قازىرگى تاڭعا دەيىن سەكتور اۋماعىندا 6260 دانا اعاش كوشەتتەرى وتىرعىزىلدى. ەگىلگەن تال-داراقتار تولىعىمەن «جاسىل تۇركىستان» كمم-ءنىڭ قاراۋىنا وتكىزىلگەن. سونداي-اق, جارىقشامدار, قوقىس جاشىكتەرى, ورىندىقتار مەن ايالدامالاردى ورناتۋ جۇمىستارى بەكىتىلگەن ءىس-شارا جوسپارىنا سايكەس جۇرگىزىلۋدە. قازىرگى تاڭدا 120 تۇرعىن ءۇي, 3 كاسىپكەرلىك نىساننىڭ قاسبەتتەرى رەتكە كەلتىرىلگەن. قالانى كوگالداندىرۋعا كەلەس اۋدانىنان 15 ادام, جەرگىلىكتى تۇرعىنداردان 5 ادام تۇراقتى جۇمىسقا تارتىلدى. تازالىق جۇمىستارىنا 3 تەحنيكا جۇمىلدىرىلعان.
قالانى كوگالداندىرۋ جانە اباتتاندىرۋ, سانيتارلىق جاعدايىن جاقسارتۋ باعىتىندا اتقارىلعان جۇمىستاردىڭ بارىسىن تەكسەرگەن وبلىس اكىمى ءومىرزاق شوكەەۆ جاۋاپتى باسشىلارعا جاسىل گازونداردىڭ كوپجىلدىق ءتۇرىن توسەۋدى تاپسىردى. سونداي-اق, قالانىڭ كورنەكتى جەرلەرىندەگى عيماراتتاردىڭ سىرتقى كورىنىسى, شاھاردىڭ بىرىڭعاي كەلبەتىن ساقتاۋ كەرەكتىگىن ەسكەرتتى.
