدىك مايىن شىعاراتىن «جەتىسۋ-ماجيكو» زاۋىتىن ىسكە قوسىپ وتىرمىز. ينۆەستورلارعا زور العىس ايتامىن. ءبىز ءوز تاراپىمىزدان يندۋستريالدى ايماق قۇرىپ, ونى قاجەتتى ينفراقۇرىلىممەن قامتاماسىز ەتتىك. جالپى مەملەكەت قولداۋىنىڭ جانە قابىلدانعان شارالاردىڭ ارقاسىندا وتكەن جىلى الماتى وبلىسىنىڭ ونەركاسىپ ءونىمىنىڭ جالپى كولەمى 1 تريلليون تەڭگەگە جۋىقتادى. ءبىز ءبارىمىز بىرلەسىپ ەلباسىنىڭ باستى تاپسىرمالارىن, تۇڭعىش پرەزيدەنتىمىزدىڭ سارا جولىن جالعاستىرىپ كەلە جاتقان مەملەكەت باسشىسى قاسىم-جومارت توقاەۆتىڭ جۇكتەگەن مىندەتتەرىن ورىنداۋ ماقساتىندا جۇمىس ىستەپ كەلەمىز. بۇل جۇمىستار ينۆەستيتسيا تارتۋعا, جاڭا تەحنولوگيامەن جۇمىس ىستەيتىن زاماناۋي ءوندىرىس ورىندارىن اشۋعا, جاڭا جۇمىس ورىندارىن قۇرۋعا باعىتتالعان. بۇگىنگى اشىلىپ وتىرعان زاۋىت – سونىڭ ايقىن ايعاعى, - دەدى زاۋىتتىڭ اشىلۋىندا ءسوز العان وبلىس اكىمى اماندىق باتالوۆ.
«جەتىسۋ-ماجيكو» اگروكەشەنىنىڭ بۇل وندىرىسىنە 4,4 ملرد تەڭگە جۇمسالىپتى. ءبىرىنشى كەزەڭدە 50 جۇمىس ورنى اشىلدى. الداعى ۋاقىتتا كاسىپورىن تولىق قۋاتىنا قوسىلىپ, زاۋىت ىرگەسى كەڭەيگەسىن 500 ادامعا تۇراقتى كاسىپ تابىلماق. قازىر ىسكە قوسىلعان زاۋىت ىستىقتاي سىعىمداۋ تاسىلىمەن وسىمدىك مايىن شىعارادى. ول تاۋلىگىنە 500 توننا راپس جانە 400 توننا كۇنباعىس وڭدەيدى, سونىڭ ناتيجەسىندە وسىمدىك مايى مەن جوم وندىرىلەدى. ءوندىرىس شيكىزاتپەن 100 پروتسەنت قامتىلعان, نەمىس وندىرۋشىلەرىنىڭ قۇرال-جابدىقتارى ورناتىلعان, سول ارقىلى الىناتىن ءونىم ساپاسىن جاقسارتۋ ءۇشىن مايلى داقىل تۇقىمدارىن ەكسترۋزيوندى تەحنولوگيامەن وڭدەۋ قولدانىلادى. دايىن ءونىم جەرگىلىكتى نارىققا شىعارىلادى, سونىمەن قاتار تاياۋ بولاشاقتا قىتايعا ەكسپورتتالادى.
جالپى, جاقىن ارادا تالدىقورعان قالاسىندا جالپى قۇنى 22,9 ملرد تەڭگە بولاتىن تاعى 3 ءىرى ينۆەستيتسيالىق جوبا جۇزەگە اسپاقشى. ناتيجەسىندە 528 ادام جۇمىسپەن قامتىلادى دەگەن جوسپار بار.
الماتى وبلىسى
